Hörmətli mərasim iştirakçıları!

Cənab Baş nazir, icazə verin, bütün lənkəranlılar adından Sizi bir daha səmimi qəlbdən salamlayım, bizim qədim və gözəl Lənkəranımıza “Xoş gəlmisiniz!” deyim.

Bu gün təkcə Lənkəranda deyil, bütün cənub bölgəsində bayramdır. Bu bayramın, bu sevincin və şadlığın əsl səbəbi möhtərəm cənab Baş nazirin rayonumuza gəlişidir.

Cənab Baş nazir, xalqımız Sizin ölkənin bütün rayonlarına səfəriniz zamanı yeni-yeni sənaye müəssisələrinin, sosial obyektlərin açılışının şahididir. Bir qədər əvvəl Lənkəranda Sizin xeyir-duanızla Yeni Azərbaycan Partiyası Lənkəran şəhər təşkilatının binası, konserv zavodu və tamamilə yenidən qurulmuş mehmanxana istifadəyə verildi. İndi isə möhtərəm Prezidentimiz cənab Heydər Əliyevin yüksək diqqəti və Sizin gündəlik qayğınızla ucaldılmış çox əzəmətli, möhtəşəm, Lənkəranımıza xüsusi gözəllik verən Olimpiya idman kompleksinin açılışıdır.

Lənkəranda bu cür əzəmətli obyektlərin əsası hələ keçən əsrin 70-ci illərində şəxsən cənab Heydər Əliyev tərəfindən qoyulmuşdur. O illərdə Lənkərana 6 dəfə səfər etmiş cənab Heydər Əliyevin təşəbbüsü və gündəlik qayğısı ilə Xanbulançay kimi nəhəng dəryaça, müasir tələblərə cavab verən hava limanı, Lənkəran Dövlət Dram Teatrı, xəstəxana kompleksi, çoxlu səhiyyə, təhsil, mədəniyyət ocaqları tikilib istifadəyə verilmişdir. Ötən əsrin 70-80-ci illərinin əvvəllərində məhz cənab Heydər Əliyevin gündəlik rəhbərliyi və müdrik siyasəti nəticəsində Lənkəran bütün sahələrdə sürətlə inkişaf etmiş, illəri yüksək qələbələrlə başa vurmuşdur. Bu gün biz fəxrlə deyirik ki, həmin illər Lənkəranın qızıl illəri adlandırılır və qədirbilən lənkəranlılar bunu heç zaman unutmurlar. Onlar daim cənab Prezidentə və Sizə minnətdardırlar.

Bu gün möhtərəm Prezidentimizin uğurlu siyasəti nəticəsində Azərbaycanda möhkəm sabitlik hökm sürür, bütün sahələrdə genişmiqyaslı islahatlar davam etdirilir. Biz artıq hansısa sahənin bərpasından deyil, tərəqqidən və sürətli inkişafdan danışırıq. Elə bunun nəticəsidir ki, ölkəmizin taleyüklü problemləri ardıcıl həll olunur və əhalinin yaşayış səviyyəsi getdikcə yüksəlir.

Hörmətli cənab Baş nazir!

İntibah dövrünü yaşayan respublikamızın hər yerində olduğu kimi, Lənkəranda da möhtərəm Prezidentimizin bizə verdiyi tapşırıqlar və qarşımıza qoyduğu vəzifələri rəhbər tutaraq, uğurlu islahatlar aparılmışdır və sosial problemlər bir-birinin ardınca həll edilir. Bu gün xüsusi mülkiyyətçiyə və sahibkara çevrilən Lənkəranın gənc iş adamları ölkədə məhsul bolluğu yaradılmasına öz töhfələrini verməyə başlamışlar. Rayonumuzda fəaliyyət göstərən sahibkarlar yeni-yeni müəssisələr açmışlar, tərəvəz və üzümdən dünya standartlarına cavab verən məhsullar istehsal edilir. Bu müəssisələrdə 1400 iş yeri açılmışdır. Rayonun iqtisadi yüksəlişi geniş miqyasda abadlıq, quruculuq, təmir-bərpa işlərinin aparılmasına da imkan yaradır. Bu gün elin gücü ilə Lənkəran öz simasını dəyişir, sabaha inamla addımlayır.

Lənkəran şəhərində daxili imkanlar hesabına 10 milyard 200 milyon manatlıq təmir-tikinti və abadlıq işləri görülmüşdür ki, bunun yalnız 0,8 faizi büdcə vəsaitinin payına düşür. Səylərimizi birləşdirərək, biz şəhərimizdə akademik Zərifə Əliyeva, professor Hənifə Abdullayev, Səttarxan adına küçələri, Şəhidlər, Koroğlu küçələrini tamamilə asfaltlaşdırmış və müasir tələblərə uyğun abadlaşdırmışıq. Uzun illər boyu şəhəri çətin problemlərlə üz-üzə qoyan kanal təmizlənmiş, iki kollektor tam təmir olunmuşdur.

Hörmətli cənab Baş nazir!

Sizin yaxından köməyinizlə Lənkəranın tarixində şanlı səhifəyə çevriləcək və rayonun iqtisadiyyatında bir sıçrayış olacaq Beynəlxalq Dəniz Limanının tikintisinə artıq başlanılmışdır.

Abadlıq və quruculuq işləri təkcə Lənkəran şəhərində deyil, rayonun bütün qəsəbə və kəndlərində aparılır. Möhtərəm Prezidentimizin və eləcə də Sizin qayğınızla, əhalini narahat edən problemlər ardıcıl olaraq həll edilir.

Lənkəranda elektrik enerjisi ilə bağlı problem artıq aradan qaldırılmışdır.

Hörmətli cənab Baş nazir, şəxsən Sizin yaxından köməyiniz və qayğınız sayəsində bir il əvvəl Lənkərana yenidən təbii qaz verilməyə başlamış və artıq şəhərin 85 faizi qazlaşdırılmışdır. Cari ilin sonunadək biz bunu tamamilə başa çatdırmaq niyyətindəyik.

Bütün bu işlər yerlərdə camaatla görüşlər zamanı irəli sürülən təkliflər əsasında həyata keçirilir. Məlumat üçün deyim ki, möhtərəm Prezidentimizin əhali ilə daim ünsiyyətdə olmaq, insanların sosial problemlərini təxirə salmadan həll etmək tapşırığını rəhbər tutaraq, rayonumuzun 78 qəsəbə və kəndində sakinlərlə görüşmüşük. Bu görüşlərdə qaldırılmış məsələlərin böyük əksəriyyəti artıq öz həllini tapmış, bir çoxu isə yerindəcə həll olunmuşdur. Xüsusi vurğulamaq istəyirəm ki, Lənkəran camaatı bu görüşlərdə onları narahat edən problemləri qaldırmaqla yanaşı, sabaha çox böyük ümid və inam bəslədiklərini bildirir, özlərinin xoşbəxt və firavan gələcəklərini yalnız və yalnız Sizin rəhbərliyinizlə möhtərəm Prezidentimizin siyasi xəttinin davam etdirilməsində görürlər. Hörmətli İlham müəllim, xalqımız Sizi sözü, əməli bir olan dövlət xadimi kimi tanıyır və Sizə böyük rəğbət bəsləyir.

Dövlətimizin neft strategiyasının həyata keçirilməsində, idmanın inkişafında, Azərbaycanın haqq səsinin dünyaya çatdırılmasında Sizin əvəzsiz və müstəsna xidmətlərinizi xalqımız çox yüksək qiymətləndirir. İki il bundan əvvəl Lənkəranda olarkən Siz burada Olimpiya kompleksinin tikiləcəyini vəd etmişdiniz. Artıq bu, həqiqətə çevrilmişdir. Lənkəranlılar bu möhtəşəm memarlıq və idman abidəsini ən qiymətli hədiyyə kimi Sizdən qəbul edir, Zati-aliləri cənab Heydər Əliyevə və şəxsən Sizə bir daha minnətdarlıqlarını bildirirlər.

Hörmətli cənab Baş nazir, lənkəranlılar Sizin onlara çox böyük məhəbbət bəslədiyinizi yaxşı bilirlər. Onlar 2000-ci ildə parlament seçkiləri ərəfəsində Lənkəran və lənkəranlılar haqqında söylədiyiniz səmimi və hərarətli, məhəbbət dolu sözlərinizi ehtiramla xatırlayır, Sizə sonsuz inam və məhəbbət bəsləyirlər. Möhtərəm Prezidentimizin Azərbaycan xalqına müraciətində respublika prezidentliyinə ən layiqli namizəd kimi Sizə etimad göstərməsi biz lənkəranlıların ürəyini iftixar, qürur hissi ilə doldurmuşdur. Çünki məhz lənkəranlı gənclər və bütün Lənkəran seçiciləri Sizin namizədliyinizi birincilər sırasında dəstəkləmişlər.

Yaşasın Azərbaycanın işıqlı gələcəyinin təminatçısı olan cənab İlham Əliyev!