Fevralın 7-də Azərbaycan Respublikasının Prezidenti İlham Əliyev Kremldə, onun üçün ayrılmış iqamətgahda Rusiya Federasiyasının xarici işlər naziri İqor İvanovu qəbul etmişdir.

Prezident İlham Əliyev söhbət zamanı bidirdi ki, son illər Azərbaycan- Rusiya münasibətləri sürətlə inkişaf edir və onun Moskvaya səfəri zamanı aparılan danışıqlarda əməkdaşlığın bu perspektivləri geniş müzakirə olunmuşdur. Dövlətimizin başçısı vurğuladı ki, onun keçirdiyi görüşlərin əsas mövzularından biri beynəlxalq terrorizmə qarşı mübarizə ilə bağlı idi.

Azərbaycan Prezidenti son üç ildə ölkələrimizin xarici siyasət idarələrinin fəaliyyətinin əlaqələndirilməsində nəzərə çarpan müsbət meyli xüsusi vurğuladı. Dövlətimizin başçısı dedi ki, prezidentlər Heydər Əliyevin və Vladimir Putinin siyasi iradəsi sayəsində indi Azərbaycanla Rusiya arasında regional və beynəlxalq məsələlərdə heç bir fikir ayrılığı yoxdur.

Səmimi görüşə görə minnətdarlığını bildirən Rusiyanın xarici işlər naziri İqor İvanov vurğuladı ki, fevralın 6-da Moskvada törədilmiş terror aktı ölkələrimizin istər Qafqaz regionunda, Rusiyada, istərsə də beynəlxalq aləmdə terrorizmlə mübarizədə səylərini birləşdirməsinin vacibliyini bir daha təsdiqlədi.

Söhbət zamanı beynəlxalq və regional problemlərə, habelə qarşılıqlı maraq doğuran digər məsələlərə də toxunuldu.

X X X

Görüşdən sonra nazir İqor İvanov AZƏRTAC-ın və Azərbaycan televiziyası müxbirlərinə müsahibə verdi.

SUAL: Azərbaycan Prezidentinin rəsmi səfərinin nəticələri barədə fikrinizi bilmək olarmı?

CAVAB: İlk növbədə, biz bu səfərin uğurlu nəticələrindən çox razı qaldığımızı bildirmək istəyirik. Azərbaycan Prezidenti bir az əvvəl təsdiq etdi ki, o, Rusiya Prezidenti ilə apardığı danışıqların məzmunundan, xarakterindən və əldə olunmuş nəticələrdən çox razıdır. Bütün istiqamətlərdə münasibətlərimizi inkişaf etdirmək ümumi marağımız daxilindədir. Bizim bundan ötrü bütün lazımi imkanlarımız var və onlardan xalqlarımızın mənafeyi naminə, iki ölkə arasında dostluq və əməkdaşlıq naminə istifadə etməliyik. Şübhə yoxdur ki, Azərbaycan Prezidentinin Moskvaya səfəri, burada aparılmış danışıqlar bu münasibətlərin tərəfdaşlıq xarakterini də, xalqlarımız arasında əzəldən mövcud olan ənənəvi dostluq əlaqələrini də möhkəmləndirəcəkdir.

SUAL: Cənab nazir, Rusiya Dağlıq Qarabağ münaqişəsinin nizama salınmasında səylərini gücləndirəcəkmi?

CAVAB: Dünən Rusiya Prezidenti bir daha nəzərə çarpdırdı ki, biz postsovet məkanında hələ də qalmaqda olan bütün münaqişəli vəziyyətlərin tezliklə həllində maraqlıyıq. Əlbəttə, onların arasında Dağlıq Qarabağ problemi də böyük narahatlıq doğurur. Bu problem təkcə Azərbaycan və Ermənistan üçün deyil, həm də Rusiya üçün, ikitərəfli münasibətlərimiz üçün ağır bir yükdür. Azərbaycan və Ermənistanı çıxsaq, hər hansı digər ölkə ilə müqayisədə, biz bu münaqişənin tezliklə nizama salınmasında, deyərdim ki, daha çox maraqlıyıq. Qarşılıqlı məqbul bir qərar tapılması üçün biz həm ikitərəfli səviyyədə, həm də ATƏT-in üçlüyü çərçivəsində maksimum səy göstərəcəyik.

SUAL: Rusiya tərəfi Azərbaycan Prezidentinin səfərinin nəticələrindən razıdırmı?

CAVAB: Əlbəttə. Mən sizinlə söhbətə elə bundan başladım. Rusiya Prezidenti Vladimir Vladimiroviç Putinin dünən danışıqlardan sonra və birgə mətbuat konfransında dediyi kimi, Rusiya tərəfi bu səfərin yekunlarından razıdır. Biz razı qaldıq ki, Heydər Əlirza oğlunun apardığı və iki ölkə arasında münasibətləri çox yüksək səviyyəyə qaldırmağa imkan verən xəttə sadiqlik bir daha təsdiq edildi. Əminik ki, bu xəttin davam etdirilməsi hər iki ölkələrimizin mənafelərinə uyğundur. Odur ki, Rusiya-Azərbaycan münasibətlərinin inkişafına biz də öz tərəfimizdən kömək edəcəyik.