RƏSMİ XRONİKA
AZƏRBAYCAN PREZİDENTİ HEYDƏR ƏLİYEVİN ALMANİYANIN “MERCEDES-BENZ” FİRMASININ RƏHBƏRLƏRİ İLƏ GÖRÜŞÜ
Dövlətimizin başçısını və onu müşayiət edən şəxsləri hərarətlə salamlayan firmanın idarə heyətinin üzvü cənab Diter Setsşe Azərbaycan rəhbərini burada görməyi özləri üçün böyük şərəf saydığını söylədi. Qeyd olundu ki, “Mercedes-Benz” firması yük, minik avtomobilləri və avtobuslar istehsal edir. Firmanın nümayənədəsi Prezident Heydər Əliyevə müraciətlə dedi ki, fürsətdən istifadə edib bu gün Sizə bəzi məhsullarımızı göstərmək istəyirik. Biz Azərbaycan Respublikasının inkişafını böyük sevinclə və diqqətlə izləyirik. Ona görə də Sizin ölkəmizə səfər etməyinizə çox şadıq.
Prezident Heydər Əliyev ölkəmiz haqqında deyilən xoş sözlər üçün minnətdarlığını bildirərək qeyd etdi ki, müstəqil, azad, demokratik Azərbaycan bazar iqtisadiyyatı yolu ilə gedərək dünya birliyi ilə sıx əlaqələr qurmağa çalışır. Almaniyanın nüfuzlu şirkətləri ilə sıx əlaqələr qurmağa respublikamızın xüsusi maraq göstərdiyini nəzərə çarpdıran Prezident Heydər Əliyev “Mercedes-Benz” ilə əməkdaşlığın da ölkəmiz üçün çox əhəmiyyətli olduğunu bildirdi.
Görüş zamanı Prezident Heydər Əliyev firmanın fəxri qonaqlar kitabına imza atdı. Dövlətimizin başçısına bu firmanın ilk minik avtomobilinin modeli təqdim edildi.
Görüşdən sonra Azərbaycan Prezidenti Heydər Əliyev “Mercedes-Benz” avtomobil firmasının son model avtomobillərinə baxdı. Dövlətimizin başçısı “Mercedes-Benz”in Türkiyədəki filialında istehsal olunmuş, üzərində müstəqil Azərbaycan dövlətinin bayrağı təsvir edilmiş avtobus ilə də yaxından tanış oldu, yığma sexini də gəzdi.
Daha sonra firmada Prezident Heydər Əliyevin şərəfinə rəsmi ziyafət verildi.