Ölkəni, xalqı dünyada idman qədər 

                                                                           başqa heç nə tanıda bilmir. 

                                                                                                              Heydər Əliyev

AZƏRTAC xəbər verir ki, avqustun 3-də Park-İnn mehmanxanasında Azərbaycan Prezidenti İlham Əliyevin olimpiya hərəkatındakı fəaliyyətinin on illiyinə həsr olunmuş “10 il öncə başlanan yol” kitabının təqdimat mərasimi keçirilmişdir.

Mərasimin əvvəlində ümummilli liderimiz Heydər Əliyevin və Azərbaycan Prezidenti, MOK-un prezidenti İlham Əliyevin idmançılarla görüşlərini, idmançılarımızın müxtəlif beynəlxalq yarışlarda, olimpiadalarda çıxışlarını, ölkəmizin müxtəlif bölgələrində tikilib istifadəyə verilən olimpiya komplekslərinin açılışını əks etdirən sənədli film göstərilmişdir.

Tədbiri Azərbaycan Dövlət İdman Akademiyasının rektoru, Milli Məclisin üzvü Ağacan Abiyev açaraq, 1997-ci il iyulun 31-də respublikamızın idman ictimaiyyətinin çoxsaylı müraciətlərindən sonra o zaman Dövlət Neft Şirkətinin birinci vitse-prezidenti vəzifəsində işləyən İlham Əliyevin Milli Olimpiya Komitəsinin prezidenti seçilməsinin ölkə həyatının çox mühüm bir sahəsində əsl dönüşün başlanğıcını qoyduğunu, idman strukturlarındakı xaosu, ziddiyyətləri qısa müddətdə aradan qaldırdığını faktlarla diqqətə çatdırmış, əlamətdar hadisə münasibətilə çoxminlik idmançılar ordusunu, gəncləri təbrik etmişdir. Respublikamızın onillik idman həyatının salnaməsi olan belə bir nəfis tərtibatlı kitabın nəşrini yüksək qiymətləndirmişdir.

Gənclər və idman naziri Azad Rəhimov çıxışında Azərbaycan Prezidenti İlham Əliyevin Milli Olimpiya Komitəsinə rəhbərliyi dövründə ölkəmizin idman həyatındakı vüsətli inkişafdan, idman təşkilatlarının strukturlarında aparılmış uğurlu islahatlardan, on ildə görülmüş işlərdən, ölkəmizin beynəlxalq idman əlaqələrinin qurulması, respublikamızda idmanın maddi-texniki bazasının möhkəmləndirilməsi, bədən tərbiyəsi və idmanın kütləviliyinə nail olunması sahəsində qazanılmış nailiyyətlərdən ətraflı danışmışdır. Dövlətimizin başçısının MOK prezidenti kimi olduqca məqsədyönlü fəaliyyəti nazirliyin nəşr etdirdiyi kitabda geniş işıqlandırılmışdır. Kitabın elektron versiyasının da hazırlanıb nazirliyin saytında yerləşdiriləcəyi, ingilis dilinə tərcümə olunub nəşr ediləcəyi bildirilmişdir.

Milli Məclis sədrinin müavini Valeh Ələsgərov ulu öndərimiz Heydər Əliyevin Azərbaycan idmanının inkişafına daim diqqət və qayğı göstərdiyini vurğulamışdır. O demişdir ki, İlham Əliyevin MOK-un prezidenti seçilməsi ilə respublikamızın idman həyatında yeni bir mərhələ başlanmışdır. Müasir dövrdə Azərbaycanda bədən tərbiyəsi və idmanın sürətli inkişafı onun adı ilə bağlıdır. İndi idman, bədən tərbiyəsi təkcə gənclərimizin yox, bütün cəmiyyətin diqqət mərkəzində olan bir sahədir. Milli Məclis sədrinin müavini dövlətimizin başçısının respublikanın sosial-iqtisadi inkişafını təmin etməklə yanaşı, Azərbaycanın idman ölkəsi kimi də tanınması üçün ardıcıl və səmərəli işlər gördüyünü, bütün bunlar barədə kitabda ətraflı məlumat verildiyini vurğulamışdır.

Azərbaycan Prezidentinin İcra Aparatının İctimai-siyasi məsələlər şöbəsinin müdiri Əli Həsənov çıxışında vurğulamışdır ki, dünyada dövlətin rəsmən tanınması onun Birləşmiş Millətlər Təşkilatına qəbul olunmasından sonra başlanır. Millətin tanınması üçün dövlət mütləq olimpiya hərəkatında iştirak etməlidir. Olimpiya hərəkatı dünyada yeganə sahədir ki, orada istisnasız olaraq, bütün dövlətlər iştirak hüququna malikdir. Lakin bu hüququ əldə etmək üçün müəyyən prosedurlar var və bunlar da ilk növbədə, olimpiya lisenziyasını almaq uğrunda yarışdan başlanır. Bu isə, ölkə daxilində dövlət səviyyəsində idman siyasətinin yürüdülməsindən və olimpiya hərəkatının formalaşdırılmasından başlayır. 1997-ci ildə cənab İlham Əliyev Milli Olimpiya Komitəsinə prezident seçiləndə mənə də xoşbəxtlik nəsib oldu ki, həmin iclasda Olimpiya Komitəsinin üzvlərindən biri seçildim. İnanın ki, o zaman Azərbaycanın, bəlkə də, ən bərbad sahəsi idman idi.

Ə.Həsənov xatırlatmışdır ki, ümummilli liderimiz Heydər Əliyev 1993-cü ildə hakimiyyətə qayıdandan sonra gənclər-idman siyasətini dövlət siyasəti səviyyəsinə qaldırmışdır. Onun 1994-cü ildə yaratdığı ilk yeni nazirlik Gənclər Nazirliyi olmuşdur. O vaxta qədər Azərbaycan hökuməti özünü elə aparırdı ki, öz gənclərinin qayğısına qalır, onların problemlərinin həlli, sağlam gəncliyin yetişdirilməsi ilə məşğul olurdu. Gənclik isə özünü elə aparırdı ki, Azərbaycan dövlətinə, millətinə gərəkli nəsil kimi inkişaf edir. Lakin, sözün həqiqi mənasında, nə dövlət gənclərlə məşğul olur, nə də gənclər Azərbaycan dövlətçiliyinə layiq şəkildə yetişirdi. Ona görə də Azərbaycanda əsl idmançıları barmaqla saymaq mümkün idi. Yaxşı idmançıların əksəriyyəti respublikanı tərk etmişdi, kənarda himayə axtarırdılar. 1997-ci ildə özünün həddən artıq məşğulluğuna, Azərbaycanın neft strategiyasının, yeni neft siyasətinin formalaşmasında aparıcı simalardan biri olmasına baxmayaraq, İlham Əliyev respublika idmançılarının dəvəti ilə Milli Olimpiya Komitəsinə rəhbərlik etməyi öz üzərinə götürdü. İlham Əliyev Azərbaycan idmanına nə gətirdi? İlk növbədə deməliyik ki, Azərbaycan idmanına özünə xas olan mərdlik, iradə və əzmkarlıq gətirdi. Biz Azərbaycan idmançılarının bu keyfiyyətləri 2000-ci ilin Sidney və 2004-cü ilin Afina olimpiadalarında nümayiş etdirmələrinin şahidi olduq. İlham Əliyev Azərbaycan idmanına inkişaf etmiş maddi-texniki baza gətirdi.

Bu gün Azərbaycan idmanının maddi-texniki bazası böyük dövlətlərin malik olduğundan qat-qat yüksək səviyyədədir. Azərbaycan idmanın maddi-texniki potensialı ilə dünyanın diqqət mərkəzindədir. Olimpiya çempionu Fərid Mansurov, Avarçəkmə federasiyasının prezidenti Elçin Zeynalov, cüdo üzrə məşqçi Ağayar Axundzadə, Təhsil Nazirliyi İdman mərkəzinin direktoru Cəfər Hümbətov çıxışlarında Prezident İlham Əliyevin idmançıların sosial, maddi vəziyyətinin yaxşılaşması, beynəlxalq yarışlarda uğurlu çıxışları, olimpiya hərəkatının genişlənməsi, bölgələrdə bədən tərbiyəsi və idmanın kütləviliyi, gənclərimizin fiziki cəhətdən sağlam böyüməsi üçün həyata keçirdiyi ardıcıl tədbirlərin cəmiyyətdə böyük razılıq hissi ilə qarşılandığını bildirmişlər. Onlar gələcəkdə uğurların daha da artacağına əminliklərini söyləyərək bildirmişlər ki, Azərbaycan idmançıları 2008-ci ilin prezident seçkilərində yenidən İlham Əliyevin namizədliyini dəstəkləyəcəklər.

Ağacan Abiyev mərasimə yekun vuraraq, Milli Olimpiya Komitəsinin ötən 10 ildəki fəaliyyətinin kitabda lazımınca əhatə olunduğunu bir daha vurğulamış və sözlərini dövlətimizin başçısı, MOK-un prezidenti İlham Əliyevin bu fikirləri ilə bitirmişdir: “Biz Azərbaycan idmanının şərəfini ləyaqətlə qorumağa, ölkənin şan-şöhrətini yüksəltməyə söz vermişdik. Biz bunu etdik. İndi idmançılarımız dünyanın ən mötəbər yarışlarında böyük qələbələr qazanırlar. Dünyanın müxtəlif ölkələrinin möhtəşəm idman saraylarında Azərbaycan himni səsləndirilir, Azərbaycan bayrağı qaldırılır”.

İdeya müəllifi gənclər və idman naziri Azad Rəhimov olan kitab İstanbulda nəfis şəkildə çap edilmişdir.