SİYASƏT


AŞPA-nın yaz sessiyası işə başlayıb

Paris, 8 aprel, AZƏRTAC

Aprelin 8-də Strasburqda Avropa Şurası Parlament Assambleyasının (AŞPA) yaz sessiyası işə başlayıb.

AZƏRTAC xəbər verir ki, Milli Məclisin beynəlxalq münasibətlər və parlamentlərarası əlaqələr komitəsinin sədri, AŞPA-da daimi nümayəndə heyətimizin rəhbəri Səməd Seyidovun başçılıq etdiyi deputat qrupu sessiyada iştirak edir.

Sessiyada Assambleyanın Bürosunun və Daimi Komitəsinin hesabatları, eləcə də Moldovada keçirilmiş parlament seçkilərinin nəticələri dinləniləcək. İdmanda nifrətə qızışdırıcı söz və aktların qarşısının alınması və bu istiqamətdə siyasi liderlərin rolu, Avropa Şurasında büdcə böhranı, BMT ilə əməkdaşlığın möhkəmləndirilməsi və davamlı inkişaf məqsədlərinin həyata keçirilməsinə dair müzakirələr aparılacaq.

Avropa Şurası Nazirlər Komitəsinin sədri qismində Finlandiyanın xarici işlər naziri Timo Soininin çıxışı, Avropa Şurasının insan hüquqları üzrə komissarı Dunya Miyatoviçin illik hesabatı dinləniləcək. Mərakeş parlamenti ilə əməkdaşlıq, cinayətkarlıq, korrupsiya və çirkli pulların yuyulmasına dair beynəlxalq mübarizədə yeni çağırışlar, sosial media, ictimai mövzular və insan hüquqları üçün təhdidlər kimi mövzularla bağlı fikir mübadiləsi aparılacaq.

Sessiya çərçivəsində aprelin 9-da Azərbaycanın AŞPA-dakı nümayəndə heyətinin və AŞPA yanında daimi nümayəndəliyimizin təşkilatçılığı ilə “Azərbaycanın işğal olunmuş ərazilərində və onlara münasibətdə qanunsuz fəaliyyətlər: Avropa Şurası qarşısında götürülmüş öhdəliklər baxımından nəticələr” mövzusunda tədbir keçiriləcək.

Milli Məclisin deputatları gündəlikdəki məsələlərlə bağlı çıxışlar edəcək, müzakirələrə qoşularaq fikirlərini bildirəcəklər.

Şəhla Ağalarova

AZƏRTAC-ın xüsusi müxbiri

Strasburq

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.