ELM VƏ TƏHSİL
ATMU-da beynəlxalq onlayn konfrans: Pandemiya dövründə keyfiyyətli tədrisin təşkili problemləri
Bakı, 6 may, AZƏRTAC
Azərbaycan Turizm və Menecment Universitetində (ATMU) ümummilli lider Heydər Əliyevin anadan olmasının 98-ci ildönümünə həsr edilmiş “Pandemiya dövründə keyfiyyətli tədrisin təşkili problemləri” mövzusunda beynəlxalq onlayn elmi-praktik konfrans keçirilib.
Bu barədə AZƏRTAC-a universitetdən məlumat verilib. Bildirilib ki, konfransı ATMU-nun rektoru İlham Mədətov açaraq tədbirdə ölkəmizin və xarici dövlətlərin müxtəlif ali təhsil müəssisələrinin nümayəndələrinin iştirak etdiyini diqqətə çatdırıb. Rektor Azərbaycan təhsilinin mühüm inkişaf mərhələlərinin ümummilli lider Heydər Əliyevin adı və fəaliyyəti ilə bağlı olduğunu bildirib. Ulu Öndərin təhsil sahəsinə diqqət və qayğısı barədə konfrans iştirakçılarına məlumat verib.
Qeyd olunub ki, pandemiya dövründə ali təhsildə keyfiyyətli tədrisin təşkili təcrübəsi, təhsil və təlim bacarıqlarının dəyişən sənayenin tələblərinə uyğunlaşdırılması yeni dəyişikliklərə yol açdı. Bu dəyişikliklər özü ilə birlikdə həm fürsətlər, həm də bir sıra məhdudiyyətlər gətirdi. Günümüzün ən aktual problemi olan koronavirus pandemiyası dünyada mövcud olan bütün sahələrə ciddi təsir etdiyi kimi təhsil sənayesi üçün də arzuolunmaz problemlər yaradıb. Dünyanın bir çox ölkələrində qəbul edilmiş sərt karantin qaydaları səbəbindən təhsilin ali məktəblər daxilində tədrisi qeyri-mümkün olub. Yaranmış vəziyyətlə bağlı ali məktəblər məsafədən (distant) təhsilin tətbiqi yolunu seçərək, təhsilin davamlılığının təmin olunmasını prioritet vəzifə kimi həyata keçirirlər.
İlham Mədətov qeyd edib ki, pandemiya dövründə karantin rejiminin ilk günlərindən ATMU-da ali məktəb səviyyəsində tədrisin məsafədən geniş tətbiqinə başlanılıb. Heç şübhəsiz ki, koronavirus infeksiyası səbəbindən ölkəmizdə təlim və tədris prosesinin dayandırılması bütün ali təhsil müəssisələri kimi ATMU üçün də ənənəvi olmayan fəaliyyət mexanizminin tətbiqini zəruri edib. Ali məktəblərin fəaliyyətinin əsasını tədris təşkil etdiyindən karantin müddətində əsas hədəf tədris prosesində davamlılığın təmin edilməsi olub.
Konfransın plenar iclasında ATMU-nun tədris işləri üzrə prorektoru, professor Zaur Bağırov “Pandemiya dövründə tədrisin distant şəkildə aparılmasının xüsusiyyətləri” mövzusunda çıxış edib. O, pandemiyanın ənənəvi tədris sistemlərində köklü dəyişikliklər etdiyini və bu məqamda məsafəli tədrisin texnologiyanın təsiri nəticəsində geniş şaxələndiyini vurğulayıb.
Sonra Rusiyanın Povoljsk Dövlət Texnologiya Universitetinin dosenti Svetlana Vasina “Rusiya turizmi pandemiya dövründə”, Daşkənd Dövlət İqtisad Universitetinin professoru Nazar Hakimov “Pandemiya şəraitində yüksək ixtisaslı kadrların hazırlanmasında ikinci ali təhsilin rolu” mövzularında məruzələrlə çıxış ediblər.
Konfrans işini “Pandemiya dövründə ali təhsilin keyfiyyətinin qiymətləndirilməsi: problemlər və yeni yanaşmalar”, “Turizm sənayesində kadr hazırlığı və iqtisadiyyatın turizm təhsilinə təsiri” bölmələri üzrə davam etdirib.