Azərbaycan Prezidenti Heydər Əliyev yanvarın 14-də Parisdə Fransa senatının sədri Rene Monori ilə görüşmüşdür.

Dövlətimizin başçısını səmimiyyətlə salamlayan və onunla görüşündən məmnun olduğunu bildirən cənab Monori ölkələrimiz arasında əlaqələrin hazırki inkişafından razılıqla bəhs etdi. Xəzərin Azərbaycan sektorundakı “Lənkəran-dəniz” və “Talış-dəniz” yataqlarının birgə işlənməsi barədə ARDNŞ ilə Fransanın “Elf Akiten” və “Total” şirkətləri arasında yanvarın 13-də Yelisey sarayında hər iki ölkə prezidentlərinin iştirakı ilə müqavilə imzalanması münasibətilə Prezident Heydər Əliyevi təbrik edən senatın sədrinin fikrincə, respublikamızın rəhbərinin Parisə rəsmi səfəri və imzalanan sənədlər dövlətlərimizin münasibətlərinin daha da yaxşılaşdırılmasında əhəmiyyətli rol oynayacaqdır. Sonra o, senatın strukturu, fəaliyyəti barədə dövlətimizin başçısına ətraflı məlumat verdi.

Ölkəmiz haqqında söylədiyi xoş sözlərə və verdiyi məlumatlara görə cənab Monoriyə təşəkkürünü bildirən Prezident Heydər Əliyev Prezident Jak Şirakın dəvəti ilə dost ölkəyə rəsmi səfərə gəlməsindən məmnunluqla söhbət açdı və Avropanın ən nüfuzlu dövlətlərindən biri olan Fransa ilə Azərbaycanın əməkdaşlığının durmadan inkişaf etdirilməsindən razılıqla bəhs etdi.

1993-cü ildə mərhum Prezident Fransua Mitteranın dəvəti ilə Fransada rəsmi səfərdə olduğunu xatırlayan dövlətimizin başçısı ötən 3 ildə ölkələrimiz arasındakı əməkdaşlığın möhkəmləndirilməsi sahəsində atılmış addımları müsbət qiymətləndirdi və Xəzərin Azərbaycan sektorundakı “Şahdəniz” yatağının birgə işlənməsi barədə 1996-cı ildə imzalanmış müqavilədə Fransanın “Elf Akiten” şirkətinin də iştirak etməsindən söhbət açdı.

Respublikamızın rəhbəri yanvarın 13-də Azərbaycan və Fransa prezidentlərinin iştirakı ilə Yelisey sarayında imzalanmış yeni müqavilənin ölkələrimizin iqtisadi əlaqələrinin daha da genişləndirilməsi üçün yeni möhkəm əsas olduğunu nəzərə çarpdırdı.

Respublikamızdakı ictimai-siyasi vəziyyətdən, müstəqillik qazanmış və bazar münasibətləri yolunu seçmiş Azərbaycanda demokratik hüquqi dövlət quruculuğu və iqtisadi islahatların həyata keçirilməsi sahəsində görülmüş tədbirlərdən bəhs edən Prezident Heydər Əliyev daha sonra bildirdi ki, Ermənistanın Azərbaycana hərbi təcavüzü ölkəmiz üçün ən ağrılı problemdir. Azərbaycan torpaqlarının 20 faizinin Ermənistan silahlı qüvvələri tərəfindən işğal olunduğunu, 1 milyondan çox vətəndaşımızın yerindən-yurdundan zorla qovulduğunu və hazırda çadırlarda ağır şəraitdə yaşadığını bildirən dövlətimizin başçısı Ermənistanın təcavüzü nəticəsində yaranmış vəziyyəti xəritə üzərində cənab Monoriyə ətraflı izah etdi.

Müharibədə 2 il 8 aydan bəri davam edən atəşkəsdən danışan dövlətimizin başçısı dedi ki, Azərbaycan Respublikası münaqişənin sülh yolu ilə başa çatdırılmasına kompromisli mövqedən yanaşır, problemin ATƏT-in Minsk qrupunun vasitəçiliyi ilə aradan qaldırılmasına xüsusi diqqət yetirir. 1996-cı il dekabrın əvvəlində ATƏT-in üzvü olan ölkələrin dövlət başçılarının Lissabon Zirvə görüşündə Ermənistan-Azərbaycan münaqişəsinin sülh yolu ilə aradan qaldırılması üçün qəbul edilmiş 3 əsas prinsipdən söhbət açan Prezident Heydər Əliyev bir daha bildirdi ki, biz Ermənistan silahlı qüvvələrinin işğal edilmiş torpaqlarımızdan çıxarılmasını, ölkəmizin ərazi bütövlüyünün təmin olunmasını, qaçqınlarımızın öz doğma yurdlarına qayıtmasını istəyirik və Azərbaycan dövlətinin tərkibində Dağlıq Qarabağa yüksək muxtariyyət statusu verməyə, Dağlıq Qarabağın bütün əhalisinin təhlükəsizliyini təmin etməyə hazırıq.

Respublikamızın rəhbəri beynəlxalq təşkilatların bu münaqişənin aradan qaldırılması yollarından bəhs edən qətnamələrinə, bütün ölkələr tərəfindən tanınan hüquqi normalara Ermənistanın məhəl qoymadığını nəzərə çarpdırdı və dedi ki, Ermənistan Dağlıq Qarabağı özünə birləşdirmək istəyir, bu isə yolverilməz bir haldır. Prezident Heydər Əliyev münaqişənin həllində Minsk qrupunun üzvü olan ölkələrin, o cümlədən Fransanın səylərinin artırılmasının vacib olduğunu vurğuladı.

Söhbət zamanı Azərbaycan və Fransa parlamentləri arasında əlaqələrin canlandırılmasının perspektivləri, təcrübə mübadiləsinin genişləndirilməsi, bir çox sahələrdə əməkdaşlığı daha da sıxlaşdırmaq məqsədilə nəzərdə tutulan layihələrin həyata keçirilməsi və digər məsələlər barədə də fikir mübadiləsi aparıldı.

Senatın sədri cənab Monori görkəmli siyasi xadim kimi tanınan Prezident Heydər Əliyevlə görüşündən məmnun olduğunu bir daha bildirərək dedi ki, Fransa dövləti və parlamenti Azərbaycanla əlaqələrin möhkəmləndirilməsinə xüsusi maraq göstərir və bunun üçün bütün zəruri məsələlərin həllinə yaxından kömək etməyə hazırdır.