MƏDƏNİYYƏT
AZƏRBAYCANDA HƏR İL DÜNYA TURİZM GÜNÜ QEYD OLUNUR
Bakı, 27 sentyabr (AZƏRTAC). 27 sentyabr - Dünya Turizm Günü 2001-ci ildən etibarən Azərbaycanda geniş qeyd edilir. “Azərbaycan Respublikasında 2010-2014-cü illərdə turizmin inkişafına dair Dövlət Proqramı”nın müvafiq bəndlərinə əsasən, Mədəniyyət və Turizm Nazirliyi tərəfindən ölkəmizdə turizmin inkişafı istiqamətində mühüm işlər görülür.
Sentyabrın 29-da Bakı Biznes Mərkəzində ölkəmizin turizm potensialına həsr olunan təqdimatlar keçiriləcəkdir.
Bu barədə AZƏRTAC-a Mədəniyyət və Turizm Nazirliyinin turizm şöbəsindən məlumat vermişlər. Tədbirdə yay turizm mövsümünün başa çatması, həmçinin 27 sentyabr - Dünya Turizm Günü münasibətilə həyata keçirilən bir sıra tədbirlər barədə iştirakçılara məlumat veriləcəkdir. Həmçinin, hazırda Qusarda inşa edilən Şahdağ qış-yay turizm kompleksi haqqında geniş təqdimat olacaqdır.
Tədbirin proqramında Fransanın “Mondeos” nəşriyyat evi tərəfindən hazırlanmış “Azərbaycanın bələdçi kitabı”nın, Böyük Britaniyanın “Hedonist Guide” şirkəti tərəfindən hazırlanmış “Bakı haqqında kataloq”un, “ERA Marketing Center” şirkətinin ölkə vətəndaşları arasında turizmlə bağlı keçirdiyi sorğunun nəticələrinin, “Azərbaycanın yeni turist marşrutlarını kəşf edək” layihəsi çərçivəsində sentyabrın 3-dən 5-dək Bakı-Quba-Şamaxı-Bakı istiqamətində keçirilmiş avtosafarinin yekunları və birinci milli turizm mükafatının təqdim edilməsi mərasimləri də yer almışdır.
Tədbirdə artıq başa çatmaqda olan 2010-cu ilin yay turizm mövsümünün yekunları da müzakirə ediləcəkdir. Bir çox yeniliklərlə yadda qalan mövsüm ərzində Azərbaycana gələn turistlərin sayında 15 faiz artım olmuşdur. Cari ildə daha çox Quba-Xaçmaz, Şəki, Qəbələ-İsmayıllı bölgələrinə turist axını müşahidə edilmişdir.
Bunun səbəbi sözügedən istiqamətlərdə yol infrastrukturunun yenilənməsi, həmin bölgələrdə turizm xidmətinin yaxşılaşması, genişlənməsi, müxtəlifliyi və çeşidliliyidir. Bu mövsüm istirahət üçün ölkəmizə üz tutan xarici turistlərin sayı da xeyli artmışdır. Son vaxtlar turizm sahəsində aparılan islahatlar, ölkəmizdə mütəmadi beynəlxalq səviyyəli görüşlərin keçirilməsi, dünyanın müxtəlif yerlərində təşkil olunan sərgilərdə və tədbirlərdə Azərbaycanın yüksək səviyyədə təbliği bu müsbət tendensiyanın başlıca səbəbidir.
Hazırda Azərbaycanda turistlər üçün nəzərdə tutulan yataq yerlərinin sayı 30 mindən çoxdur. Mədəniyyət və Turizm Nazirliyinin nəzdində 137 turizm şirkəti, 57 mehmanxana və 48 restoran fəaliyyət göstərir. Cari ilin ötən dövründə nazirliyin əməkdaşları tərəfindən respublikanın bölgələrində 120-dən çox turizm obyektinə baxış keçirilmişdir. Bu zaman mövcud problemlər araşdırılmış və onların aradan qaldırılması üçün təkliflər verilmişdir.
Artıq paytaxtda və bölgələrdə turizm kompleksləri inşa olunur. Turizm infrastrukturunun inkişafı sözügedən sahədə ixtisaslı kadrlara tələbatı artırmışdır. Yaxın gələcəkdə reallaşdırılması nəzərdə tutulan kollec və peşə liseylərinin açılması məhz bu tələbatın ödənilməsinə xidmət edəcəkdir.
Dünya Turizm Təşkilatının qərarına əsasən, bu il Dünya Turizm Gününün şüarı “Turizm və biomüxtəliflik”dir.