CƏMİYYƏT


ATU-nun Tədris Terapevtik Klinikasında 86 nəfər şəhid ailə üzvü və qaziyə pulsuz tibbi xidmət göstərilib

Bakı, 21 yanvar, AZƏRTAC

Azərbaycan Tibb Universitetinin Tədris Terapevtik Klinikasında şəhid ailələri, qazilər və qazi ailələri üçün ödənişsiz müayinə aksiyası təşkil olunub. Aksiyada həmin kateqoriyadan olan vətəndaşlar həkim müayinəsi ilə yanaşı, qanın ümumi analizi+ECS, sidiyin ümumi analizi, qanda şəkər, döş qəfəsinin rentgenoskopiyası, EKQ, USM, o cümlədən laborator və instrumental müayinələrdən tam ödənişsiz keçiblər.

ATU-nun mətbuat xidmətindən AZƏRTAC-a verilən məlumata görə, xəstə yaxını Orxan Mehdiyev bildirib ki, anası Səidə Mehdiyevanı tanınmış nevropatoloq Dilarə Xəlilovanın qəbuluna gətirib. Orxanın sözlərinə görə, qardaşı Vətən müharibəsində şəhid olduqdan sonra anası ağır dərəcəli psixoloji travma alıb və hazırda böyük sıxıntılar içində yaşayır. Bir ildən çoxdur ki, anası bir sıra həkimlər tərəfindən müalicə olunsa da, yenə kəskin baş ağrısından və davamlı ürək döyüntüsündən əziyyət çəkir. Ona görə də D.Xəlilovaya müraciət etmək qərarına gəliblər.

Növbəti müsahibimiz qazi Rövşən Verdiyev isə böyrəklərini müayinə etdirmək üçün gəldiyini deyib. Ödənişsiz aksiyanın təşkilindən razılığını ifadə edən qazi bildirib ki, indiyədək səhhətində ciddi problem olmayıb: “Koronavirusa qarşı üç doza peyvənd qəbul etmişəm, bu gün də şəkərimi, təzyiqimi yoxlatdırmaq üçün ümumi analiz verəcəm”.

Qəbul şöbəsindən öyrənirik ki, aksiyaya gələnlərin bir çoxunun üz tutduğu həkimlərdən biri də klinikanın Pulmonologiya və allerqologiya şöbəsinin terapevt-kardioloqu, dosent Arzu Bəydəmirovadır. Həmin şöbədə qazi atası Mahmud Ağayevlə həmsöhbət oluruq. Bildirir ki, oğlu Qəzənfər Ağayev İkinci Qarabağ müharibəsi qəhrəmanıdır və hazırda onkoloji xəstəlikdən əziyyət çəkdiyi üçün “YAŞAT” Fondu tərəfindən qardaş Türkiyəyə müalicəyə göndərilib. Özü isə təzyiq xəstəsidir və kardioloji müayinə almaq üçün klinikada təşkil olunmuş aksiyaya qatılıb.

Bundan başqa, həkimin qəbulunda növbə gözləyən şəhid ailə üzvləri Zeynəbxatun Allahverdiyeva, Fərqanə Əzizova, Kinayət İsgəndərova və daha bir şəhidimizin həyat yoldaşı Nabat Məmmədovanın səhhəti ilə maraqlanırıq. Onlar qeyd edirlər ki, aksiya haqda sosial şəbəkələrdə məlumat alıblar və Arzu xanımı peşəkar həkim kimi tanıdıqları üçün fürsətdən istifadə etmək qərarına gəliblər.

A.Bəydəmirova özü isə ona pənah gətirənlərin şikayətini dinləyir, müayinələr aparır və məsləhətlərini verirdi. İşinin çoxluğuna baxmayaraq bizimlə də ayaqüstü söhbət etməyə imkan tapan həkim məlumat verdi ki, bununla üçüncü dəfədir ki belə xeyriyyə aksiyasında iştirak edir. Ona müraciət edənlərin əksəriyyəti əsəb gərginliyindən, yüksək təzyiqdən və psixoloji cəhətdən əziyyət çəkənlərdir. Həkimin sözlərinə görə, həmin kateqoriyadan olan xəstələrə davamlı olaraq tibbi yardım göstərmək lazımdır. Bunun üçün də onları hər ay həkim müayinəsindən keçirmək və daim diqqətdə saxlamaq lazımdır.

Daha sonra Nevrologiya şöbəsinə baş çəkirik. Burada hərbi geyimdə olan bir qazi diqqətimizi çəkir. Məlum olur ki, o, Vətən müharibəsinin iştirakçısı Mənsum İsgəndərovdur. O, Nevrologiya kafedrasının müdiri, professor Aytən Mahalovanın qəbuluna gəlib. Mənsum deyir ki, 3 uşağı və həyat yoldaşını da müayinələrə gətirib. Klinikada yaradılan şəraitdən, onlara göstərilən diqqət və qayğıdan məmnun olduğunu ifadə edən M.İsgəndərov, hər zaman dövlətin dəstəyini hiss etdiyini bildirib və bu cür aksiyaları dövlətimizin onlara göstərdiyi münasibətin bariz nümunəsi kimi qiymətləndirib.

Xeyriyyə aksiyasının məqsədi və əhəmiyyəti barədə fikirlərini bizimlə bölüşən Terapevtik Klinikanın direktoru, professor Surxay Musayev bildirib ki, 2020-ci ilin noyabrın 8-i Azərbaycanın tarixinə ən parlaq səhifə kimi daxil olub: “Şanlı Ordumuzun işğal altında olan torpaqlarımızı düşmən tapdağından azad etmək uğrunda apardığı Vətən müharibəsi Azərbaycanın qələbəsi ilə sona çatdı. Düşməni kapitulyasiya aktına imza atmağa məcbur etdik. Bununla da xalqımızın 30 illik torpaq həsrətinə son qoyuldu. Azərbaycanın ərazi bütövlüyü, suverenliyi bərpa edildi, ədalət öz yerini tapdı. Hazırda doğma Qarabağımızda geniş miqyasda bərpa-quruculuq işləri aparılır. İnsanların öz doğma yurd-yuvalarına qayıtması üçün nəhəng layihələr həyata keçirilir. Otuz ilə yaxın qaçqın və məcburi köçkün həyatı yaşayan insanlar yaxın vaxtlarda tarixi torpaqlarımıza qayıdacaq və orada həyat yenidən canlanacaq. Bütün bunlar bizim Qarabağ savaşında əldə etdiyimiz böyük qələbənin nəticəsidir. Ali Baş Komandan İlham Əliyevin qətiyyəti, siyasi iradəsi, eləcə də Vətən uğrunda döyüşən, canından keçən şəhid və qazilərimiz sayəsində hər birimiz müasir Azərbaycan tarixinin ən qürurlu, fəxarətli günlərini yaşayırıq.

Sözsüz ki, Vətən müharibəsində qazandığımız qələbə tibb işçiləri üçün də böyük fəxrdir. Bu əlamətdar günlərdə, eynilə müharibə günlərində olduğu kimi, tibb işçiləri də xalqımızın yanındadır, qələbə sevincinə şərikdir. Biz bu böyük zəfərə görə şəhid və qazilərimizə, o cümlədən onların ailə üzvlərinə borcluyuq. Həyata keçirdiyimiz aksiya da məhz bundan irəli gəlir. Səhhətində problem olan, müayinəyə ehtiyac duyan şəhid ailələrinə və qazilərimizə dəstək olmaq üçün belə aksiyanı təşkil etdik. Aksiya çərçivəsində Bakı sakinləri ilə yanaşı, digər regionlarda yaşayan Vətən müharibəsi şəhidlərinin ailələri, eləcə də qazilərimiz gün ərzində bir çox müayinələrdən ödənişsiz bəhrələndi. Onların müayinəsini həyata keçirmək və müalicə təyin etmək bizim müqəddəs vətəndaşlıq borcumuzdur”.

Klinikanın baş həkimi Fəridə Hacıyevanın verdiyi məlumata əsasən, aksiya çərçivəsində həmin kateqoriyadan olan 86 nəfərə tibbi xidmət göstərilib. Yuxarıda adlarını çəkdiyimiz həkimlərlə yanaşı, digər tibb işçiləri - Vəfa Abbasova, Aytən Məmmədzadə, Azadə Ələkbərova, Könül Abbasəliyeva, Səbinə Məşədiyeva, Aytən Məmmədbəyli, Qoşqar İsmayılov, Filurə Babayeva, Sona Qəhrəmanova, Mətanət Pənahova və Mehriban Səmədova, o cümlədən Pulmonologiya və allerqologiya şöbəsinin rezidenti Nigar Namazlı laborator və instrumental müayinələrdə fəal iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.