SİYASƏT
AZƏRBAYCAN PREZİDENTİ HEYDƏR ƏLİYEVİN YUBİLEYİ ŞƏRƏFİNƏ MOSKVADA TƏNTƏNƏLİ MƏRASİM KEÇİRİLMİŞDİR
Mayın 10-da Azərbaycanın Rusiya Federasiyasındakı səfirliyində dövlətimizin başçısı Heydər Əliyevin 80 illik yubileyinə, habelə faşizm üzərində Böyük Qələbənin 58-ci ildönümünə həsr edilmiş təntənəli mərasim keçirilmişdir.
Respublikamızın fövqəladə və səlahiyyətli səfiri Ramiz Rizayev tədbiri açaraq, Qələbə gününə həsr edilmiş mərasimin iştirakçılarına dövlətimizin başçısının təbrik məktubunu oxudu. Məktubda deyilir: “Hörmətli görüş iştirakçıları! 1941-1945-ci illərdə faşizm üzərində Böyük Qələbənin 58-ci ildönümü münasibətilə sizi, bütün cəbhəçi veteranları ürəkdən təbrik edirəm. Müharibənin qanlı-qadalı illərində xalqlarımız arxa cəbhədə öz hünərləri ilə qələbəyə çox böyük töhfə verdilər. Əminəm ki, ölkələrimiz arasında dostluğun və əməkdaşlığın daha da möhkəmlənməsi faşizmə qarşı çiyin-çiyinə mübarizədə canlarını qurban vermiş döyüşçülərin xatirəsinə layiqli ehtiram olacaqdır. Sizə möhkəm cansağlığı, xoşbəxtlik, uğurlar, Rusiyaya əmin-amanlıq, Rusiya xalqlarına tərəqqi diləyirəm. Azərbaycanla Rusiya arasında dostluq və əməkdaşlıq münasibətlərinin daha da möhkəmlənməsini arzulayıram.”
Daha sonra səfir Prezidentimizin həyat və fəaliyyətindən, Azərbaycan dövlətçiliyinin inkişafına verdiyi şəxsi töhfədən danışdı və bildirdi ki, bütün bunların sayəsində ölkəmiz dünya birliyində layiqli yer tutmuşdur.
Dövlətimizin başçısı ilə şəxsən tanış olan və ona sonsuz məhəbbət, hörmət hissi bəsləyən adamlar Prezident Heydər Əliyevin ad gününü və Böyük Vətən müharibəsində ümumi qələbəmizin ildönümünü qeyd etmək üçün Azərbaycan səfirliyinə gəlmişdilər. Onların arasında RF daxili işlər nazirinin müavini Vladimir Vasilyev, Moskva merinin birinci müavini Lyudmila Şvetsova, Ticarət-Sənaye Palatasının sədri Yevgeni Primakov, Təhlükəsizlik Şurasının katibi Vladimir Ruşaylo, mədəniyyət naziri Mixail Şvıdkoy, Konstitusiya Məhkəməsinin üzvü Marat Baqlay, ordu generalları Konstantin Koçetov, İqor Rodionov və Viktor Samsonov, Rusiya və Azərbaycan ziyalılarının nümayəndələri vardı.
Rusiya xarici işlər nazirinin birinci müavini, görüşdə Rusiya Prezidenti Vladimir Putinin tapşırığı ilə iştirak edən Valeri Loşşinin onun Heydər Əliyevə təbrik məktubunu oxudu. Sonra o, Rusiya və Azərbaycan xalqları arasında dostluq və əməkdaşlığın möhkəmləndirilməsinə böyük şəxsi töhfəsinə görə Azərbaycan Prezidenti Heydər Əliyevin Rusiyanın ən yüksək mükafatı - Müqədəs Apostol Andrey Pervozvannı ordeni ilə təltif edilməsi haqqında RF Prezidenti Vladimir Putinin Fərmanını oxudu.
Mərasimdə çıxış edənlər Azərbaycan Prezidentinin layiqli ömür yolundan, Sovet İttifaqının və postsovet dövrünün tarixindəki rolundan, Azərbaycan ilə Rusiya arasında dostluğun və əməkdaşlığın möhkəmlənməsi işinə töhfəsindən danışdılar, dövlətimizin başçısına uzun ömür, cansağlığı arzuladılar.
Prezident Heydər Əliyevin yubileyi münasibətilə şənlikdə onun haqqında söylənmiş bəzi fikirləri oxuculara təqdim edirik.
Moskva merinin müavini Lyudmila Şvetsova: “Biz çox şadıq ki, Rusiya Prezidenti Vladimir Putin Azərbaycan xalqının dahi oğlunun Rusiyanın ən yüksək ordeni ilə təltif olunması haqqında qərar qəbul etmişdir. Sovet İttifaqında yüksək vəzifələrdə çalışmış bu insanı biz tanıyırıq. Biz onu həyatının hətta ən çətin anlarında da sarsılmayan, ruhdan düşməyən bir insan kimi tanıyırıq. Xoşbəxtəm ki, Heydər Əliyevlə şəxsən tanışam. O, çox yüksək intellektə malik, heyrətamiz dərəcədə müdrik, heç vaxt xırdalığa varmamış və varmayan insandır. Öz Vətəninə, xalqına xidmət onun üçün ülvi amaldır, özünün bütün arzu və niyyətlərini, fəaliyyətini və iradəsini həmişə bu amala tabe etmişdir. Biz Moskvada Heydər Əliyeviçi çox sevirik. Yuri Lujkov istər Azərbaycan ilə Rusiya arasında, istərsə də Azərbaycanla Moskva arasında əlaqələri inkişaf etdirmək üçün çox işlər görən bir insan kimi Heydər Əliyevə Moskva hökuməti və bütün moskvalılar adından həm yazılı, həm də şifahi təbrik göndərmişdir. Azərbaycandakı rusdilli əhalinin dəstəklənməsi üçün biz birlikdə çox işlər görmüşük. Biz Heydər Əliyevin Rusiya mədəniyyət xadimlərinin Bakıya qastrol səfərlərinə necə qayğı ilə yanaşdığını bilirik. Heydər Əliyeviç, sevimli Vətəniniz naminə, sevdiyimiz Azərbaycan naminə Sizə möhkəm cansağlığı, uzun ömür, bütün niyyət və istəklərinizin, planlarınızın həyata keçməsini arzulayırıq”.
Rusiya Ticarət-Sənaye Palatasının sədri Yevgeni Primakov: “Bu gün biz yubilyarı nəinki təbrik etməliyik, - bu, özlüyündə aydındır, - həm də Heydər Əliyeviçin valideyinlərini təbrik etməliyik. Onlar heç ağıllarına da gətirməzdilər ki, o, necə uca zirvələr fəth edəcəkdir. O, mənə söyləyirdi ki, 18 yaşınadək rusca çox pis danışırdı, belə yüksək səviyyəyə sonralar qalxmışdır. Mən onun ömür-gün yoldaşı Zərifə Əzizovnanı xatırlamaq istəyirəm. O, bütün ömrünü ona, övladlarına, ailəsinə həsr etmişdi. Heydər Əliyeviç sübut etdi ki, öz xalqını sevən, dəyişə bilən və hər hansı quruluşda, hər hansı cəmiyyətdə dəyişə bilən öz sosial statusundan asılı olmayaraq, bu xalqın naminə yaşayan insanlar var. Bir şeyi yadda saxlamaq lazımdır - belə insanlar bütün varlığını xalqa xidmətə həsr edirlər. Heydər Əliyev də məhz belə bir insandır. Mən onun hamını öz yüksək intellekti ilə necə valeh etməsinə heyranam. Mən burada, hamının yanında bir daha demək istərdim ki, Heydər Əliyeviçin qarşısında baş əyirəm, ona böyük hörmətim var, onunla görüşmək mənim üçün həmişə böyük hadisədir. Ona tezliklə sağalmağı arzulamaq istərdim”.
Moskva Dövlət Universitetinin rektoru Viktor Sadovniçi: “Bu əlamətdar gündə Heydər Əliyeviçin Moskva Universitetinə vətəndaş məsuliyyəti ilə göstərdiyi dəstəklə bağlı az məlum olan bir hadisəni xatırlamaq istərdim. İttifaqın rəhbərlərindən biri, Siyasi Büronun üzvü olan Heydər Əliyev Moskva Universitetinə də kuratorluq edirdi. O zaman onun dəstəyi olmasaydı, yəqin ki, universitet bu gün gördüyünüz kimi olmazdı. Elmimiz, təhsilimiz də çətin ki, belə yaxşı səviyyəyə qalxardı. Hələ bu bir yana. O, Azərbaycan alimlərinin bu universitetdə təhsil almalarına imkan yaratdı. Heydər Əliyevin o dövrkü fəaliyyəti xalqlarımızın mədəniyyətinin inkişafında çox böyük rol oynamışdır”.
Rusiya daxili işlər nazirinin müavini Vladimir Vasilyev: “Heydər Əliyeviç böyük dövlət xadimi və böyük insandır. O, çoxları üçün örnəkdir. Heydər Əliyeviçin dövlət təhlükəsizliyinin təmin olunması, mütəşəkkil cinayətkarlıqla, terrorizmlə mübarizə sahəsində fəaliyyəti bizim üçün, hüquq mühafizə orqanları sisteminin işçiləri üçün xüsusilə əhəmiyyətlidir. Biz minnətdarlığımızı bildirmək və Azərbaycana tərəqqi arzulamaq istərdik”.
Rusiya Təhlükəsizlik Şurasının katibi Vladimir Ruşaylo: “Mən yubilyarı təbrik etmək, ona insani və siyasi uzunömürlülük arzulamaq istəyirəm. Biz Heydər Əliyeviçi hələ SSRİ dövründən görkəmli siyasi xadim kimi tanıyır, MDB çərçivəsindəki çoxtərəfli əlaqələrə və Rusiya ilə Azərbaycan arasında ikitərəfli münasibətlərə böyük əhəmiyyət veririk. Dövlətlərimiz arasında dostluq münasibətlərinin yaranmasında Prezident Heydər Əliyevin də, Prezident Vladimir Putinin də xidmətləri var”.
Asya Hacızadə
AZƏRTAC-ın xüsusi müxbiri
Moskva