AZƏRTAC xəbər verir ki, aprelin 17-də Zəngilan Rayon İcra Hakimiyyətində idarə, müəssisə və təşkilat rəhbərlərinin, ictimaiyyət nümayəndələrinin, rayon fəallarının iştirakı ilə geniş şura yığıncağı keçirilmişdir. Yığıncaqda Azərbaycan Prezidenti İlham Əliyevin aprelin 13-də Nazirlər Kabinetinin birinci rübün yekunlarına həsr olunmuş iclasındakı giriş və yekun nitqlərində qarşıya qoyulan vəzifələr müzakirə edilmişdir. Rayon icra hakimiyyətinin başçısı Vəli Quliyev məruzə ilə çıxış etmişdir.

Natiq qeyd etmişdir ki, dövlətimizin başçısının sədrliyi ilə keçən iclasda Prezident İlham Əliyev son illər ölkədə müşahidə edilən inkişafın cari ilin birinci rübündə də uğurla davam etdiyini, ümumi daxili məhsulun həcminin ötən üç ayda 40 faizə, sənaye məhsulu istehsalının isə 39 faizə yüksəldiyini diqqətə çatdırmışdır. Bu ildən ölkəmizdə minimum əmək haqqı 50 manat, təqaüdlər orta hesabla 70 manat olmuş, 55 min ailəyə ünvanlı sosial yardım təyin edilmiş, əhalinin pul gəlirləri 53 faiz artmışdır. Azərbaycanın valyuta ehtiyatları 4,1 milyard ABŞ dolları səviyyəsinə çatmışdır.

Prezident İlham Əliyevin proqram xarakterli nitqlərində göstərilmişdir ki, insanların həyat səviyyəsi günbəgün yaxşılaşır. Birinci rübdə orta aylıq əmək haqqı 163 manat, yəni 190 dollar təşkil etmişdir. İlin sonuna qədər bu rəqəm 200 dollardan çox olacaqdır.

Azərbaycanda yoxsulluğun səviyyəsi kəskin şəkildə aşağı düşüb, ölkədə orta təbəqə formalaşır. Regionların sosial-iqtisadi inkişafı Dövlət Proqramı uğurla icra edilir. 2003-cü ilin oktyabr ayından indiyə qədər 535 min yeni iş yeri açılmışdır ki, bunların da böyük əksəriyyəti daimi iş yerləridir. Yeni iş yerlərinin 83 faizinin regionlarda açılmasını təqdirəlayiq hal kimi qiymətləndirən Prezident İlham Əliyev bu istiqamətdə işlərin gələcəkdə də davam etdiriləcəyini vurğulamışdır.

Dövlətimizin qaçqınlara və məcburi köçkünlərə göstərdiyi qayğıdan danışan V.Quliyev, işğal altındakı torpaqlarımızın ölkəmizin rəhbəri İlham Əliyevin apardığı uğurlu siyasət nəticəsində tezliklə azad ediləcəyini, zəngilanlıların ata-baba torpaqlarına qayıdacaqlarını xüsusi vurğulamışdır. İcra başçısı daha bir xoş xəbəri yığıncaq iştirakçılarının diqqətinə çatdırmışdır. Bildirilmişdir ki, Portuqaliyada keçirilmiş kinq-boksinq üzrə Avropa çempionatında uğurla çıxış edən zəngilanlı idmançı Rasim Əhmədov final döyüşündə erməni rəqibi üzərində qələbə qazanaraq fəxri kürsünün 1-ci pilləsinə qalxmışdır. Biz işğalçı Ermənistan üzərində də qələbə çalacağıq.

Görülmüş işlərdən danışan məruzəçi bildirmişdir ki, ötən üç ayda 75 nəfər yeni iş yerləri ilə təmin edilmişdir. Təkcə 2007-ci ilin birinci rübündə rayon icra hakimiyyətinin təşkilatçılığı və yaxından köməyi ilə Azərbaycan Dövlət Neft Akademiyasının tələbə şəhərciyində, H.Ələsgərov küçəsindəki uşaq bağçasında, Xətai rayonu ərazisindəki sanatoriyada və Sabunçu rayonunun Maştaga qəsəbəsindəki “Daş karxanası” adlanan ərazidə, Tibb Universitetinin 4 saylı yataqxanasında və s. ərazilərdə məskunlaşmış zəngilanlıların elektrik, qaz və su təchizatı ilə bağlı problemləri həll edilmişdir.

Rayon əhalinin sosial müdafiə mərkəzi ünvanlı sosial yardım haqqında qanunun icrası ilə bağlı məqsədyönlü iş aparmış, 133 nəfər zəngilanlıya ünvanlı sosial yardım təyin edilmişdir. Dövlət Sosial Müdafiə Fondunun rayon şöbəsi, məşğulluq mərkəzi, habelə rayon vergilər şöbəsi ilin ilk rübünü uğurlu göstəricilərlə başa vurmuşlar. Həmin dövrdə rayon üzrə büdcə daxilolmalarına 151,9 faiz əməl edilmişdir, pensiya və müavinətlər əhaliyə vaxtında ödənilmişdir. Bir sıra ödənişlərin kart sistemi ilə verilməsi sahəsində hazırlıq işləri aparılmışdır.

Cari ilin birinci rübündə vətəndaşların qəbulu, onların ərizə və şikayətlərinə baxılması işinə diqqət daha da artırılmış, səyyar qəbulların və “açıq qapı” günlərinin keçirilməsi praktikasından geniş istifadə edilmişdir.

Rayon icra hakimiyyəti yanında fəaliyyət göstərən xeyriyyə fondundan 2007-ci ilin birinci rübündə şəhid ailələrinə, müharibə əlillərinə, xəstələrə, tənhalara, habelə yas mərasimlərinə 1400 manat nağd pul yardımı edilmişdir.

Məruzəçi xüsusi vurğulamışdır ki, hazırda Sabirabad, Saatlı və İmişli rayonlarında məskunlaşmış zəngilanlı məcburi köçkünlər üçün 161 ailəlik qəsəbənin tikintisində son tamamlama işləri görülür. Hər cür infrastruktura malik olacaq bu qəsəbə mayın sonlarında köçkünlərin istifadəsinə veriləcəkdir.

İcra başçısı demişdir ki, Azərbaycan Prezidentinin nitqlərindən irəli gələn vəzifələrin layiqincə yerinə yetirilməsi üçün bütün imkanlar səfərbər olunacaqdır.

Məruzə ətrafında müzakirələrdə Zəngilan şəhər ərazi icra nümayəndəsi Əşrəf Şükürov, rayon əhalinin sosial müdafiə mərkəzinin direktoru Həsən Ələkbərov, mərkəzi rayon xəstəxanasının baş həkimi Eldar Babayev, rayon vergilər şöbəsinin rəisi Vəzifə Əhmədova, rayon təhsil şöbəsinin müdiri Zakir İbrahimov çıxış etmişlər.

Müzakirə olunan məsələ ilə əlaqədar müvafiq qərar qəbul edilmişdir.