Avropa Şurasının baş katibi Valter Şvimmer aprelin 7-də Milli Məclisdə AŞ PA-da Azərbaycanı təmsil edən parlament nümayəndə heyətinin üzvləri ilə görüşmüşdür.

AZƏRTAC-ın müxbiri xəbər verir ki, Milli Məclisin deputatı, nümayəndə heyətinin rəhbəri Səməd Seyidov qonağı səmimi salamlayaraq, bu səfərin Avropa Şurası ilə Azərbaycan arasında münasibətlərin inkişafında mühüm rol oynayacağını qeyd etmişdir. O demişdir ki, üç il əvvəl Azərbaycan parlamentinin nümayəndələri AŞ PA-da İlham Əliyevin rəhbərliyi ilə fəaliyyətə başlamışdı. Bu gün fəxr edirik ki, İlham Əliyev Azərbaycan Respublikasının Prezidentidir. Avropa Şurası da qürur duymalıdır ki, bir vaxtlar bu qurumun büro üzvü və sədrin müavini olmuş şəxs indi dövlət başçısıdır.

Səməd Seyidov nümayəndə heyətinin fəaliyyət istiqamətləri barədə danışmış və əmin etmişdir ki, bundan sonra da Azərbaycan həqiqətlərini Avropaya yaymaqda, Avropa dəyərlərini Azərbaycana gətirməkdə səylərini əsirgəməyəcəklər. O, xüsusi vurğulamışdır ki, Azərbaycan quruma üzv olanda müxtəlif ictimai təşkilatlar tərəfindən oraya təqdim olunmuş siyasi dustaq adlandırılan şəxslərin siyahısında 716 nəfər var idi. Hazırda o siyahı bağlanıb. Bu, Azərbaycan xalqının, ümummilli liderimiz Heydər Əliyevin, Prezident İlham Əliyevin siyasi iradəsi nəticəsində mümkün olmuşdur.

Səməd Seyidov xatırlatmışdır ki, Azərbaycan parlamentarilərinin əsas məqsədlərindən biri Dağlıq Qarabağ probleminin Avropa Şurasında açıq və obyektiv müzakirəsinə nail olmaqdır. O, arzu etmişdir ki, Avropanın bu nüfuzlu qurumunda ikili standartlar olmasın, bütün dövlətlərə eyni münasibət bəslənilsin.

Valter Şvimmer səmimi qarşılandığı üçün minnətdarlığını bildirmiş və qeyd etmişdir ki, bu, onun Azərbaycana ilk səfəridir və məqsədi ölkənin Avropa Şurası qarşısında götürdüyü öhdəlikləri necə yerinə yetirdiyini dəyərləndirmək, bu sahədə qazanılan nailiyyətləri öyrənməkdir.

Avropa Şurasının baş katibi məlumat vermişdir ki, artıq xarici işlər naziri, Ermənistan-Azərbaycan, Dağlıq Qarabağ münaqişəsi üzrə xüsusi nümayəndə, ədliyyə naziri, nəhayət, parlamentin sədri və Milli Məclisdə təmsil olunan müxalifət partiyalarının nümayəndələri ilə görüşmüşəm. 716 nəfərlik siyahı bağlandıqdan sonra Azərbaycanın görəcəyi müəyyən işlər vardır. Məhkəmə islahatları davam etdirilməlidir. Mən ictimai televiziya ilə bağlı qanun layihəsinə Azərbaycan Prezidentinin münasibətini alqışlayıram.

Baş katib Dağlıq Qarabağ münaqişəsinə də toxunmuş və demişdir ki, qaçqınlar və məcburi köçkünlərlə görüşəcəyəm. Biz siyasətçilərin məqsədi tarixi dəyərləndirmək deyil, xalqlarımızın üzləşdiyi problemləri həll etməkdir. Azərbaycanda bir milyona yaxın qaçqın və məcburi köçkün vardır. Ona görə də narahat olmalıyıq və sakit otura bilmərik. Yeni müharibənin başlanmasına yol vermək olmaz. Bu, Avropa Şurasının əsas prinsiplərinə ziddir. BMT-nin baş katibi Kofi Annanın qırx illik tarixi olan Kipr problemini həll etmək cəhdləri Avropa Şurasına nümunə olmalıdır. Belə hesab edirəm ki, bu münaqişəni həll etmək mümkündürsə, digərlərini də nizamlamaq olar.

Valter Şvimmer Avropa Şurasının baş katibi vəzifəsinə namizədliyini növbəti müddət üçün də irəli sürdüyünü vurğuladıqdan sonra, qurumun gələcəyinə öz baxışlarını açıqlamış, əmin olduğunu bildirmişdir ki, Avropa Şurası ən işlək beynəlxalq təşkilata çevriləcək və Azərbaycan nümayəndə heyəti onun işində bundan sonra da fəal iştirak edəcəkdir.