DÜNYA
ANARXİSTLƏRİN AVROPA KOMİSSİYASININ SƏDRİNƏ YENİ İL “HƏDİYYƏSİ”
Avropa Komissiyasının sədri Romano Prodi ömrü boyu Tanrıya duaçı olmalıdır. AZƏRTAC-ın İTAR-TASS agentliyindən aldığı xəbərə görə, dekabrın 27-də axşam Prodi ona poçtla İtaliyanın Bolonya şəhərindəki evinə göndərilən bağlamanı açarkən o, əlində partlamışdır. Bundan xəbər tutan polis bölmələri evi dərhal mühasirəyə almışlar.
Təhqiqat zamanı partlamış bağlamadakı kitabın səhifələrinin ortası ovuq şəklində kəsilərək, içinə asanlıqla alovlanan maddə doldurulduğu aşkar edilmişdir. Prodi kitabın üz qabığını açan kimi, bu maddə alovlanmışdır. Xoşbəxtlikdən, Prodi xəsarət almamışdır.
Xatırladaq ki, bir həftə əvvəl Romano Prodinin evinin yaxınlığına əldəqayırma iki bomba qoyulmuşdu. Burada zibil qablarının partladılmasına görə məsuliyyəti “Qeyri-formal anarxist federasiyası” adlı naməlum bir təşkilat öz üzərinə götürərək bildirmişdir ki, onun məqsədi Avropa Birliyini və şəxsən onun komissiyasının sədri Prodini məhv etməkdir.