Xəbər verdiyimiz kimi, Azərbaycan Respublikasının Prezidenti İlham Əliyev aprelin 28-29-da Fransanın Strasburq şəhərində səfərdə olmuşdur.

Aprelin 28-də Varşavadan Strasburqa gələn Prezident İlham Əliyevi hava limanında Avropa Şurası protokolunun rəisi Müəmmər Topaloğlu, şəhərin prefekti Peno, Azərbaycan Respublikasının Avropa Şurası yanında daimi nümayəndəsi səfir Aqşin Mehdiyev, Milli Məclisin AŞPA-dakı nümayəndə heyətinin rəhbəri Səməd Seyidov və deputatlarımız, burada yaşayan soydaşlarımız mehribanlıqla qarşıladılar.

X X X

Azərbaycan Prezidenti İlham Əliyev aprelin 29-da Avropa Şurasının iqamətgahına – Avropa sarayına gəldi. Sarayın qarşısında respublikamızın dövlət bayrağı dalğalanırdı. Dövlətimizin başçısını burada Avropa Şurasının baş katibi Valter Şvimmer, Avropa Şurası Parlament Assambleyasının sədri Piter Şider, AŞPA-nın baş katibi Bruno Haller və digər yüksək vəzifəli şəxslər səmimiyyətlə, mehribanlıqla qarşıladılar.

X X X

Sonra Azərbaycan Prezidenti İlham Əliyevin AŞPA-nın sədri Piter Şider ilə görüşü oldu.

Səmimilik şəraitində keçən görüşdə cənab Şider dövlətimizin başçısını Avropa Şurasında bir daha salamlamaqdan qürur duyduğunu vurğuladı və dəvəti qəbul edib Avropa Şurasına gəldiyinə görə təşəkkür edərək dedi ki, Avropa Şurası ölkələrə həmişə tələbkarlıqla yanaşır, amma Sizin ölkənizdə gedən proseslərdən, qazandığınız uğurlardan hədsiz dərəcədə məmnunuq. AŞPA-nın sədri Prezident İlham Əliyevin vaxtilə bu qurumdakı fəaliyyətini, indi isə ölkənin rəhbəri kimi Azərbaycanda demokratiyanın inkişafı, insan hüquqlarının qorunması və vətəndaş cəmiyyətinin qurulması sahəsində səylərini yüksək qiymətləndirdi. Cənab Şider Azərbaycan nümayəndə heyətinin AŞPA-da indi də fəal, inadkar olduğunu söylədi və buna görə minnətdarlığını bildirdi.

Prezident İlham Əliyev AŞPA-dakı fəaliyyətini həyatının ən gözəl illəri kimi səciyyələndirdi, Azərbaycanın Avropa ailəsinə daha sıx inteqrasiyası üçün əlindən gələni əsirgəməyəcəyini, ölkəmizin Avropa dəyərlərinə daim sadiq olacağını bildirdi, Avropa Şurasının fəxri qonaqları kitabına ürək sözlərini yazdı.

Görüşün sonunda Piter Şider dövlətimizin başçısına müraciətlə dedi:

- Cənab Prezident, indi çox xoş və Assambleyanın tarixində nadir hallarda baş verən məqam yetişmişdir.

Bizim 1988-ci ildən mövcud olan qaydalarımıza əsasən, Assambleyanın işində xüsusi fəallığı ilə seçilən şəxsiyyətlər xüsusi medalla təltif olunurlar. Bu vaxta qədər yalnız bir ölkənin – Finlandiyanın Prezidenti xanım Halonen bu fəxri ada layiq görülmüşdür. İndi isə mən bu medalı Sizə təqdim etmək istəyirəm. Bu medal o deməkdir ki, Assambleyada, bu binada, iclas salonunda Sizin müstəsna hüquqlarınız vardır. Bu, Sizə ömürlük verilən hüquqlardır. Prezident kimi Siz buraya həmişə gələ bilərsiniz, Sizi burada həmişə məmnuniyyətlə görmək istəyirik. Amma bundan əlavə, gizli gəlmək istəsəniz, sadəcə, bu medalı taxmaq kifayət edər. Xüsusi vurğulayıram ki, bu mükafat Sizə üzv ölkənin Prezidenti olduğunuza görə deyil, Avropa Şurası ailəsində xüsusi fəallıqla seçilməyinizə görə verilir.

Sonra AŞPA-nın sədri Azərbaycan Prezidenti İlham Əliyevə Avropa Şurası Parlament Assambleyasının fəxri üzvü diplomunu və medalını təqdim etdi.

Prezident İlham Əliyev xoş sözlərə və ona göstərilən yüksək etimada görə minnətdarlığını bildirdi.

X X X

Azərbaycan Prezidenti İlham Əliyev aprelin 29-da Avropa Şurasının baş katibi Valter Şvimmer ilə də görüşdü. Mehribanlıq şəraitində keçən söhbət zamanı Avropa Şurası ilə Azərbaycan arasında əməkdaşlığın yüksək səviyyəsindən məmnunluq ifadə edildi, bir sıra məsələlər ətrafında fikir mübadiləsi aparıldı.