Bakı, 30 noyabr, AZƏRTAC

Əhalinin polis postlarından yayınaraq və ara yollardan istifadə etməklə işğaldan azad edilən ərazilərə daxil olması nəticəsində mina və partlamamış hərbi sursat təhlükəsinə məruz qalması riski çox yüksəkdir. Buna görə də vətəndaşlar təhlükəsiz səfər imkanları yaradılana qədər işğaldan azad olunan ərazilərə səyahət etməkdən çəkinməlidirlər.

AZƏRTAC xəbər verir ki, bunu Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) direktoru Qəzənfər Əhmədov noyabrın 30-da təşkil olunan mətbuat konfransında deyib.

Q.Əhmədov vurğulayıb ki, 1999-2020-ci illər ərzində mina və partlamış hərbi sursat hadisəsi nəticəsində 535 nəfər həlak olub, 2418 nəfər müxtəlif dərəcəli xəsarətlər alıb. ANAMA belə hadisələrin qarşısının alınması məqsədilə əhali arasında mütəmadi qaydada maarifləndirmə tədbirləri təşkil edir. İndiyədək Təhsil Nazirliyi ilə birlikdə 26 şəhər və rayondakı 1200 məktəbdə 3635 müəllim üçün 195 təlim keçirilib. Hər il orta məktəblərdə 55 min şagird partlayıcı sursat təhlükəsinə dair maarifləndirmə dərslərinə cəlb olunur. Bu dərslər indiyədək 765 min şagirdi əhatə edib.

Sentyabrın 27-dən noyabrın 9-dək davam etmiş ikinci Qarabağ müharibəsi zamanı ərazilərimizin bir hissəsinin partlamamış hərbi sursatla çirkləndirildiyini vurğulayan ANAMA-nın rəhbəri bildirib ki, bu da çoxlu sayda mülki əhalinin ölümünə və yaralanmasına səbəb olar bilər. Bununla əlaqədar ANAMA-nın partlayıcı sursatların təhlükəsinə dair maarifləndirmə şöbəsinin mütəxəssisləri sentyabrın 27-dən etibarən əhalinin müxtəlif növ hərbi sursatlara dair həssaslığını artırmaq, onları mövcud təhlükə barədə xəbərdarlıq etmək məqsədilə müharibəyə məruz qalmış bütün bölgələrdə əhali arasında maarifləndirmə işləri həyata keçirir. Nəticədə indiyədək minlərlə sakin, o cümlədən uşaqlar müxtəlif növ bukletlər və digər təbliğat vasitələri ilə təmin edilib, fasiləsiz tədbirlər həyata keçirilib.

Partlayıcı sursatların təhlükəsinə dair maarifləndirmə (PSTM) proqramı çərçivəsində həyata keçirilən bütün fəaliyyət nəticəsində son illərdə bu qəbildən olan hadisələr nəticəsində zərər çəkənlərin sayı minimuma enib.