İQTİSADİYYAT


ARDDA-nın əməkdaşlarına gəmiçiliyinin 160 illik yubiley medalları təqdim olunub

Bakı, 30 noyabr, AZƏRTAC

“Azərbaycan Xəzər Dəniz Gəmiçiliyinin 160 illiyi (1858-2018)” Azərbaycan Respublikasının yubiley medalı ilə təltif edilən Azərbaycan Respublikasının Dövlət Dəniz Agentliyinin əməkdaşlarına medalların təqdimetmə mərasimi keçirilib.

Tədbirdə çıxış edən agentliyin direktoru Qüdrət Qurbanov bildirib ki, Azərbaycan Respublikasının Prezidenti İlham Əliyevin Sərəncamı ilə 2018–ci il “Azərbaycan Xalq Cümhuriyyəti İli” elan edilib. Xəzər Dəniz Gəmiçiliyinin 160 illiyinin məhz 2018–ci ilə təsadüf etməsini əlamətdar hadisə kimi dəyərləndirən Dövlət Dəniz Agentliyinin direktoru Xəzər Dəniz Gəmiçiliyi tərəfindən yubileylə əlaqədar bir sıra yaddaqalan, möhtəşəm tədbirlərin həyata keçirildiyini deyib.

Azərbaycan Respublikasının Dövlət Dəniz Agentliyindən AZƏRTAC-a bildirilib ki, Q.Qurbanov Azərbaycan Xəzər Dəniz Gəmiçiliyinin 160 illik yubileyi münasibətilə Azərbaycan Respublikası Prezidentinin dəniz nəqliyyatı işçilərinə “Əməkdar mühəndis” fəxri adının verilməsi, dəniz nəqliyyatı işçilərinin “Əmək ordeni”, “Tərəqqi medalı”, “Gəmiçilik sahəsində xidmətlərə görə” medalı ilə təltif edilməsi haqqında imzaladığı Sərəncamları dənizçilərə olan diqqət və qayğı kimi dəyərləndirib.

“Azərbaycan Xəzər Dəniz Gəmiçiliyi” QSC-nin (ASCO) sədri Rauf Vəliyev bildirib ki, istər ümummilli lider Heydər Əliyevin ölkənin siyasi rəhbərliyində olduğu dövrlərdə, istərsə də Prezident İlham Əliyevin hakimiyyəti illərində gəmiçilik sahəsinin inkişafına daim qayğı göstərilib. Yükdaşımalarda, neft-qaz layihələrində iştirak edən müasir tipli gəmilərin alınması, uğurla reallaşan gəmilərin tikintisi, xarici sularda yeni gəmilərin istismara verilməsi, dənizçilərin sosial rifahının daha da yaxşılaşdırılması, peşəkar dənizçi kadrlarının hazırlanması istiqamətində görülən işlər bunun bariz nümunəsidir.

Bundan başqa, R.Vəliyev xüsusi vurğulayıb ki, 160 illik yubiley ərəfəsində gəmiçilik sahəsində fəaliyyətə görə Milli Məclisin təsis etdiyi, Azərbaycan Respublikasının Prezidentin təsdiqlədiyi iki yeni – “Gəmiçilik sahəsində xidmətlərə görə” Azərbaycan Respublikasının medalı və “Azərbaycan Xəzər Dəniz Gəmiçiliyinin 160 illiyi (1858-2018)” Azərbaycan Respublikasının yubiley medalı da dənizçilərə diqqətin əyani sübutudur.

Son beşillik fəaliyyətə nəzər salan R.Vəliyev bu müddətdə görülən işlər nəticəsində qarşıya qoyulan hədəflərə nail olunduğunu bildirib. Sədr bundan sonrakı hədəflərə çatmaq üçün də dənizçilərin əzmkarlıqla çalışacaqlarına əminliyini ifadə edib.

Daha sonra gəmiçiliyin 160 illik yubileyi münasibətilə ASCO-nun sədri R.Vəliyevin sərəncamına əsasən yubiley medalı ilə təltif olunan dənizçilərə medallar təqdim olunub.

Qeyd edək ki, Azərbaycan Xəzər Dəniz Gəmiçiliyinin 160 illik yubileyi münasibətilə Dövlət Dəniz Agentliyinin direktoru Q.Qurbanovun əmrinə əsasən dəniz nəqliyyatı sahəsində çalışan mütəxəssislər “Donanmanın Fəxri İşçisi” adı və döş nişanı ilə təltif ediliblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.