SİYASƏT
AZƏRBAYCANIN MÜSTƏQİLLİYİNƏ HƏSR OLUNMUŞ BEYNƏLXALQ KONFRANS ÖZ İŞİNƏ BAŞLAMIŞDIR
Martın 3-də Azərbaycan Həmkarlar İttifaqları Konfederasiyasında “Azərbaycan müstəqillikdən sonra” mövzusunda ikigünlük beynəlxalq konfrans öz işinə başlamışdır.
Qafqaz Universitetinin 10 illik yubleyi tədbirləri çərçivəsində keçirilən konfransda tanınmış elm və mədəniyyət xadimləri, Milli Məclisin deputatları, politoqlar, xarici ölkələrin Bakıdakı səfirliklərinin nümayyəndələri iştirak edirdilər.
Universitetin rektoru, professor Erol Oral giriş sözü ilə çıxış edərək görkəmli dövlət xadimi Prezident Heydər Əliyevin məqsədyönlü siyasəti sayəsində müstəqil Azərbaycanın inkişaf edərək dünya ölkələri arasında özünəməxsus yer tutduğunu bildirdi.
Milli Məclisin təbii ehtiyatlar, energetika və ekologiya məsələləri daimi komissiyasının sədri Asya Manafovanın “Müstəqillikdən sonra Azərbaycanda qanunvericiliyin inkişafı”, Azərbaycan Texniki Universitetinin rektoru, professor Havar Məmmədovun “İnformasiya-kommunikasiya texnologiyalarının inkişafı sahəsində universitet-sənaye işbirliyi”, Milli Məclisin deputatı, dossent Aydın Mirzəzadənin “Müasir Azərbaycan dövlətçiliyinin inkişaf istiqamətləri”, İqtisadi İnkişaf Nazirliyinin icraçı direktoru Samir Vəliyevin “Müstəqillikdən sonra Azərbaycan iqtisadiyyatının inkişaf perspektivləri” mövzularında məruzələri dinlənildi.
Məruzələrdə müstəqilliyimizin ötən 11 ili müxtəlif cəhətlərdən təhlil olundu. Dövlətçiliyimizin möhkəmləndirilməsi, ölkəmizin mükəmməl qanunvericilik bazasının və icra mexanizminin yaradılması, informasiya-kommunikasiya texnologiyalarının inkişafı istiqamətində aparılan genişmiqyaslı işlər və onun uğurlu nəticələri əsaslı faktlarla diqqətə çatdırıldı.
Sonra konfrans universitetdə bölmə iclaslarında öz işini davam etdirdi.