ANKARADA “MAVİ AXIN”A DAİR TÜRKİYƏ-RUSİYA DANIŞIQLARI APARILIR

Rusiya təbii yanacağının “Mavi axın” qaz kəməri ilə Türkiyəyə nəqlinə dair fikir ayrılıqlarının aradan qaldırılması üçün avqustun 26-da Ankarada “Qazprom” Açıq Səhmdar Cəmiyyəti ilə “Botaş” şirkəti arasında ekspertlər səviyyəsində danışıqlar başlanmışdır.

AZƏRTAC-ın müxbirinin əldə etdiyi məlumata görə, Rusiya tərəfi Türkiyəyə göndərilən təbii qazın qiyməti məsələsində güzəştə getməyə hazırdır.

Xatırladaq ki, danışıqların əvvəlki mərhələsində “Qazprom” idarə heyəti sədrinin müavini Yuri Komarov bildirmişdi ki, Rusiya tərəfi Türkiyəyə qazı Avropa ölkələri üçün edilən güzəştlərlə satmağa hazırdır.

“Botaş” şirkəti Rusiyadan göndərilən qazın qiymətinin aşağı salınması, həcminin azaldılması ilə yanaşı, bu qazı Asiya və Şərqi Avropa ölkələrinə də ixrac etmək hüququna nail olmağa çalışır.

Ankara bu şərtləri irəli sürərək bəyan edir ki, qaz almaq mənbələrinə çoxsahəli xarakter vermək niyyətindədir. Türkiyə hökuməti öz energetika strategiyası çərçivəsində Bakı-Tbilisi-Ərzurum qaz kəməri ilə 2006-cı ildən başlayaraq Azərbaycan və Türkmənistandan da mavi yanacaq almağı planlaşdırır.