RƏSMİ XRONİKA
AZƏRBAYCAN İLƏ ABŞ ARASINDAKI MÜNASİBƏTLƏRDƏ YENİ MƏRHƏLƏ AÇILIR
AZƏRBAYCAN PREZİDENTİ HEYDƏR ƏLİYEV ABŞ-IN DÖVLƏT KATİBİNİN MÜAVİNİNİ QƏBUL ETMİŞDİR
Azərbaycan Respublikasının Prezidenti Heydər Əliyev yanvarın 29-da Prezident sarayında Amerika Birləşmiş Ştatlarının Dövlət Katibinin Avropa və Avrasiya məsələləri üzrə müavini xanım Elizabet Consu qəbul etmişdir.
Qonağı səmimiyyətlə salamlayan dövlətimizin başçısı HEYDƏR ƏLİYEV dedi:
-Mən sizinlə görüşümdən çox məmnunam. Səfir məndən soruşdu ki, Bakıda az müddətdə olacaq xanım Consla görüşməyə vaxt tapacaqsınızmı? Mən də dedim ki, gərək mən mütləq vaxt tapım. Vaxt da tapdım.
İndi çox məlumatlar sizdədir, bizdə o qədər məlumat yoxdur. Ona görə gərək siz birinci danışasınız.
ELİZABET CONS: Böyük məmnuniyyətlə. Cənab Prezident, çox sağ olun. Bu axşam vaxt tapıb məni qəbul etdiyinizə görə, Sizə minnətdaram.
Mən bir neçə saat Bakıda olacağam. Cənab Prezident, xüsusilə məmnunam ki, bu gün sizinlə görüşürəm. Çünki Azərbaycan ilə Amerika Birləşmiş Ştatları arasındakı münasibətlərdə yeni mərhələ açılır.
Məlum olduğu kimi, Azərbaycan ilə Amerika Birləşmiş Ştatları arasında indiyə qədər mövcud olan bəzi maneələr artıq aradan götürülmüşdür. Ona görə də, ölkələrimiz arasında əməkdaşlığa dair yeni proqramlar, yeni layihələr yaranmaqdadır. Bütün bu hadisələri, xəbərləri biz Vaşinqtonda böyük həyacanla eşidirik və onları çox xoş qarşılayırıq.
Prezident Corc Buş, vitse-prezident Çeyni, dövlət katibi Kolin Pauele və nazir Ramsfeld – onların hamısı 11 sentyabrdan sonra ABŞ-a kömək əli uzatdığına görə Azərbaycana minnətdardılar və buna böyük rəğbət hissi ilə yanaşırlar.
Sizinlə görüşdən bir qədər əvvəl Vaşinqtondan, vitse-prezidentin ofisindən mənə zəng edirdilər. Vitse-prezident xahiş etdi ki, onun səmimi salamlarını Sizə yetirim. O, həm də xahiş etdi ki, Sizin Hyu-Yorkdan Vaşinqtona getmək niyyətiniz vardırsa, orada vaxt tapıb onunla görüşəsiniz.
Bilirəm ki, Sizin vaxtınız çox məhduddur, Hyu-Yorkda çox vacib görüşlər keçirəcəksiniz. Lakin bununla belə o məndən xahiş etdi ki, bunları Sizə yetirim.
HEYDƏR ƏLİYEV: Sağ olun, təşəkkür edirəm.
ELİZABET CONS: Siz təyyarələrin hava məkanınızdan uçub keçməsinə icazə verdiyinizə görə, biz - Amerika Birləşmiş Ştatları Əfqanıstanda olan işlərimizi uğurla davam etdirə bilirik. Bildiyiniz kimi, hazırda, Vaşinqtonda və eləcə də beynəlxalq aləmdə Əfqanıstanın dircəldilməsinə böyük maraq vardır. Bilirsiniz ki, bu, bütün dünya üçün vacib hadisədir.
Bildiyiniz kimi, Tokioda Əfqanıstana dair keçirilən müşavirə çox uğurla başa çatmışdır və bizim hamımız həmin konfrans haqqında eşitdiyimiz xəbərlərdən məmnunuq. Həmin görüşlərin davamı kimi, - bu Sizə də məlumdur, - Həmid Karzayi hazırda Vaşinqtonda görüşlər keçirir.
Məlum olduğu kimi, Əfqanıstanda keçirilən digər əməliyyatlar beynəlxalq təhlükəsizlik qüvvələrinin keçirdiyi əməliyyatlardır. Bildiyiniz kimi, hazırda orada Böyük Britaniya kontingenti işləyir. Amerika Birləşmiş Ştatlarının özü həmin əməliyyatlarda iştirak etməsə də biz britaniyalıların, almanların və türklərin orada olmasına yaxından yardım edirik. Biz çalışırıq ki, Həmid Karzayın orada təhlükəsiz fəaliyyət göstərməsini təmin edək.
Cənab Prezident, Əfqanıstanla bağlı danışıqlar, fikir mübadilələri yekun səviyyəyə çatdıqdan sonra biz, Sizinlə bu barədə böyük məmnuniyyətlə söhbət edərdik. Böyük məmnuniyyət hissi ilə Sizin də məsləhətinizi öyrənərdik ki, həmin ölkənin təhlükəsizliyini neçə təmin edək.
Əfqanıstanla və bu regionla bağlı bütün məsələlərdə biz, eyni zamanda, Moskva ilə də sıx əlaqə saxlayırıq. Amerika Birləşmiş Ştatlarının və Rusiyanın birgə işçi qrupu lap tezliklə görüşəcəkdir. Bu işçi qrupu Əfqanıstanla bağlı məsələ üzərində işləyir. Amerika Birləşmiş Ştatları tərəfindən həmin işçi qrupunun rəhbəri cənab Armitacdır. Siz onu çox yaxşı tanıyırsınız. O, Sizə öz hərarətli salamlarını yetirir. Rusiya tərəfindən isə həmsədr Trubnikovdur.
Cənab Prezident, məlum olduğu kimi, sizin özünüz də bir neçə gün əvvəl Moskvaya səfərdən qayıtmısınız. Bu həftənin beşinci günü mən artıq geriyə - Amerika Birləşmiş Ştatlarına dönəcəyəm. Dəqiq bilirəm, geriyə dönən kimi, cənab Armitac mənimlə görüşmək, Sizin fikirlərinizi öyrənmək istəyəcək ki, biz Rusiya ilə münasibətlərimizi, gələcək danışıqlarımızı və fikir mübadiləsini hansı səmtə yönəldək.
HEYDƏR ƏLİYEV: Sağ olun, təşəkkür edirəm. Bir daha bəyan edirəm ki, biz 11 sentyabr hadisələrindən sonra tutduğumuz mövqeyi indiyə qədər də davam etdiririk. Biz beynəlxalq terrorizmə qarşı mübarizədə və antiterror əməliyyatlarının həyata keçirilməsində Amerika Birləşmiş Ştatları ilə və bu alyansa daxil olan ölkələrlə bir yerdəyik və bundan sonra da bir yerdə olacağıq.
Əfqanıstandakı bütün tədbirləri uğurla keçirməyiniz, təbiidir ki, bütün dünyada, o cümlədən bizdə də çox müsbət münasibət oyadıbdır. Mən bununla sizi təbrik edirəm. Hesab edirəm ki, bundan sonra işlər daha da asan olacaqdır. Biz indiyə qədər sizə yardım etmişik, bundan sonra da öz yardımımızı edəcəyik. Bundan biz imtina etmirik. Təyyarələriniz Azərbaycan üzərindən uçur və bundan sonra da uça bilər, lazım olan vaxtda yerə də enə bilir. Belə hallar da olur.
ELİZABET CONS: Cənab Prezident, çox sağ olun.
HEYDƏR ƏLİYEV: Mən bunların hamısına razılıq vermişəm.
Təbiidir ki, Əfqanıstanın gələcəyi və sizin işləriniz çox böyük bir zaman tələb edəcəkdir. Antiterror əməliyyatları və beynəlxalq terrorizmlə mübarizə barəsində mən bu günlərdə, Moskvada Prezident Putinlə də çox ətraflı danışıqlar apardım. Bunu siz bilirsiniz. Çünki Prezident Putin mənə dedi ki, Amerika Birləşmiş Ştatları ilə Rusiya bu sahədə çox sıx əməkdaşlıq edir. Eyni zamanda, o, bildirdi ki, Rusiya, onun Prezidenti Putin bu əməkdaşlıqdan çox razıdır. O deyir ki, bu əməkdaşlıq çox faydalıdır. Mən hiss etdim ki, Rusiya bundan sonra da bu əməkdaşlığı davam etdirəcəkdir. Cənab Putin də bilir ki, biz bu alyansda iştirak edirik, Sizin ölkənin təyarələri bizim ərazimizin üzərindən uçurlar. Bunların hamısı məlumdur. Beləliklə, mən hesab edirəm ki, Rusiya ilə sizin bu əməkdaşlığınız Əfqanıstanda, ümumiyyətlə bütün bu bölgədə aparacağınız işlər üçün çox yaxşı bir imkan yaradır.
Mən məmnunam ki, Prezident Buş, vitse-prezident Çeyni, dövlət katibi Kolin Pauell və nazir Ramsfeld və Azərbaycanın bu sahədə gördüyü xırda işləri qiymətləndirirlər.
Dostum cənab Armitaca məndən salam çatdırın. Ona deyin ki, mən Rusiya-Amerika Birləşmiş Ştatları müştərək komissiyasının işlərində ona uğurlar arzulayıram. Güman edirəm ki, uğurlar olacaqdır.
Sağ olun.
Qəbulda Prezidentin katibliyinin rəisi Dilarə Seyidzadə, Prezidentin icra aparatının xarici əlaqələr şöbəsinin müdiri Novruz Məmmədov, ABŞ-ın Bakıdakı səfiri Ross Uilson iştirak edirdilər.
Foto Yaşar Xəlilovundur