AZƏRTAC xəbər verir ki, avqustun 8-də “Azəriqaz” Qapalı Səhmdar Cəmiyyətinin Yeraltı Qaz Saxlama İstehsalat İdarəsində mətbuat konfransı keçirilmişdir.

İdarənin rəisi Yaşar Quliyev ölkəmiz üçün mühüm dövlət əhəmiyyətli bu idarənin iki obyekti - Qaradağ və Qalmaz yeraltı qaz saxlama stansiyalarının texniki-iqtisadi imkanları, funksiyaları, fəaliyyəti haqqında məlumat vermişdir. O demişdir ki, Qaradağ saxlama stansiyasının ümumi sahəsi 1530 hektar, aktiv qaz tutumu 3 milyard kubmetr, bufer tutumu 900 milyon kubmetrdir. Burada hər birinin dərinliyi 3500-3800 metr olan 42 quyu istismardadır.

Qalmaz saxlama stansiyası isə Bakıdan 70 kilometr cənub-şərqdə yerləşir, sahəsi 970 hektardır. Burada hər birinin dərinliyi 1500-1800 metr olan 109 quyudan 105-i istismar olunur. Aktiv qaz tutumu 1,5 milyard, bufer tutumu 700 milyon kubmetr, ümumi tutumu 2,2 milyard kubmetrdir.

Hər iki stansiyaya ötən ilin payız-qış mövsümü başlanana qədər 1 milyard 26 milyon kubmetr qaz vurulmuş, aprelin əvvəlinədək onlarda 206 milyon kubmetr qaz qalmışdır. Bu qazvurma mövsümü başlanandan hər iki anbara əlavə 512 milyon kubmetr qaz vurulmuşdur. 6 ay davam edəcək qazvurma prosesi zamanı yeraltı anbarlara rekord miqdarda - 1 milyard 70 milyon kubmetr qaz vurulacaqdır. Hazırda “Azəriqaz” sistemi vasitəsilə gündə orta hesabla 6,6-7 milyon kubmetr qaz qəbul edilir.

İdarənin rəisi ölkə əhalisinin və sənaye müəssisələrinin qazla fasiləsiz və etibarlı təminatında əsas rol oynayan bu stansiyaların ümummilli liderimiz Heydər Əliyevin respublikamıza birinci rəhbərliyi dövründə inşa edildiyini, hər iki obyektin ulu öndərin xalqımıza, ölkəmizə əvəzsiz, uzaqgörən töhfəsi olduğunu, Azərbaycan Prezidenti İlham Əliyevin də hər iki qaz anbarının aktiv tutumunun artırılmasına xüsusi diqqət və qayğı göstərdiyini vurğulamışdır. Bildirmişdir ki, dövlətimizin başçısının 2005-2015-ci illərdə yanacaq-enerji kompleksinin inkişafına dair imzaladığı dövlət proqramında bu stansiyaların yenidən qurulması, aktiv tutumunun 3 milyard kubmetrə çatdırılması barədə göstərişinin yerinə yetirilməsi üçün bütün tədbirlər görülür. Artıq hollandiyalı mütəxəssislərin iştirakı ilə müvafiq texniki-iqtisadi əsaslandırma hazırlanmışdır. Sənəd təsdiq olunmaq üçün respublika hökumətinə göndərilmişdir. Bu layihənin həyata keçirilməsi nəticəsində hər iki anbarın istismar müddəti başa çatmış bütün avadanlığı yeniləşib müasirləşdiriləcək, ölkəmizin mavi yanacaqla fasiləsiz, daha etibarlı təminatı problemi həll olunacaqdır.

Yaşar Quliyev hər iki stansiyanın mühafizəsinin, təhlükəsizlik xidmətinin təşkilinin, texniki təmir işlərinin, əsasən, idarənin öz işçiləri tərəfindən yerinə yetirildiyini diqqətə çatdırmışdır. Stansiyaların ərazisində qanunsuz yaşayan 106 ailənin oradan çıxarılması üçün məhkəmə iddiası qaldırılmışdır.

İdarə rəisi qeyd etmişdir ki, kollektiv üzvlərinin orta aylıq əməkhaqqı ötən ildəki ilə müqayisədə 80 faiz artırılaraq 250 manata çatdırılmışdır. Yay mövsümü başlanandan bəri həftənin şənbə və bazar günləri işçilərin Qəbələ, İsmayıllı və Ağsunun səfalı guşələrinə səfərləri təşkil olunur, çadırlarda yay düşərgələri salınır.

Yaşar Quliyev sonda jurnalistlərin suallarına cavab vermişdir. Sonra

KİV nümayəndələri Qaradağ saxlama stansiyası ilə tanış oldular.