Bakı, 14 may, AZƏRTAC 

İyunun 21-dən 30-dək Minskdə II Avropa Oyunları keçiriləcək.

AZƏRTAC xəbər verir ki, Avropa Olimpiya Komitələrinin prezidenti (AOK) Yanes Kosyançiç TASS informasiya agentliyinə müsahibəsində Belarusun turnirə hazırlığını qiymətləndirib, Rusiyanın dünya idmanının inkişafında böyük rolunu qeyd edib, həmçinin yaxın gələcəkdə qış Avropa Oyunlarının keçirilməsi perspektivindən bəhs edib.

-Artıq Avropa Oyunları ənənəvi tədbirə çevrilir. Onların perspektivlərini necə görürsünüz?

-Bizim vəzifəmiz Avropa Oyunlarını Olimpiadadan sonra ikinci əhəmiyyətli multiidman tədbirinə çevirməkdir. Biz artıq bu ilin iyununda Minskdə keçiriləcək İkinci Avropa Oyunları ərəfəsindəyik. Oyunlar ənənəvi hal alacaq və yay Olimpiadasına bir il qalmış hər dörd ildən bir keçiriləcək.

Düşünürük ki, Avropa Oyunları daha da güclənir. Avropa dünyada ən güclü idman qitəsidir. Avropada dünya əhalisinin 10 faizə yaxınının yaşamasına baxmayaraq, yay idman növləri üzrə medalların təxminən 50 faizini avropalı idmançılar qazanır, qış növlərində isə bu rəqəm 70 faizə çatır. Bu faktlar bizim nə qədər güclü olduğumuzu göstərir və gələcəkdə də bu səviyyədə qalmaq istəyirik.

-Avropa Oyunları AOK-a gəlir gətirirmi?

-Oyunlardan əldə etdiyimiz gəlirin hamısını onların inkişafına sərf edirik. Lakin başa düşmək lazımdır ki, AOK qeyri-kommersiya təşkilatıdır. Bizim əsas məqsədimiz gəlir əldə etmək deyil, idmanı inkişaf etdirməkdir.

-Minskin qarşıdakı yarışlara hazırlıq səviyyəsi sizi qane edirmi?

-Biz belaruslu dostlarımızın işindən və turnirin təşkilat komitəsindən çox razıyıq. Belarus yarışların təşkilində zəngin təcrübəyə malikdir: onlar xokkey və həndbol üzrə bir neçə çempionata ev sahibliyi ediblər. Bu səbəbdən biz cari ildə əla Avropa Oyunlarının keçiriləcəyini gözləyirik.

İnkişaf etmiş iqtisadi, mədəni və idman infrastrukturuna malik olan Belarus bu Oyunları keçirməyə layiqdir. Yarışları işıqlandırmaq üçün Minskə minə yaxın jurnalist gələcək və onlar sonra öz materiallarında bütün dünyaya Belarus xalqının qonaqpərvərlindən bəhs edəcəklər. Əminəm ki, Oyunlardan sonra Belarusun imici daha da yaxşılaşacaq və bu ölkə Avropa həyatına əla inteqrasiya edəcək.

Biz Oyunların başlanmasını gözləyirik, bu yarışların uğurla keçirilməsinin qarşısında heç bir maneə görmürük. Qalan bəzi təşkilati məsələlər də ən yaxın vaxtda öz həllini tapacaq və hazırda heç bir problem yoxdur.

-2023-cü il Avropa Oyunları harada keçiriləcək?

-Namizədlərdən müraciətlərin qəbul edilməsinin açıq prosedurası var. Yarışlara ev sahibliyi etmək istəyən bir neçə şəhər mövcuddur. Minsk Oyunları ərəfəsində Avropa Olimpiya Komitələri Baş Assambleyasının növbədənkənar iclası keçiriləcək və orada gələn Oyunlara kimin ev sahibliyi edəcəyi müəyyənləşəcək.

-2023-cü il Avropa Oyunlarını keçirməyə iddiaçı olan ölkələr hansılardır?

-Müraciətlərin qəbulu prosedurası açıq olduğu üçün mən hələlik namizədlərin adlarını açıqlamaq istəmirəm, lakin Oyunlara xüsusi maraq göstərən iki şəhər var (Kazan və Katovitse – TASS-ın qeydi). Səsvermə qapalı keçiriləcək və 50 Olimpiya komitəsi qarşısında namizədlərin adlarını açıqlamaq və kiməsə üstünlük vermək düzgün olmazdı.

-Minskdəki yarışlarda Rusiya yüngül atletləri də çıxış edəcəklər. Onların qələbəni öz ölkələrinin bayrağı altında qeyd etmək imkanı olacaqmı?

- Əlbəttə, rusiyalılar qələbəni öz bayraqları altında bayram edə bilərlər, bizim bununla bağlı heç bir şübhəmiz olmayıb. Mən həmişə müxtəlif beynəlxalq təşkilatların təşəbbüslərinə tənqidi yanaşmışam. Onlar hesab edirlər ki, dopinq əleyhinə pozuntulara görə hər hansı bir ölkəni, bu, ABŞ, Rusiya, Çin və ya hər hansı digər dövlət də ola bilər, elə cəzalandırmaq olar ki, gənc idmançılar öz ölkələri üçün qürur hissi keçirə bilməsinlər. Hər bir ölkənin qazandığı uğurları özünün bayrağı və himni altında bayram etmək hüququ var.

-Rusiyanın 2019-cu il Avropa Oyunlarına iddia etməsi, lakin bunun yüngül atletika üzrə milli federasiyada dopinq problemləri üzündən baş tutmadığı doğrudurmu?

— Bizim aramızda müxtəlif danışıqlar olub, lakin həmin vaxt Rusiyanın namizəd olacağını düşünmürdük.

-Sizin planınızda qış Avropa Oyunlarının keçirilməsi məsələsi varmı?

-Müəyyən təkliflərin olduğunu gizlətmirəm. Bu, mümkündür və bir neçə Avropa ölkələri var ki, onlar bir dəfə də olsun qış Olimpiadasında iştirak etməyiblər. Lakin əminəm ki, yay Avropa Oyunlarının inkişafı nəticəsində qış Avropa Oyunlarının keçirilməsinin zamanı da gələcək.

-1908-ci ildə Londonda keçirilmiş yay Olimpiadasında qış Olimpiya növü olan fiqurlu konkisürmə də proqrama daxil idi. Bəlkə yaxın perspektivdə Avropa Oyunlarının proqramına örtülü zallarda keçirilən qış idman növləri də daxil ediləcək?

-Bu məsələ də müzakirə olunur, lakin bizim mövqeyimiz ondan ibarətdir ki, qar və ya buzla əlaqəli olan idman növləri yalnız qış Olimpiadasında, yaxud əgər keçirilərsə, qış Avropa Oyunlarında olmalıdır. Yay idman növləri isə yay Oyunlarına aiddir. Biz Olimpiadanın proqramına daxil edilməyən yeni yay idman növlərini əlavə etməyə çalışırıq və hesab edirik ki, təkcə qədim standartları mütəmadi olaraq təkrar etməli deyil, gənc nəslin maraqlarına uyğun hərəkət etməliyik.

-AOK və Rusiya Olimpiya Komitəsi arasında münasibətlər necədir?

-Bizim münasibətlərimiz əladır, mən tez- tez dostum və həmkarım Stanislav Pozdnaykov ilə ünsiyyətdə oluram. Rusiya Olimpiya Komitəsinin dünyada həmişə böyük nüfuzu olub. Bu da tamamilə təbiidir, çünki Rusiya qazanılan Olimpiya medallarının sayına görə dünyada ikinci yeri tutur. Mən AOK və Rusiya Olimpiya Komitəsi arasında yüksək səviyyədə əməkdaşlığa maneə olan heç bir səbəb görmürəm.

-Rusiyanın Avropa idmanı üçün əhəmiyyəti nədir?

-Rusiya Avropanın ən güclü ölkələrindən biridir və belə də qalacaq. Bu səbəbdən biz onunla müxtəlif komponentlər, o cümlədən Avropa idmanının gələcək inkişafını müəyyən edən təşkilatı və peşəkar məsələlər üzrə əməkdaşlığa ehtiyac duyuruq.

Tarixdə ilk Avropa Oyunları 2015-ci il iyunun 12-dən 28-dək Azərbaycanın paytaxtında keçirilib.