AZƏRBAYCAN KARATEÇİLƏRİNİN KİYEVDƏ BÖYÜK NAİLİYYƏTİ

AZƏRTAC-ın xüsusi müxbiri Kiyevdən xəbər verir ki, Azərbaycanın karate-do komandası “Qlobal karate-do” Assosiasiyasının himayəsi ilə mayın 15-16-da Ukrayna paytaxtında keçirilən 4-cü Dünya kuboku yarışlarında böyük uğurla çıxış etmişdir. Rafael Məmmədovun başçılıq etdiyi 10 idmançımız “Meridian” idman kompleksində fərdi və komanda “kata”da, habelə “kumite”də yüksək ustalıq göstərərək, 6 qızıl, 9 gümüş və 2 bürünc medala layiq görülmüşdür.

Qızıl mükafatları 18-39 yaşlılar qrupunda Rafael Məmmədov (“kata), 10 yaşlı Elvin Eyvazov (“kata”), 11 yaşlı Azər Qarayev (həm “kata”da, həm də “kumite”də), 14 yaşlı Arzu Quliyeva (“kumite”) və 18-19 yaşlı idmançılar arasında Xəyal Fərhadov (“kumite”) qazanmışlar.