Oktyabrın 24-də Azərbaycan Respublikasının Baş naziri İlham Əliyev Türkiyə Respublikasının quru qoşunları komandanı, ordu generalı Aytac Yalmanı və onu müşayiət edən şəxsləri qəbul etmişdir.

Qonaqları səmimiyyətlə qarşılayan Baş nazir İLHAM ƏLİYEV dedi:

- Hörmətli Türkiyə Cümhuriyyətinin quru qoşunları komandanı!

Hörmətli qonaqlar, sizin hamınızı ürəkdən salamlayıram, Azərbaycana xoş gəlmisiniz. Fürsətdən istifadə edərək, sizi Türkiyə Cümhuriyyəti qurulmasının qarşıdan gələn 80-ci ildönümü münasibətilə təbrik edirəm və qardaş türk xalqına yeni uğurlar, xoşbəxtlik arzulayıram.

Türkyə ilə Azərbaycan arasında dostluq və qardaşlıq münasibətləri davam edir, güclənir və yeni pilləyə qalxır. Çox şadıq ki, ölkələrimiz arasında bütün istiqamətlərdə qarşılıqlı anlaşma, dostluq, qardaşlıq əlaqələri mövcuddur.

Bildiyiniz kimi, Azərbaycan öz xarici siyasətini uğurla həyata keçirir. Möhtərəm Prezidentimiz Heydər Əliyev tərəfindən başlanılmış bu siyasət davam etdirilir. Əlbəttə, bu siyasətdə Türkiyə ilə münasibətlərin xüsusi yeri vardır. Biz bir millət, iki dövlətik və çalışmalıyıq ki, ölkələrimiz, xalqlarımız arasında mövcud olan qardaşlıq, dostluq münasibətləri bundan sonra da inkişaf etsin. Mən Baş nazir vəzifəsinə təyin olunduqdan sonra ilk səfərimi Türkiyəyə etdim və bu da təbiidir. Hesab edirəm ki, bu ənənə gələcəkdə də davam etdirilməlidir.

Bizim münasibətlərimiz çox qane edicidir. Qarşımızda duran bütün məsələlər öz həllini tapır və mən çox şadam ki, hərbi əməkdaşlıq da sürətlə inkişaf edir. Azərbaycanda güclü ordu yaradılmışdır, ordu quruculuğuna böyük önəm verilir və qısa müddət ərzində ordumuz çox böyük nailiyyətlər əldə etmişdir.

Azərbaycanda qarşıya qoyulmuş bütün vəzifələri həll etməyə qadir olan ordu vardır ki, bu da bizim ən böyük uğurlarımızdan biridir. Çox şadam ki, bu istiqamətdə hərbçilərimiz arasında işbirliyi vardır. Biz bunu çox yüksək qiymətləndiririk və əmin olduğumu bildirmək istəyirəm ki, hərbi sahədə əməkdaşlıq gələcəkdə də davam edəcəkdir.

Səmimi qəbula görə minnətdarlıq edən ordu generalı AYTAC YALMAN dedi:

- Hörmətli Baş nazir, ilk öncə, bizi qəbul etdiyiniz üçün Sizə təşəkkürümü bildirmək istərdim.

Yaxın günlərdə demokratik şəraitdə keçirilmiş seçkilərdə qazandığınız qələbə münasibətilə Sizi ürəkdən təbrik edir, bu qələbənin həm şəxsən Sizin üçün, xalqınız üçün, həm də türk dünyası üçün uğurlu olmasını arzulayıram. Eyni zamanda, hörmətli atanızla görüşümü də xatırlatmaya bilmərəm. 2001-ci ilin mayında jandarm baş komandanı olaraq Azərbaycana səfər etdiyim zaman möhtərəm atanız, böyük dövlət xadimi Heydər Əliyevlə görüşmək imkanım oldu. Son dərəcə əhəmiyyətli və səmərəli bir görüş idi. Onun hər zaman ifadə etdiyi çox məşhur bir kəlamı Siz də söylədiniz və mən də ifadə etmək istərdim. Biz bir millət, iki dövlətin bütün gözəlliklərini birlikdə yaşayırıq və uzun müddət də yaşayacağıq.

Sizin də dediyiniz kimi, əməkdaşlığımız səmimidir, daimidir və uzun ömürlüdür. Ancaq bu işbirliyinin hərbi sahədən əlavə digər sahələrdə də güclü inkişafını arzu edirəm. Biz, əslində, 1994-cü ildə prezidentlər arasında keçirilmiş görüşdən sonra çox geniş bir hərbi əməkdaşlığa başladıq. Mən bu əməkdaşlığın bütün mərhələlərini yaxından izləmişəm. Bu dəfə etdiyim səfər zamanı silahlı qüvvələrə çox geniş şəkildə əhəmiyyət qazandıran və onları gücləndirən məktəbləri ziyarət etmək imkanım oldu. Bu ziyarətimdən duyduğum məmnunluğu xüsusilə qeyd etmək istəyirəm. Azərbaycan Silahlı Qüvvələri çox böyük bir məsafə qət etmişdir. Amma bununla kifayətlənməyəcəyik. Dünən dəyərli məsləkdaşım müdafiə naziri ilə keçirdiyim görüş zamanı daha geniş əməkdaşlığa ehtiyac olduğunu vurğuladıq. Bununla əlaqədar nəzərdə tutduğumuz planların həyata keçirilməsinə başlamışıq.

Azərbaycan və Türkiyə olaraq, həqiqətən, bu gün gəldiyimiz nöqtədən daha irəliyə getməyimizin zəruriliyini xüsusi vurğulamaq istəyirəm. Çünki çox yaxşı bildiyiniz kimi, 1990-cı ildən sonra, “soyuq müharibə”nin başa çatması ilə əlaqədar meydana çıxan təkqütblü dünya anlayışı müxtəlif problemlərin də meydana gəlməsinə səbəb olmuşdur.

Millətçilik, insan qaçaqmalçılığı və sairə.

Yaranmış bu böhran bölgələri Türkiyənin bilavasitə yaxınlığında - Balkanlarda, Orta Şərqdə və Qafqazdadır. Balkanlardakı böhranın necə yaşandığını hamımız çox yaxından gördük. Orta Şərqdəki böhran davam etməkdədir. Beləliklə, Balkanların və Qafqazın bu səbəbdən əhəmiyyəti daha da artmaqdadır. Mən Sizin diqqətinizi bu mövzuya yönəltmək, bu çərçivədə əməkdaşlığımızı daha məqsədyönlü şəkildə davam etdirmək məcburiyyətində olduğumuzu bir daha vurğulamaq istəyirəm.

Azərbaycanın Qarabağ məsələsi bizim də məsələmizdir. Bunu xüsusilə vurğulamaq istəyirəm. Türkiyə buna öz problemi kimi baxır. Qarabağ məsələsi ilə əlaqədar qayğımızı bir daha ifadə etməyə ehtiyac duyuram.

Əməkdaşlığımızın gələcəkdə daha da inkişaf edəcəyinə ümidvar olduğumu bildirərək, Sizə şəxsən öz adımdan və nümayəndə heyəti adından böyük hörmətimi ifadə etmək istəyirəm.

Səmimi təbrikə və xoş sözlərə görə təşəkkürünü bildirən Baş nazir İLHAM ƏLİYEV dedi:

-Mən çox məmnunam ki, Siz bizim ordu haqqında belə yüksək fikirdəsiniz. Bu, bizim üçün çox önəmlidir və fürsətdən istifadə edərək, Türkiyə Silahlı Qüvvələrinə minnətdarlığımı bildirirəm. Sizin böyük yardımınız olmuşdur və bu yardım davam edir. Biz bunu çox yüksək qiymətləndiririk.

Əlbəttə, bu sahədə əməkdaşlıq davam etdirilməlidir. Bu, təbiidir, cünki artıq bu işbirliyi öz gözəl nəticələrini verir. Azərbaycan ordusunun bugünkü səviyyəsi məhz bu əməkdaşlığın nəticəsi olaraq özünü göstərir.

Qeyd etdiyiniz kimi, bölgədə vəziyyət qeyri-sabitdir, bu bölgənin bəzi yerlərində böhran yaşanır. Əlbəttə, Azərbaycan çox istəyir ki, bölgədə sülh təmin olunsun. Biz bu istiqamətdə öz tərəfimizdən iş aparırıq və ümidvarıq ki, bölgədə sülh bərqərar olunacaqdır. Buna nail olmaq üçün ilk növbədə Ermənistan-Azərbaycan, Dağlıq Qarabağ münaqişəsi öz həllini tapmalıdır. Biz sülh tərəfdarıyıq və istəyirik ki, münaqişənin həllinə sülh yolu ilə nail olaq. Ancaq əfsuslar olsun ki, istər ikitərəfli danışıqlar, istərsə də ATƏT-in Minsk qrupunun fəaliyyəti heç bir nəticə vermir. Ona görə də yeni yolların axtarılması istiqamətində iş aparılmalıdır. Azərbaycan xalqı torpaqlarının işğal altında qalması ilə heç cür barışa bilməz.

Biz nəyin bahasına olsa da, torpaqlarımızı işğaldan azad etməliyik. Azərbaycanın ərazi bütövlüyü bərpa olunmalı, bu işğaldan əziyyət çəkən bir milyon qaçqın və məcburi köçkün öz doğma torpaqlarına qayıtmalıdır. Biz bunu danışıqlar yolu ilə həll etməyə çalışacağıq. Amma, eyni zamanda, mən əminəm ki, Azərbaycanın güclü ordusunun formalaşması istiqamətində proseslər davam edərsə, ordumuz daha da güclənərsə, bu, danışıqlar prosesinə də öz təsirini göstərə bilər.

Azərbaycan bölgədə ən dinamik inkişaf edən ölkədir. Bütün iqtisadi göstəricilər deməyə əsas verir ki, qonşularla müqayisədə ölkəmiz çox sürətlə inkişaf edir, iqtisadi potensialımız güclənir və beləliklə, Azərbaycan yaxın gələcəkdə kifayət qədər zəngin dövlətə çevriləcəkdir. Əlbəttə, bundan sonra imkanlarımız da genişlənəcək, o cümlədən, ordu quruculuğu sahəsində də böyük addımlar atılacaqdır. Biz bu məsələyə böyük diqqət verəcəyik və əminəm ki, yaxın gələcəkdə ordumuz daha da güclənəcək, qarşısında duran bütün vəzifələri həll etməyə qadir olacaqdır. Bu, indi də belədir və əminəm ki, gələcəkdə bu proses daha da genişlənəcəkdir.

Ümidvaram ki, Türkiyə ilə Azərbaycan arasında münasibətlər bütün sahələrdə daha da inkişaf edəcəkdir. Həm ikitərəfli münasibətlərdə, həm də bölgədə mövcud olan problemlərin həlli istiqamətində bizim birgə fəaliyyətimiz çox uğurludur. Biz dünyada baş verən hadisələrə, demək olar ki, vahid mövqedən yanaşırıq və münasibətimizi bildiririk. Biz bunu həmişə bəyan etmişik: Türkiyə harada, Azərbaycan da oradadır və mən əminəm ki, Azərbaycan haradadır, Türkiyə də orada olacaqdır. Biz həmişə bir yerdəyik.

Bir daha Sizi salamlayıram və əmin olduğumu bildirmək istəyirəm ki, keçirdiyiniz bütün görüşlər və apardığınız danışıqlar müsbət nəticələr verib və gələcək əməkdaşlığımız üçün daha möhkəm zəmin yaradacaqdır.

X X X

Qəbulda Azərbaycanın müdafiə naziri Səfər Əbiyev, Türkiyənin ölkəmizdəki səfiri Əhməd Ünal Çeviköz iştirak edirdilər.