Azərbaycan Respublikasının Prezidenti Heydər Əliyev fevralın 2-də Nyu-Yorkda, onun üçün ayrılmış iqamətgahda İsveçrə Konfederasiyasının prezidenti Kaspar Villiger ilə görüşmüşdür. 

Cənab Kaspar Villigeri səmimiyyətlə salamlayan respublikamızın Prezidenti HEYDƏR ƏLİYEV dedi:

-Dünya İqtisadi Forumu Davosda keçiriləndə mən oraya gəlirəm. İndi bu forum Nyu-Yorkda keçirilir, mən də Nyu-Yorka gəlmişəm.

Azərbaycan Prezidenti ilə görüşməkdən çox məmnun olduğunu bildirən KASPAR VİLLİGER dedi:

-Cənab Prezident, biz Sizinlə bir neçə il bundan əvvəl Bakıda və Davosda görüşmüşük. Mənim üçün çox xoşdur ki, indi də Sizinlə Nyu-Yorkda görüşürük. Sizinlə hər bir görüş həmişə məndə xoş duyğular yaradır.

Hörmətli Prezident, Sizinlə burada görüşmək mənim üçün çox xoşdur, lakin mən Sizi gələn il Davosda görməkdən daha çox məmnun olardım.

HEYDƏR ƏLİYEV: Mən mütləq Davosa gələcəyəm.

KASPAR VİLLİGER: Cənab Prezident, mən elə bilirəm ki, dəhşətli 11 sentyabr faciəsindən sonra Nyu-Yorka gəlmək yaxşı haldır.

HEYDƏR ƏLİYEV: Mən Dünya İqtisadi Forumunun açılış mərasimində sizin çıxışınızı dinlədim. Siz çox yaxşı danışdınız. Mühüm məsələləri çox yaxşı qeyd etdiniz. Yaxşı çıxışınıza görə mən sizi təbrik edirəm. Siz həmin çıxışınızda Dünya İqtisadi Forumuna böyük bir yol göstərdiniz. Forum çox yaxşı keçir. Dünyanın əksər ölkələrindən buraya nümayəndələr gəlmişdir.

KASPAR VİLLİGER: Cənab Prezident, mənim haqqımda dediyiniz xoş sözlərə görə Sizə təşəkkür edirəm. Bilirsiniz, Dünya İqtisadi Forumunun Davosda keçirilməsi üçün lazımi işlər görmədiyimə görə bizim ölkədə - İsveçrədə məni tənqid edirlər. Lakin mən elə bilirəm ki, təbliğat üçün deyil, problemlərin həll olunması üçün işləmək lazımdır. Mənim fikrimcə, Nyu-Yorkda da biz əsas problemləri həll etməyə çalışmalıyıq. Çünki Davos Dünya İqtisadi Forumunun əsas istiqaməti də bundan ibarətdir.

Biz gərək həmişə çoxlu fikir mübadiləsi aparaq. Davos İqtisadi Forumu kimi tədbirlər olmasa, gərək üç ay vaxt sərf edib dünyaya gəzintiyə çıxaq ki, bir-birimizi görək.

HEYDƏR ƏLİYEV: Doğrudur. Davos Forumu dünya üçün həqiqətən çox vacib və önəmli bir forumdur. Ona görə də bu Forumun işində hər il xeyli ölkədən nümayəndələr iştirak edir.

Mən üçüncü dəfədir ki, bu Forumda iştirak edirəm. Mən Dünya İqtisadi Forumunda iştirak etmək üçün iki dəfə Davosda olmuşam, üçüncü dəfə isə Nyu-Yorka gəlmişəm. Çox məmnunam ki, sizinlə görüşüb söhbət edirik. Biz sizinlə həm Bakıda, həm də Davosda görüşmüşük. Siz nazir olanda mən sizinlə görüşmüşəm. Xatirimdədir, iki il bundan əvvəl Bakıda görüşümüz zamanı dediniz ki, siz iki ildən sonra İsveçrənin prezidenti olacaqsınız və biz Davosda görüşəcəyik. İndi görürsünüz, sizin dedikləriniz doğru oldu. İki ildən sonra, yəni indi siz həm prezidentsiniz, həm də biz görüşürük.

KASPAR VİLLİGER: Cənab Prezident, bilirsiniz, bizim ölkəmizdə prezident olmaq üçün elə bir böyük bacarıq lazım deyildir. Bizim ölkədə cəmi 7 nazir var. Bu 7 nazir növbə ilə prezident olurlar. Mən artıq 1995-ci ildə bir dəfə prezident olmuşam, yəni indi ikinci dəfədir ki, prezident oluram. Amma bu dəfə yalnız bir il prezident işləyəcəyəm.

HEYDƏR ƏLİYEV: Hər halda indi prezidentsiniz. Prezidentliyə necə gəlməyinizin elə bir əhəmiyyəti yoxdur. Siz mənə demişdiniz ki, prezident olacaqsınız, amma bunun üçün yaşamaq da lazımdır.

Mən sizə Davos haqqında bir kitab göstərmək istəyirəm. Görürsünüz, biz Davosa nə qədər böyük əhəmiyyət veririk. Bu kitab “Davos: Qlobal İqtisadiyyatın üfüqləri” adlanır. Baxın, burada bizim görüşümüz haqqında şəkil də var.

KASPAR VİLLİGER: Mənə elə gəlir ki, bir qədər dəyişmişəm.

HEYDƏR ƏLİYEV: Yox, heç dəyişməmisiniz. Mən dəyişmişəm, amma siz dəyişməmisiniz.

X X X

(Sonra dövlətimizin başçısı Heydər Əliyev Azərbaycan Respublikası Prezidentinin Katibliyi tərəfindən hazrlanıb nəfis tərtibatda nəşr olunmuş “Davos: Qlobal İqtisadiyyatın üfüqləri” kitabını cənab Villigerə hədiyyə etdi).

İsveçrə Prezidenti hədiyyə üçün minnətdarlığını bildirdi.

Söhbət zamanı zəngin ehtiyatlara malik müstəqil Azərbaycan Respublikası ilə bütün sahələrdə əlaqələrin daha da inkişaf etdirilməsinə İsveçrə Konfederasiyasının xüsusi əhəmiyyət verdiyini vurğulayan cənab Kaspar Villiger ölkəmizdə həyata keçirilən iqtisadi islahatlara böyük maraq göstərdi.

Bazar münasibətləri, demokratik inkişaf yolunu seçmiş müstəqil Azərbaycan Respublikasında hüquqi, demokratik, dünyəvi dövlət quruculuğu sahəsində görülən tədbirlərdən, islahatların müvəffəqiyyətlə aparılması nəticəsində əldə olunmuş uğurlardan bəhs edən Prezident Heydər Əliyev dedi ki, iqtisadiyyatının dünya iqtisadiyyatı ilə daha sıx bağlanmasına çalışan Azərbaycan xarici ölkələrlə, o cümlədən İsveçrə ilə əməkdaşlığın daha da möhkəmləndirilməsinə xüsusi diqqət yetirir.

Ölkəmiz üçün ən ağrılı problem olan Ermənistan-Azərbaycan, Dağlıq Qarabağ münaqişəsindən, Ermənistan silahlı qüvvələri tərəfindən respublikamızın ərazisinin 20 faizinin işğal olunmasından, bir milyondan çox vətəndaşımızın yerindən-yurdundan zorla çıxarılaraq çadırlarda ağır vəziyyətdə yaşamasından söhbət açan dövlətimizin başçısı münaqişənin sülh yolu ilə aradan qaldırılması sahəsində ATƏT-in Minsk qrupunun fəaliyyətindən də bəhs etdi.

Respublikamızın Prezidentini diqqətlə dinləyən cənab Villiger dedi ki, onun ölkəsi Azərbaycanla bütün sahələrdə əlaqələri genişləndirməyə hazırdır və Ermənistan-Azərbaycan münaqişəsinin aradan qaldırılmasında lazımi səylər göstərəcəkdir.

Görüşdə beynəlxalq aləmdə və regionda vəziyyət, hər iki tərəfi maraqlandıran bir sıra digər məsələlər barədə də fikir mübadiləsi aparıldı.