SİYASƏT


AŞPA Azərbaycana münasibətdə daim qərəzli olub, ölkəmizə qarşı qarayaxma kampaniyası aparıb

Bakı, 6 iyun, AZƏRTAC

Avropa Şurasının Parlament Assambleyası ən qərəzli və ən qeyri-obyektiv qurumlardandır, insan hüquqlarının qorunmasını öz fəaliyyətinin prioritet istiqaməti hesab etməsinə baxmayaraq, heç də bu prinsiplərin əsas meyar olduğunu nümayiş etdirə bilmir. Xüsusilə ayrı–ayrı ölkələrə münasibətdə ikili yanaşmalar sərgiləyərək subyektiv qərarlar qəbul edir.

Bu fikirləri AZƏRTAC-a açıqlamasında Milli Məclisin deputatı, "Yeni Azərbaycan" qəzetinin baş redaktoru Hikmət Babaoğlu bildirib.

Deputat deyib: “Bu qərarlar bəzən o dərəcədə qərəzli olur ki, bunu yalnız qarayaxma hesab etmək olar. Təəssüf ki, Azərbaycana münasibətdə AŞPA daim qərəzli olub. Ölkəmizdə baş verən demokratik - siyasi proseslərə həmişə qara eynəklə baxıb. Hətta bir çox hallarda işğalçı Ermənistanı dəstəkləməklə demiokratik prinsiplərə və beynəlxalq hüquqa hörmətsizlik edib. Halbuki, beynəlxalq universal hüquq və ondan doğan insan hüquq və azadlıqlarının qorunması Avropa Şurasının fəaliyyətinin əsas qayəsini təşkil etməlidir. Əgər belə olmasaydı, bu il martın 31-də qondarma Qarabağ rejiminin keçirdiyi saxta “seçkilərə” özündə cəsarət tapıb ədalətli qiymət verməyi bacarardı. Ancaq AŞPA bunu etmədi. Çünki daim ermənipərəst mövqedən, islamafob mövqedən çıxış edir”.

H.Babaoğlu qeyd edib ki, Avropa İttifaqı, Qoşulmama Hərəkatı, İslam Əməkdaşlıq Təşkilatı, kimi beynəlxalq qurumlar, ATƏT-in Minsk qrupunun həmsədrləri olan ABŞ, Fransa, Rusiya kimi böyük dövlətlər qondarma rejimin saxta “seçki” şousunu tanımadıqlarını bəyan etsələr də AŞPA bu barədə əsla bir mövqe bildirmədi. Ona görə də Azərbaycan ictimai rəyində bu təşkilatın heç bir nüfuzu yoxdur. Tam əksinə, onun qərəzli və ölkəmizə qarşı qarayaxma kampaniyası aparan bir təşkilat olması rəyi mövcuddur.

"Bu da əlbəttə səbəbsiz deyil. Çünki hamı açıq şəkildə görür ki, AŞPA içərimizdə olan “5–ci kalona” dəstək verir. Bütün hesabatlarını onların verdiyi yalan məlumatlar əsasında hazırlayır. Azərbaycanın demokratik və hüquqi dövlət imicinə zərbə vurur. Bununla da birbaşa və dolayısı ilə işğalçı Ermənistana beynəlxalq ictimai rəydə dəstək vermiş olur. Halbuki dünyada insan hüquq və azadlıqlarının ən çox pozulduğu, parlamentin gülləbaran edildiyi, terrorun dövlət siyasəti halına gətirildiyi ölkə Azərbaycan torpaqlarını işğal edən, bir milyondan çox insanın qaçqın və məcburi köçkün halına salaraq onların təməl hüquqlarını pozan Ermənistandır" , - deyə Milli Məclisin deputatı əlavə edib.

Deputat qeyd edib ki, bu ölkə dövlət deyil, yaxşı təşkilatlanmış terror təşkilatıdır, neofaşizimin qalasıdır. Ancaq Avropa Şurası bütün bunları görmür. Azərbaycana gəldikdə isə heç bir əsası olmayan qərəzli qərarlar qəbul edir, insan hüquqlarının pozulduğunu iddia edir. Ona görə də AŞPA-nın ölkəmizlə bağlı qəbul etdiyi hər hansı qərar qərəzli və yalan olduğu üçün adi kağız parçası qədər dəyərsizidir. Azərbaycan Prezidenti İlham Əliyev Tərtər rayonuna səfəri zamanı söylədiyi nitqində bir daha diqqəti AŞPA-nın Azərbaycana qarşı qərəzli mövqeyinə çəkməklə bu təşkilatın yarıtmaz fəaliyyətinə obyektiv qiymət vermiş oldu. Bu, bir daha kimin-kim olmasını, milli maraqlarımıza qarşı kimin qərəzli mövqe tutduğunu dərk etməmiz baxımından olduqca vacib idi.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.