İran İslam Respublikasının Prezidenti Məhəmməd Xatəminin Azərbaycana rəsmi səfəri çərçivəsində ölkəmizə gəlmiş İran iş adamlarının iştirakı ilə Bakı Biznes Mərkəzində iqtisadi forum keçirilmişdir.

İqtisadi İnkişaf Nazirliyinin mətbuat xidmətindən AZƏRTAC-a bildirmişlər ki, forumda qonşu ölkə neft-kimya, kənd təsərrüfatı (quşçuluq, meyvəçilik), yeyinti (spirtsiz içkilər istehsalı, şirniyyat və sair), əczaçılıq, dəzgahqayırma, məişət avadanlığı istehsalı, nəşriyyat və ticarət sahələri üzrə (Azərbaycanda fəaliyyət göstərən İran şirkətləri də daxil olmaqla) 55-ə yaxın şirkət ilə təmsil olunmuşdur.

Tədbirdə Azərbaycanın 60-a yaxın iş adamı iştirak etmişdir.

Forumu iqtisadi inkişaf naziri Fərhad Əliyev açaraq qonaqları salamlamış, Azərbaycan xalqının ümummilli lideri Prezident Heydər Əliyevin 2002-ci ilin mayında İran İslam Respublikasına rəsmi səfərindən sonra ölkələrimiz arasında əlaqələrin daha da genişləndiyini, yeni inkişaf mərhələsinin başlandığını, dövlət başçılarının Tehranda keçirilən görüşünün İran və Azərbaycan arasında iqtisadi əməkdaşlığın genişlənməsinə böyük zəmin yaratdığını vurğulamışdır.

Ötən ilin payızında Bakıda Azərbaycan-İran iqtisadi forumunun keçirilməsi və bir sıra birgə layihələrin işlənməsi üzrə razılıq əldə olunması, İran rəsmilərinin Azərbaycana səfərləri zamanı iqtisadi əməkdaşlıq məsələlərinin mütəmadi olaraq müzakirə edilməsi də məhz ümummilli liderimizin qonşu ölkəyə rəsmi səfərinin müsbət nəticələri kimi qiymətləndirilir.

İran İslam Respublikasının Prezidenti Seyid Məhəmməd Xatəminin və Azərbaycan Respublikasının Prezidenti İlham Əliyevin avqustun 5-də Bakıda keçirilən görüşləri qonşu ölkələrimiz arasında əlaqələrin daha da genişlənməsində olduqca əhəmiyyətlidir.

Qonşu ölkələrimiz arasında iqtisadi-ticarət əlaqələrinin inkişafı istiqamətində görülən işlərin tərkib hissəsi kimi, Bakı Biznes Mərkəzində keçirilən iqtisadi forum İran və Azərbaycan sahibkarlarının birbaşa görüşünə daha bir imkan yaratmışdır.

Forumda Azərbaycan-İran qarşılıqlı iqtisadi əməkdaşlığının genişləndirilməsi perspektivləri geniş müzakirə edilmişdir.

Aparılan danışıqların nəticəsi olaraq, Azərbaycanın “Büllur” İstehsalat Birliyi ilə İran İslam Respublikasının “İS İRAN” şirkəti arasında ildə 6 milyon ABŞ dolları məbləğində fərdi kompüter və digər elektron cihazların istehsalı üzrə Anlaşma Memorandumu imzalanmışdır.

Bundan başqa, forumda Bakı Biznes Mərkəzi ilə İran İslam Respublikasının Sənaye, Ticarət və Mədən Palatası arasında əməkdaşlıq üzrə niyyət protokolu da imzalanmışdır.

Görüşdə iştirak edən Azərbaycan və İran sahibkarları iqtisadiyyatın bir sıra sahələri üzrə qarşılıqlı əməkdaşlıq barədə razılığa gəlmişlər.

Azərbaycan-İran iqtisadi forumunun işində İran İslam Respublikasının kooperasiya naziri, Azərbaycan-İran müştərək komissiyasının həmsədri Əli Sufi, İran İslam Respublikası ticarət nazirinin müavini Müştəba Xosrovtac, Sənaye, Ticarət və Mədən Palatasının vitse-prezidenti Firudin Entizari, İranın Azərbaycandakı səfiri Əhəd Qəzai və Azərbaycanın İrandakı səfiri Abbasəli Həsənov və başqaları iştirak etmişlər.