RƏSMİ XRONİKA
AZƏRBAYCAN PREZİDENTİ HEYDƏR ƏLİYEV “AZƏRREYL” QADIN VOLEYBOL KLUBUNUN ÜZVLƏRİ İLƏ GÖRÜŞMÜŞDÜR
Azərbaycan Respublikasının Prezidenti Heydər Əliyev martın 14-də Prezident sarayında Avropa “Top-komanda” kuboku uğrunda yarışların qalibi olan “Azərreyl” qadın voleybol klubunun üzvləri ilə görüşmüşdür.
Respublikamızın voleybolçularını səmimiyyətlə salamlayan dövlətimizin başçısı Heydər Əliyev görüşü giriş sözü ilə açdı.
AZƏRBAYCAN PREZİDENTİ HEYDƏR ƏLİYEVİN GİRİŞ SÖZÜ
- Əziz idmançılar!
Əziz voleybolçular!
Mən sizi, Azərbaycanın qadınlardan ibarət voleybol komandasını, komandanın üzvlərini Avropa kuboku uğrunda mübarizədə əldə etdiyiniz gözəl qələbə münasibətilə təbrik edirəm. Sizin hər birinizə cansağlığı və idman sahəsində yeni-yeni uğurlar arzulayıram.
Sizin son günlər Azərbaycanda Avropa kuboku uğrunda final yarışlarında çıxışlarınız bütün Azərbaycan xalqının, vətəndaşlarının, Azərbaycan ictimaiyyətinin nəzər-diqqətini cəlb etmişdir. Demək olar ki, hamıda böyük maraq doğurmuşdu və hamını bu yarışlara həm idman sarayında, eyni zamanda televiziya vasitəsilə baxmağa məcbur etmişdir. Bu, çox sevindirici haldır və sizin uğurlarınız və nəhayət, finaldakı qələbəniz, hesab edirəm ki, Azərbaycanın idman həyatında, təkcə idman həyatında yox, Azərbaycanın ümumən həyatında, tarixində çox əlamətdar bir hadisədir. Ona görə də siz qısa müddətdə Azərbaycanda böyük hörmət qazanmısınız, populyarlıq qazanmısınız. Həm televiziya ilə görən, həm də oyununuzu izləyən hər bir kəs sizi sevir, sizə çox böyük rəğbət bəsləyir.
Mən bu gün sizi dəvət etmişəm ki, bir daha öz təbrikimi çatdırım və sizə yeni-yeni uğurlar arzulayım. Əvvəlcə, istərdim ki, sizi dinləyim, ondan sonra görüşümüzü davam edək. Buyurun.
X X X
Çıxış üçün ”Azərreyl” komandasının baş məşqçisi Faiq Qarayevə söz verildi.
“AZƏRREYL” KOMANDASININ BAŞ MƏŞQÇİSİ FAİQ QARAYEVİN ÇIXIŞI
- Möhtərəm cənab Prezident!
İcazə verin, ilk növbədə, bizi belə yüksək səviyyədə qəbul etdiyinizə, göstərdiyiniz böyük diqqət və qayğıya görə komandamızın bütün üzvləri adından Sizə dərin minnətdarlığımızı bildirim. Sizə uzun ömür, cansağlığı arzulayıram.
Biz bu görüşdən böyük şərəf hissi duyuruq. Respublikamızda idmanın inkişafına göstərdiyiniz böyük qayğı, diqqət əlaməti olaraq, komandamızla keçirdiyiniz bu görüş bizi yeni nailiyyətlərə ruhlandırır, gələcək yarışlarda daha böyük qələbələr qazanmağa səfərbər edir.
Möhtərəm cənab Prezident! Avropa “Top-komanda” kuboku uğrunda yarışların final mərhələsinin Bakıda keçirilməsi respublika ictimaiyyəti üçün əsl bayrama çevrildi. Bu turnirin paytaxtımızda keçirilməsi barədə Avropa Voleybol Konfederasiyasının qəbul etdiyi qərar Sizin müdrik rəhbərliyiniz altında ölkəmizdə yaranmış ictimai-siyasi sabitliyə əsaslanmışdır. Özümüzü xoşbəxt sayırıq ki, bu kuboku qazanmaqla biz Milli Olimpiya Komitəsinin Prezidenti cənab İlham Əliyevin, Gənclər, İdman və Turizm Nazirliyinin, Respublika Voleybol Federasiyasının voleybolçu qızlarımıza bəslədikləri dərin inamı doğrultmağa nail olduq və idmansevərlərə böyük sevinc bəxş etdik. Heç şübhəsiz ki, bu qələbənin qazanılması komandamız üçün yaradılmış şəraitin, bizə göstərilən dövlət qayğısının nəticəsidir.
Möhtərəm cənab Prezident!
Voleybolçu qızlarımızın Avropa “Top-komanda” kubokunu qazanması münasibətilə bizi qəbul edərək göstərdiyiniz bu yüksək etimada görə Sizə bir daha dərin minnətdarlığımızı bildiririk. Fürsətdən istifadə edərək, Sizi qarşıdan gələn Novruz bayramı münasibətilə səmimi qəlbdən təbrik edirik. Sizə bir daha möhkəm cansağlığı, uzun ömür arzulayırıq.
Diqqətinizə görə çox sağ olun.
HEYDƏR ƏLİYEV: Komandanın kapitanı Alla Həsənova, sən yaxşı oynayırdın, indi görək necə çıxış edəcəksən.
ALLA HƏSƏNOVA: Mən oynamağı danışmaqdan daha yaxşı bacarıram.
HEYDƏR ƏLİYEV: İdmançılar həmişə oynamağı daha yaxşı bacarırlar, nəinki danışmağı.
ALLA HƏSƏNOVA: Bizə göstərdiyiniz dəstəyə və diqqətə görə bütün komandanın adından minnətdarlığımı bildirmək istəyirəm. Özü də təkcə bizə yox, bütün xalqımıza. Qiymətli vaxtınızdan “oğurladığımız” dəqiqələrə görə Sizə təşəkkür etmək istəyirəm və zənn edirəm ki, qızlar da mənimlə razılaşarlar.
Biz kubok uğrunda yarışların finalında artıq iştirak etmişik, lakin bu, keçmiş Sovet İttifaqı dövründə olmuşdu. Təəssüf ki, biz o zaman məğlub olduq. İndiki kubok bizim üçün daha qiymətlidir. Çünki, biz indi müstəqil Azərbaycanımızın şərəfini qoruyuruq. Hətta Avropa Konfederasiyasının nümayəndəsi də bildirdi ki, o, bizdə belə güclü komanda olduğunu gözləmirdi. Təbiidir ki, dünyanın idman meydanlarında indən belə bizim ölkəmizlə hesablaşacaqlar.
Sizinlə görüşmək kimi bir şərəfə nail olduğumuza görə hamının adından minnətdarlığımızı bildirmək və dövlətimiz naminə Sizə möhkəm cansağlığı, səadət arzulamaq istəyirəm.
HEYDƏR ƏLİYEV: Çox sağ olun.
HEYDƏR ƏLİYEV: Yenə danışmaq istəyən var, yoxsa topla oynamaq daha yaxşıdır? Mən sizi yaxşı başa düşürəm. Sizin qısa nitqləriniz, hesab edirəm ki, oyunlarınızın nə qədər gözəl olduğunu göstərir.
Mən sizi bir daha təbrik edirəm. Siz Azərbaycan cəmiyyətinə böyük bir hədiyyə qazandırmısınız. Bu da Avropa kubokudur. Ona görə mən sizə bir də təşəkkür edirəm. Ancaq bunun əvəzində sizə hansısa hədiyyə vermək çox çətindir. Çünki sizin etdiyiniz hədiyyə o qədər qiymətlidir ki, bu qiymətdə hədiyyə vermək çətindir. Ancaq buna baxmayaraq, mən də bu münasibətlə sizə yadigar hədiyyələri vermək istəyirəm. Yəni bu gün sizin yadınızda qalsın ki, siz Azərbaycan Prezidenti ilə görüşmüsünüz və Azərbaycan Prezidentinin, kiçik də olsa, hədiyyəsini almısınız.
X X X
Prezident Heydər Əliyev “Azərreyl”in baş məşqçisi Faiq Qarayevə və komandanın üzvlərinə xatirə hədiyyələri təqdim etdi.
Voleybolçular idmançılara göstərdiyi diqqət və qayğıya, onları şərəfləndirdiyinə və zəhmətlərinə verdiyi böyük qiymətə görə respublikamızın rəhbərinə dərin minnətdarlıqlarını bildirdilər.
X X X
Azərbaycan Prezidenti Heydər Əliyev görüşdə yekun nitqi söylədi. (Dövlətimizin başçısının yekun nitqi qəzetin bugünkü nömrəsinin birinci səhifəsində dərc olunur).
Sonra “Azərreyl”in kapitanı Alla Həsənova Prezident Heydər Əliyevə komandanın adından xatirə olaraq voleybol topu hədiyyə etdi.
Dövlətimizin başçısı Heydər Əliyev hədiyyəyə görə təşəkkürünü bildirdi və komandanın üzvləri ilə xatirə şəkli çəkdirdi.
X X X
Milli Olimpiya Komitəsinin prezidenti İlham Əliyev, Gənclər, İdman və Turizm naziri Əbülfəz Qarayev, Prezidentin Katibliyinin rəisi Dilarə Seyidzadə, Prezidentin İcra Aparatının humanitar siyasət şöbəsinin müdiri Fatma Abdullazadə, Azərbaycan Voleybol Federasiyasının prezidenti Ziya Məmmədov görüşdə iştirak edirdilər.
Foto Oqtay Aydınoğlunundur