Yanvarın 17-də “Hyatt Recensi-Naxçıvan” hotelində 2002-2004-cü illərdə Yaponiyanın Azərbaycan Respublikasında fövqəladə və səlahiyyətli səfiri vəzifəsində işləmiş Toşiyuki Fucivaraya ANS şirkətlər qrupunun və Çingiz Mustafayev adına Fondun təsis etdiyi “2004-cü ilin adamı” mükafatının təqdim olunması mərasimi keçirilmişdir.

Mərasimi ANS şirkətlər qrupunun vitse-prezidenti Mirşahin Ağayev açaraq dedi ki, ənənəyə görə bu mükafata Azərbaycan xalqı və dövləti qarşısında görkəmli xidmətləri olan və ilk növbədə, əməlləri ilə vətənpərvərlik ideyaları aşılayan şəxslər layiq görülürlər. İndiyədək bu mükafat iki dəfə xalqımızın ümummilli lideri Heydər Əliyevə, habelə Bakı Şəhər İcra Hakimiyyətinin başçısı Hacıbala Abutalıbova təqdim edilmişdir. Fond və şirkətlər qrupu ilk dəfədir “peşəkarların vətəni olmur, peşəsi olur” prinsipinə əsaslanmışdır. Yəni öz işini yüksək səviyyədə yerinə yetirən peşəkar harada doğulmasından asılı olmayaraq, həm öz ölkəsinin, həm də çalışdığı dövlətin vətənpərvərinə çevrilir.

ANS şirkətlər qrupunun prezidenti Vahid Mustafayev bildirdi ki, 2002-2004-cü illərdə Yaponiyanın ölkəmizdəki səfiri olmuş Toşiyuki Fucivara özünün Azərbaycanpərvər xidməti ilə seçilmişdir. Biz “peşəkarların vətəni olmur, peşəsi olur” deyəndə cənab səfir kimi insanları nəzərdə tuturuq. Cəmi 2 il 4 ay Azərbaycanda səfir olmuş bu insan öz işi və əldə etdiyi sanballı nəticələrlə bizə sübut etdi ki, harada çalışmasından asılı olmayaraq, vəzifəsinin öhdəsindən dəqiq və vicdanla gələn şəxs təkcə mənsub olduğu dövlətin yox, həm də çalışdığı ölkənin ən vətənpərvər insanı ola bilər. O, Azərbaycanda çalışdığı müddətdə bizə başa saldı ki, Yaponiyada rəsmi olaraq güc strukturu deyəndə niyə məhz təhsil və mədəniyyət nazirlikləri nəzərdə tutulur. Cənab Fucivara Bakıda fəaliyyət göstərərkən peşəsinə və təmsil etdiyi dövlətin şərəfi naminə ölkəmizin qayğıları və problemləri ilə birbaşa maraqlandı, Azərbaycanın bir sıra mühüm dövlət strukturları ilə sıx təmasda oldu, respublikamızın maddi və mənəvi dirçəlişi üçün əlindən gələni etdi. Belə ki, onun fəaliyyəti Bakıda, bölgələrdə doğum və körpələr evlərinin tibbi avadanlıqla təchizatından dövlət simfonik orkestri üçün musiqi alətlərinin alınmasına, ərzaq məhsulları istehsalının artırılmasından “Ot kökləri və insan təhlükəsizliyi” layihəsinədək geniş bir sahəni əhatə edir.

Onun Bakıda, Xaçmazda, Əli Bayramlıda, Sumqayıtda, Şəkidə, Astara, İsmayıllı, Ağdam, Bərdə, Beyləqan, Gədəbəy, Saatlı, Zərdab, Yardımlı, Qax, Göyçay, Qusar, Lerik və Salyan rayonlarında onlarca məktəbin tikintisi, təmiri, istilik və su sistemlərinin yenidən qurulması, səhiyyə, mədəniyyət ocaqlarına qayğı, uşaq evlərinin təmiri, məcburi köçkün qəsəbələrinin elektrik təchizatının yaxşılaşdırılması sahəsində fəaliyyətini və digər xoşməramlı işlərini sadalamaq kifayətdir. O, səfir işlədiyi dövrdə Azərbaycanda 15 məktəb tikdirdi, 8 məktəbi isə yenidən təmir etdirdi və avadanlıqla təmin etdi. Bütün bu xidmətləri qiymətləndirən Milli Qəhrəman Çingiz Mustafayev Fondu və ANS şirkətlər qrupu Yaponiyanın ən böyük “azərbaycanlısını” – cənab Toşiyuki Fucivaranı “2004-cü ilin adamı” elan etmişdir.

Vahid Mustafayev cənab Toşiyuki Fucivaraya “2004-cü ilin adamı” elan edilməsi barədə xüsusi diplomu, 10 milyon manat pul mükafatını və qızıl saat təqdim etdi.

Sonra səfir Toşiyuki Fucivaranın Azərbaycanda gördüyü işlərdən bəhs edən videolent göstərildi.

Cənab Toşiyuki Fucivara onun fəaliyyətinin yüksək qiymətləndirilməsinə görə dərin minnətdarlığını bildirərək dedi ki, “2004-cü ilin adamı” adına layiq görülməyi özümə böyük şərəf bilir, həyatımın ən unudulmaz hadisəsi hesab edirəm. Bu adı almağım bir çoxlarının sayəsində mümkün olmuşdur. Çünki səfir işlədiyim vaxtlar Prezident başda olmaqla Azərbaycan hökumətinin və xalqının dəstəyini hər zaman hiss etmişəm. Bir mühüm məqam da odur ki, ANS kimi yayım şirkəti, digər telekanallar və başqa mətbuat orqanları məni Azərbaycan xalqının dostu kimi tanıtdılar, Azərbaycan və Yaponiyanın dostluğunu tərənnüm etdirdilər.

Diplomat bu mükafatı Yaponiya hökuməti və xalqının Azərbaycana bəslədiyi səmimi dostluq və tərəfdaşlıq münasibətinə, habelə səfirliyin işçilərinin zəhmətinə verilən yüksək qiymət kimi dəyərləndirdi. Həyatının 40 ilini diplomatiya sahəsində çalışdığını və keçən ilin oktyabrında Prezident İlham Əliyev tərəfindən ”Şöhrət” ordeni ilə təltif olunduğunu da xatırladan cənab Toşiyuki Fucivara dedi ki, ürəyim həmişə Azərbaycanladır. Bu ilin aprel ayından Yaponiya Xarici İşlər Nazirliyinin tədqiqatlar mərkəzi olan Yaponiya Beynəlxalq Məsələləri Araşdırmalar İnstitutunda icraçı direktor vəzifəsində çalışacağam və Azərbaycanla əlaqələrimi davam etdirəcəyəm. İnanıram ki, ölkələrimiz arasında mövcud olan əlaqələri indiki səfir Tadahiro Abe uğurla davam və inkişaf etdirəcək, xoş münasibətləri daha yüksək səviyyəyə çatdıracaqdır. Arzum budur ki, Azərbaycan daha yüksək inkişafa nail olsun, xalqın rifahı daha da artsın.

Səfir ona verilən 10 milyon manat pul mükafatını Azərbaycanın qaçqın və məcburi köçkünlərinə bağışladı.

X X X

Mərasimdə Milli Məclis sədrinin müavini Ziyafət Əsgərov, Prezidentin İcra Aparatının şöbə müdiri Əli Həsənov, deputatlar, nazirlər, xarici ölkələrin Bakıdakı səfirləri və digər rəsmi şəxslər iştirak edirdilər.