AZƏRTAC-ın xüsusi müxbiri xəbər verir ki, Aşqabad şəhərində Müstəqil Dövlətlər Birliyi ölkələrinin və Baltikyanı ölkələrin Dəmir Yolu Nəqliyyatı Şurasının 42-ci iclası başa çatmışdır.

Finlandiyanın dəmir yolu rəhbərlərinin də iştirak etdiyi tədbirdə Azərbaycan Dövlət Dəmir Yolunun rəisi Arif Əsgərovun rəhbərliyi ilə nümayəndə heyəti təmsil etmişdir.

İclasda MDB dövlətləri dəmir yollarının fəaliyyəti ilə bağlı aktual məsələlər müzakirə olunmuş, 10 ay ərzində görülən işlərə yekun vurulmuş, qatarların hərəkət cədvəlində, yük qatarlarının və konteynerli vaqonların formalaşdırılması planında zəruri dəyişikliklər, dəmir yolu idarələri arasında imzalanmış qarşılıqlı hesablaşmalar haqqında sazişdə və bir sıra normativ sənədlərə düzəlişlər və əlavələr edilmişdir. Dəmir yolu sistemindəki problemlərin aradan qaldırılması ilə bağlı tövsiyələr verilmiş, qarşıdakı iki il üçün əməkdaşlığın inkişafı planı təsdiq olunmuşdur.

Türkmənistan Prezidenti Saparmurad Niyazov iclas iştirakçılarını qəbul etmişdir.