SİYASƏT


ATƏT PA-nın "İpək yoluna dəstək qrupu"nun iclasında mühüm qərarlar qəbul edilib VİDEO

Berlin, 8 iyul, AZƏRTAC

İyulun 8-də Avropada Təhlükəsizlik və Əməkdaşlıq Təşkilatı Parlament Assambleyasının (ATƏT PA) 27-ci illik sessiyası çərçivəsində "İpək yoluna dəstək qrupu"nun (Silk Road Support Group — SRSP) iclası keçirilib.

AZƏRTAC xəbər verir ki, bu qrupda sədrlik edən, ATƏT PA-nın vitse-prezidenti, Milli Məclisin deputatı Azay Quliyev giriş nitqində toplaşanları qrupun yaradılmasının bir ilinin tamam olması münasibətilə təbik edib. "Bir il əvvəl Minskdə 17 dövlətdən olan deputatlar "İpək yoluna dəstək qrupu"nu yaratdı, bu gün isə sayımız 22-dir", - deyə məmnunluqla bildirən Azay Quliyev məlumat verib ki, gündəlikdə, həmçinin 23-cü namizədin – Fransanın SRSP-ə qəbul edilməsi ərizəsinə baxılması dayanır.

Qara Dəniz İqtisadi Əməkdaşlıq Təşkilatı Parlament Assambleyasının (QDİƏT PA) baş katibi Asəf Hacıyev iştirakçılara QDİƏT PA-ya ATƏT PA-da müşahidəçi statusu verildiyini bildirib. O, Böyük İpək yolunun bərpasında Qara dəniz iqtisadi regionunun və əksinə, bu marşrutun Qara dəniz regionunun gələcək iqtisadi inkişafında mühüm rolunu vurğulayıb.

Qrup təşkilati məsələlərə baxaraq, Fransanı öz sıralarına qəbul edib, habelə iki sədr müavini seçib - bunlar Avstriya deputatı Roman Hayder və ATƏT PA-nın birinci komitəsinin sədri, İsveçrədən olan deputat Filippo Lombardidir.

Çıxış edənlər İpək yolunun təkcə coğrafi baxımdan əhatə etdiyi dövlətlər arasında iqtisadi əlaqələrin inkişafında deyil, həm də bütün ATƏT məkanında sülh və etimadın möhkəmlənməsində əvəzolunmaz əhəmiyyətini qeyd ediblər. "Bu, sadəcə dəmir yolu, sadəcə konteynerlər və yüklər deyildir, ATƏT-in əsasını təşkil edən məqsədləri – sülhü və təhlükəsizliyi möhkəmləndirən amildir", - deyə ATƏT PA-nın prezidenti Georgi Sereteli bildirib.

İştirakçılar qrupun sədrinin bu təşkilatın fəaliyyəti barədə məruzəsini dinləyib və bəyəniblər.

ATƏT PA-da Belarus nümayəndə heyətinin rəhbəri Boleslav Pirştuk SRSP-nin növbəti konfransının 2019-cu ilin yazında Minskdə keçiriləcəyini elan edib. Minskdən sonrakı deputat qrupunun növbəti konfransına İsveçrə ev sahibliyi edəcək.

 

Vüqar Seyidov

AZƏRTAC-ın xüsusi müxbiri

Berlin

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.