Azərbaycan Respublikasının Prezidenti İlham Əliyev noyabrın 21-də Prezident sarayında məşhur iqtisadçı, Nobel mükafatı laureatı, Kolumbiya Universitetinin professoru Cozef Stiqlitsi qəbul etmişdir.

Qonağı səmimiyyətlə qarşılıayan Azərbaycan dövlətinin başçısı İLHAM ƏLİYEV dedi:

- Hörmətli qonaq, mən Sizi ürəkdən salamlayıram.

Siz artıq bir neçə gündür Bakıdasınız, eşitdiyimə görə, burada çox fəal işləyirsiniz, seminarlar keçirirsiniz. Əlbəttə, Sizin məsləhətləriniz, tövsiyələriniz bizim üçün çox əhəmiyyətli və dəyərlidir. Siz dünya söhrətli alimsiniz, iqtisadi sahədə Nobel mükafatına layiq görülmüsünüz. Yəqin ki, Azərbaycan da iqtisadi baxımdan Sizin diqqətinizi cəlb etmişdir.

Ölkəmiz iqtisadi cəhətdən sürətlə inkişaf edir. Son illər ərzində Azərbaycanda aparılan iqtisadi islahatlar çox müsbət nəticələr verməkdədir. Bütün makroiqtisadi göstəricilər bir daha sübut edir ki, Azərbaycanda uğurlu iqtisadi siyasət aparılır. Son 6-7 il ərzində ümumi daxili məhsulun, o cümlədən sənaye istehsalının artımı, həm də digər iqtisadi göstəricilər Azərbaycanı dünyada dinamik inkişaf edən ölkə kimi tanıtmışdır.

Eyni zamanda, biz gələcəyə də çox nikbinliklə baxırıq. Bir neçə ildən sonra Azərbaycan iqtisadi cəhətdən daha da güclənəcəkdir. Əlbəttə ki, burada neft amili önəmli rol oynayır. Bilirəm ki, Neft Fondunun yaradılması və onun fəaliyyəti müzakirə obyektinə çevrilmişdir və Siz burada keçirdiyiniz görüşlərdə bu məsələyə diqqət yetirmisiniz. Deyə bilərəm ki, Azərbaycan bu istiqamətdə də, neftdən gələn gəlirləri daha etibarlı saxlamaq üçün çox önəmli addımlar atmışdır. Neft Fondu çox şəffaf şəkildə fəaliyyət göstərir və onun fəaliyyəti beynəlxalq maliyyə qurumları tərəfindən bəyənilir.

Bir sözlə, Azərbaycan gələcəkdə də regionda mühüm rol oynayacaqdır. Əminəm ki, iqtisadiyyatımız daha sürətlə inkişaf edəcəkdir və bu, bizə Azərbaycanı hərtərəfli inkişaf etmiş ölkəyə çevirməyə imkan verəcəkdir.

Səmimi qəbula görə təşəkkürünü bildirən COZEF STİQLİTS dedi:

- Sizinlə görüşmək imkanı yaratdığınıza görə minnətdarlığımı bildirirəm.

Biz Azərbaycanda çox maraqlı bir həftə keçirdik və böyük qonaqpərvərlik gördük. Çoxlu sayda müzakirələrimiz oldu, mühazirələr oxuduq və fikir mübadiləsi apardıq.

Sizin prezidentlik kampaniyanız dövründə dediyiniz bir sözü xatırlayıram və onu çox bəyənirəm. Siz demişdiniz ki, Azərbaycan vətəndaşları üçün yüz minlərlə iş yerləri açılacaqdır. Bu, mənə Klintonun seçkiqabağı kampaniya zamanı dediyi sözləri xatırlatdı. Mən onun müşaviri olmuşam və o zaman amerikalılara söz verdi ki, 8 milyonadək Amerika vətəndaşı üçün iş yerləri açılacaqdır. Xüsusilə keçid dövrünün çətinliklərini yaşayan Azərbaycan üçün bu, çox vacib məsələdir. Çünki ölkəniz işsizlikdən əziyyət çəkir.

Siz doğru buyurdunuz ki, həqiqətən, bizim maraq dairəmizdə olan əsas məsələlərdən biri Neft Fondu ilə bağlıdır və bu Fondun şəffaflığı yalnız müqavilələrə və pay bölgüsü işlərinə aid deyildir. Bu, eyni zamanda, neft sahəsinə gələn gəlirlərə və xərclərə də aiddir. Mən çox şadam ki, Azərbaycanda hamı bunun vacib məsələ olduğunu dərk edir və bu məsələyə çox diqqətlə yanaşır. Hamıya məlumdur ki, Azərbaycanda neft 25 il və yaxud daha artıq müddətə olacaqdır. Bu imkan bir dəfə verilir və ondan maksimum istifadə edib digər sahələri inkişaf etdirmək lazımdır.

Bizim müzakirə etdiyimiz daha bir məsələ də ondan ibarət olmuşdur ki, bir çox ölkələrdə, - bunu təəssüflə deməliyəm, - neft ehtiyatları, əslində, onların xalqlarının xoşbəxtliyinə deyil, əksinə işləyir. Bu da, bildiyiniz kimi, yerli pul vahidinin dəyərini itirməsi ilə bağlı olan məsələdir və biz iqtisadçılar bunu “holland sindromu” adlandırırıq. Əsas məsələ ondan ibarətdir ki, vergi siyasəti düzgün aparılmalı, iqtisadçıların dili ilə desək, mütərəqqi vergi siyasəti olmalıdır, yerli ehtiyatlar hökumətin nəzərdə tutduğu proqramlara yönəldilməlidir.

İLHAM ƏLİYEV: Çox sağ olun, mən Sizinlə tamamilə razıyam. Biz hamımız – hökumət də, ictimai qurumlar da, qeyri-hökumət təşkilatları da Azərbaycanın gələcəyi haqqında düşünməlidir. Biz hamımız ölkəmizin uzunmüddətli və davamlı inkişaf etməsini istəyirik. Neft nə vaxtsa tükənir və bu ehtiyatlar daimi deyildir. Düşünməliyik ki, 20-30 və yaxud 50 il bundan sonra Azərbaycanın gələcəyi necə olacaqdır. İndi biz yoxsulluqla ciddi mübarizə aparırıq, işsizliyi aradan qaldırmaq üçün proqram hazırlanır və əminəm ki, mənim söylədiyim rəqəmlər özünü doğruldacaqdır.

Eyni zamanda, neft gələcək nəsillər üçün də xidmət etməlidir. Məhz bu məqsədlə Dövlət Neft Fondu yaradılmışdır. Bu Fond çox şəffaf bir qurumdur. Bundan başqa, Azərbaycan beynəlxalq şəffaflıq təşəbbüsünə də qoşulmuşdur. Bu, bizim siyasətimizdir və əminəm ki, neftdən əldə olunan gəlirlər çox səmərəli şəkildə xərclənəcəkdir.

Biz Neft Fondunu yaradarkən digər ölkələrin təcrübəsini də öyrənmişik və əminəm ki, seçdiyimiz model bütün müasir tələblərə cavab verir. Siz çox düzgün dediniz ki, bir çox neft hasil edən ölkələrdə iqtisadi durum o qədər də ürəkaçan deyildir. Biz bu mənfi təcrübəni də öyrəndik və başqa ölkələrdə yol verilmiş səhvləri Azərbaycanda təkrar etməyəcəyik.

Azərbaycan müstəqil dövlət kimi öz təbii ehtiyatlarından başqa ölkələrə nisbətən geç istifadə etməyə başlayıbdır. Əlbəttə, bir tərəfdən bunun obyektiv səbəbləri var idi, digər tərəfdən müsbət haldır ki, bir digər ölkələrdə baş verən hadisələrə nəzər salaraq, qabaqcıl təcrübəni tətbiq edəcəyik, mənfi təcrübədənsə uzaq olmağa çalışacağıq.

Mən hökumət üzvlərinə müraciət edərək demişdim ki, gərək biz hamımız neft amilini kənara qoyaq. Orada işlər çox uğurla davam edir və bu sahə Azərbaycana böyük həcmdə valyuta ehtiyatları gətirəcəkdir. Biz öz siyasətimizi elə aparmalıyıq ki, sanki Azərbaycanda neft yoxdur. İqtisadiyyatın bütün sahələri – ilk növbədə qeyri-neft sektoru, infrastruktur inkişaf etməlidir. Ancaq bu yolla biz Azərbaycanı hərtərəfli inkişaf etmiş ölkəyə çevirə bilərik.

Bir daha Sizə “Xoş gəlmisiniz” deyirəm və işlərinizdə uğurlar diləyirəm.

X X X

Qəbulda Prezidentin İcra Aparatının xarici əlaqələr söbəsinin müdiri Novruz Məmmədov, ABŞ-ın ölkəmizdəki səfiri Rino Harniş iştirak edirdilər.