İQTİSADİYYAT


AVRO-2020-nin oyunları ilə əlaqədar Bakı metrosunda könüllülər fəaliyyət göstərəcək

Bakı, 11 iyun, AZƏRTAC

UEFA-nın futbol üzrə Avropa çempionatının final mərhələsinin oyunları ilə əlaqədar Bakı Metropolitenində könüllülər xidmət göstərəcək.

“Bakı Metropoliteni” QSC-dən AZƏRTAC-a bildirilib ki, yarış proqramına uyğun olaraq, “A” qrupunun 3 oyunu (12, 16 və 20 iyun) və 1/4 final matçı (3 iyul) “Koroğlu” stansiyasının yaxınlığında yerləşən Bakı Olimpiya Stadionunda keçiriləcək.

Azərbaycan Könüllü Təşkilatları İttifaqı ilə əməkdaşlıq çərçivəsində 30 könüllü seçilib. Onlar futbol oyunlarının keçirildiyi günlərdə “Koroğlu” stansiyası ilə yanaşı, şəhər mərkəzinə yaxın daha 6 metro stansiyasında (“İçərişəhər”, “Sahil”, “28 May”, Gənclik”, “Nəriman Nərimanov”, “Koroğlu” və “Nizami”) fəaliyyət göstərəcəklər.

Könüllülərin cəlb edilməsində əsas məqsəd şəhərimizə təşrif buyurmuş qonaqların, xüsusən əcnəbilərin metropolitendə koordinasiyalı hərəkətini, yarış məkanına və sosial-mədəni obyektlərə səmti rahatlıqla müəyyənləşdirməsini, gediş haqqının yüklənməsini və istifadə qaydalarının izah olunmasını təmin etməkdir. Lazım gəldikdə, sərnişinlərə digər faydalı məlumatlar, eləcə də Azərbaycanın zəngin tarixi-mədəni irsi, paytaxtın sosial-mədəni və iaşə obyektləri barədə məlumatlar da veriləcək.

Könüllülərə müvafiq təlimat keçilərək, iş qrafikləri müəyyən olunub. İkinövbəli rejimdə çalışacaq gənclər sərnişinlərə xidmət göstərəcəkləri stansiyalarla tanış olublar. Onlar üzərində "Ask me" (tərcüməsi – "Məndən soruş") yazılmış xüsusi geyimlərdə olacaq, sərnişinin yaddaş kitabçası, şəhər, metropoliten və Avropa çempionatı ilə bağlı digər vəsaitlərlə təmin ediləcəklər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.