RƏSMİ XRONİKA
AZƏRBAYCAN PREZİDENTİ HEYDƏR ƏLİYEV KLİVLENDDƏN XALQIMIZA MÜRACİƏT ETMİŞDİR
Xəbər verdiyimiz kimi, Azərbaycan Respublikasının Prezidenti Heydər Əliyev Nyu-Yorkda Dünya İqtisadi Forumunda iştirak etdikdən sonra bu ölkənin Klivlend şəhərindəki klinikada tibbi müayinədən keçmişdir. Həkimlərin məsləhəti ilə fevralın 14-də dövlətimizin başçısının üzərində cərrahiyyə əməliyyatı aparılmışdır. Hazırda klinikada müalicəsini uğurla davam etdirən Prezident Heydər Əliyev Azərbaycan televiziyası vasitəsilə xalqımıza müraciət etmişdir.
Respublika televiziyasının çəkiliş qrupunun Klivlenddən peyk vasitəsilə Bakıya ötürdüyü və fevralın 18-də yayımlanmış həmin müraciətin mətnini oxuculara təqdim edirik.
PREZİDENT HEYDƏR ƏLİYEVİN AZƏRBAYCAN XALQINA MÜRACİƏTİ
- Əziz həmvətənlər, Azərbaycan Respublikasının vətəndaşları!
Sizə uzaqlardan, Amerika Birləşmiş Ştatlarının Klivlend şəhərindən salamlarımı yetirir, hörmət-ehtiramımı, sevgi-məhəbbətimi bildirirəm.
Siz artıq bilirsiniz ki, Nyu-Yorkda Davos forumunun işi qurtarandan sonra mən Klivlend şəhərinə gəlib burada tibbi müayinədən keçirdim. Bundan sonra, fevral ayının 14-də prostat vəzində cərrahiyyə əməliyyatı keçirmişəm. İndi müalicə olunuram, reabilitasiya dövrüdür. Güman edirəm ki, bir neçə gündən sonra bu da başa çatacaq və mən Vətənə dönəcəyəm.
Bütün bu günlərdə mən daim ölkəmizlə, respublikamızla, vətənimizlə əlaqədə olmuşam. Mənə hər gün məlumatlar gəlir, məsələlər haqqında təkliflər, fikirlər söylənilir və mən bunlarla əlaqədar qərarlar qəbul edir, lazımi göstərişlər verirəm. Mən Milli Məclisin sədri Murtuz Ələsgərovla, baş nazir Artur Rasizadə ilə, Prezidentin İcra Aparatının rəhbəri Ramiz Mehdiyevlə, nazirlərlə - Səfər Əbiyevlə, Namiq Abbasovla, Ramil Usubovla, habelə Baş prokuror Zakir Qaralovla, başqa nazirlərlə və vəzifəli şəxslərlə daim əlaqədəyəm. Onların verdikləri məlumatlar və mənim onlara göstərişlərim bu günlərdə Azərbaycanda bütün dövlət işlərinin normal şəraitdə getməsini təmin etmişdir. Mən çox məmnunam ki, ölkəmizdə həyat öz axarında gedir, sabitlik, əmin-amanlıq, rahatlıq hökm sürür, insanlar öz işləri ilə məşğuldurlar və Azərbaycanda 2002-ci ilin ikinci ayı, demək olar, uğurla keçir. İqtisadiyyatımız inkişaf edir, lazımi tədbirlər də görülür. Baş nazir Artur Rasizadənin mənə verdiyi məlumata görə, bu günlərdə Beynəlxalq Valyuta Fondu ilə, Dünya Bankı ilə birlikdə lazımi tədbirlər görülmüşdür. Güman edirəm ki, bunların nəticəsində Beynəlxalq Valyuta Fondunun və Dünya Bankının Azərbaycanla əlaqələri 2002-ci ildə də əvvəlki səviyyədə olacaqdır.
Bilirəm ki, ölkədə əhalinin elektrik enerjisi ilə təmin olunması lazımi səviyyədədir. Rusiyadan qaz alırıq və Azərbaycanın özünün hasil etdiyi qazla birlikdə ölkənin mümkün olan bölgələrini qazla təchiz edirik. Ümumiyyətlə, qış dövründə ölkəmizin elektrik enerjisi və qazla təminatı, hesab edirəm ki, yaxşı səviyyədədir.
Təbiidir, bəzi qəzalar, gözlənilməz hallar olur. Amma onların da qarşısı alınır.
Hər halda, mən bütün bu məsələlər barədə daim məlumat alıram, göstərişlər verirəm. Ölkə idarə olunur, vətəndaşlarımız öz işləri ilə məşğuldur və respublikamız 2002-ci ilin inkişafını yaşayır. Mən bundan çox məmnunam. Bunlar onu göstərir ki, artıq dövlətimizin, hökumətimizin, bütün hakimiyyət orqanlarının, icra orqanlarının fəaliyyəti elə qurulmuşdur ki, biz işləri yüksək səviyyədə aparmağa qadirik. Güman edirəm ki, gələn aylarda daha çox işlər görə biləcəyik. İndi artıq yaza hazırlıq dövrü başlanmışdır, bu işlərlə də məşğul olurlar, lazımi tədbirlər görülür və görüləcəkdir.
Bir də qeyd edirəm ki, mən bu günlərdə müalicəmi qurtarıb Vətənə dönəcəyəm. Bilirəm ki, siz müəyyən qədər narahatsınız. Amma narahat olmağa heç bir əsas yoxdur. Təbii ki, mən burada darıxıram, sizsiz darıxıram, ölkədə olmadığıma görə darıxıram. Amma eyni zamanda, daim ölkə ilə əlaqəmin olması mənə həmişə rahatlıq verir. Siz də tamamilə rahat ola bilərsiniz, heç bir narahatçılığa əsas yoxdur. Mənim bugünkü səhhətim əvvəlki dövrlərdən daha da yaxşıdır və bir neçə gündən sonra biz sizinlə görüşəcəyik.
Mən sizi bir daha salamlayıram və xoş arzularımı bildirirəm. Sağ olun.
X X X
Cərrahiyyə əməliyyatından sonra müalicəsi uğurla davam edən Azərbaycan respublikasının Prezidenti Heydər Əliyev Klivlend xəstəxana kompleksində tez-tez gəzintiyə çıxır. Bu klinika dünyanın ən məşhur səhiyyə ocaqlarından biridir. Burada çalışan dünya şöhrətli tibb mütəxəssisləri nadir cərrahiyyə əməliyyatlarını uğurla aparırlar. Ən müasir tibb avadanlığı ilə təchiz olunmuş bu kompleksdə göstərilən yüksək səviyyəli tibbi xidmət, buradakı göz oxşayan səliqə-səhman diqqəti xüsusilə cəlb edir.
Yurdumuzun böyük oğlu, görkəmli dövlət xadimi Heydər Əliyev harada olursa-olsun, daim öz vətənini, canından artıq sevdiyi Azərbaycan xalqını düşünür. Elə bir gün olmur ki, o, Azərbaycanla əlaqə saxlamasın, respublikamızın problemləri ilə bağlı müvafiq göstərişlər verməsin. Klivlend xəstəxana kompleksinin işıqlı dəhlizləri sadə və müasir dizaynı ilə seçilir. Gəzinti zamanı Prezident Heydər Əliyev Azərbaycanda aparılan səhiyyə islahatının tezliklə uğurla başa çatacağına və ölkəmizdə də belə müasir tibb ocaqlarının sayının artacağına tam əminliyini vurğuladı.
Klinikada müalicə və müayinə işi yüksək səviyyədə təşkil olunmuş, xəstələrin istirahəti üçün əlverişli şərait yaradılmışdır.
Xəstəxana kompleksinin dəhlizlərində divarlardan asılmış müxtəlif boyakarlıq əsərləri mövzu və janr baxımından xoş təsir bağışlayır. Prezident Heydər Əliyev gəzinti zamanı bu əsərləri maraqla seyr etdi.
Buradakı tətbiqi sənət nümunələri də zövqlə, böyük sənətkarlıqla yaradılmışdır. Bu incəsənət əsərləri ilə tanışlıq insanda xoş ovqat, yaxşı əhval-ruhiyyə oyadır.
Azərbaycan Prezidenti Heydər Əliyev arabir pəncərəyə yaxınlaşıb şəhərə də tamaşa edir. Qışın sərt havasına baxmayaraq, Klivlend qaynar bir həyat yaşayır, şəhər sakinləri gündəlik qayğıları və problemlərinin həlli dalınca tələsir.
Bu mənzərə dövlətimizin başçısının vətən və yurd sevgisini daha da alovlandırır. O, tezliklə Vətənə qayıdaraq doğma xalqına qovuşmaq, bütün həyatı boyu olduğu kimi, bundan sonra da ona sədaqətlə xidmət etmək arzusundadır. Onun qəlbi vətənimiz və xalqımızla bağlı xeyirxah və ülvi arzularla doludur. Qoy tale bu nəcib arzuları həyata keçirməkdə möhtərəm Prezidentimizə yar olsun.