RƏSMİ XRONİKA
AZƏRBAYCAN PREZİDENTİ İLHAM ƏLİYEVİN CƏNUB BÖLGƏSİNƏ SƏFƏRİ
MASALLI–YARDIMLI AVTOMOBİL YOLUNUN AÇILIŞ MƏRASİMİ
PREZİDENT İLHAM ƏLİYEV MƏRASİMDƏ İŞTİRAK ETMİŞDİR
Oktyabrın 23-də Masallı-Yardımlı avtomobil yolunun açılışı olmuşdur.
Azərbaycan Prezidenti İlham Əliyev mərasimdə iştirak etmişdir.
Dövlətimizin başçısı mərasimin keçirildiyi yerə, Yardımlı rayonunun Təkdam kəndi ərazisinə gəldi. Yolun tikintisində çalışan inşaatçılar Prezidenti gül-çiçəklə qarşıladılar.
Nəqliyyat naziri Ziya Məmmədov yolun əsas göstəriciləri barədə məlumat verərək dedi ki, cənab Prezident, Sizin tapşırığınıza uyğun olaraq, Masallı-Yardımlı yolu, bir il ərzində yenidən bərpa edilmiş və istismara hazırdır. Yol 3-cü texniki dərəcəlidir. 53 kilometr uzunluğunda olan yolun hərəkət hissəsinin eni 7 metrdir. Yol boyu 6 körpü bərpa edilmiş və ya yenidən tikilmişdir. Layihənin smeta dəyəri 10 milyon manat olmasına baxmayaraq, 8 milyon manat xərclənmiş, 104 min ton asfalt-beton işləri görülmüşdür. Bu yol 54 kəndə, o cümlədən Masallı rayonunun 6, Yardımlı rayonunun 48 yaşayış məntəqəsinə gediş-gəlişi asanlaşdıracaqdır.
Prezident İlham Əliyev dedi ki, yol çox gözəl və keyfiyyətlidir. Mən gələndə fikir verirdim, ən yüksək səviyyədədir, yəni dünyada hansı yüksək səviyyə varsa, burada da var.
SABİR RÜSTƏMXANLI Milli Məclisin deputatı: Cənab Prezident, camaat 70-80 il bunun ağrısını çəkib, həsrətində idi ki, Yardımlıya normal yol olsun.
İLHAM ƏLİYEV: Keçən il biz gələndə görduk, yol çox bərbad gündə idi.
SABİR RÜSTƏMXANLI: Onda mən də burada idim, Siz söz verdiniz.
İLHAM ƏLİYEV: Yadınızdadır?
SABİR RÜSTƏMXANLI: Bəli, yadımdadır.
ZİYA MƏMMƏDOV: Cənab Prezident, fəal sürüşməyə məruz qalan hissələrdə istinad divarları da tikilmişdir.
İLHAM ƏLİYEV: Yolda müasir nişanlar da qoyulubdur. Bunlar da artıq Azərbaycanda istehsal olunur.
ZİYA MƏMMƏDOV: Bəli, biz bunu İsveç texnologiyası əsasında özümüz hazırlayırıq.
İLHAM ƏLİYEV: Gərək bütün yollara qoyulsun.
SABİR RÜSTƏMXANLI: İndi rayonların üç böyük problemi var: yol, məktəb və qaz. Ekoloji məsələ də var, meşələr çox qırılır. Qazın verilməsi ilə əlaqədar meşələrin qırılmasının qarşısı xeyli alınacaqdır. Əlavə iş yerləri də açılır.
İLHAM ƏLİYEV: Əlbəttə, kənd təsərrüfatı inkişaf edir, məktəblər də tikilir.
SABİR RÜSTƏMXANLI: Burada 40 ildə yaponlar bir məktəb tikmişdilər. Təkcə bir ildə, keçən il isə 31 məktəb tikilmişdir. Bu, çox böyük işdir.
İLHAM ƏLİYEV: Bu il də, gələn ildə də nəzərdə tutulubdur.
SABİR RÜSTƏMXANLI: Yardımlıda 31 məktəbin tikilməsi çox böyük işdir. Bu, insanları buraya bağlayır. Özü də burada istedadlı uşaqlar çoxdur.
İLHAM ƏLİYEV: Çoxdur. İndi rayonun inkişafı üçün bütün şəraiti yaradırıq. Astara elektrik stansiyasının işə düşməsindən sonra elektrik enerjisi də daha yaxşı veriləcək, Yardımlıya yeni xətlər çəkilməlidir.
SABİR RÜSTƏMXANLI: Cənab Prezident, bir ildə Sizin iki dəfə rayona gəlməyiniz çox böyük hadisədir. Dövlət başçılarından heç biri Yardımlıya gəlməmişdi.
ZİYA MƏMMƏDOV: Cənab Prezident, bir faktı da demək istəyirəm. Bu yolun çəkilişini bilavasitə Nəqliyyat Nazirliyinin “Yolnəqliyyatservis” departamentinin işçiləri, yerli mütəxəssislər həyata keçirmişlər. Yəni bu isə kənar firmalar cəlb olunmayıbdır.
İLHAM ƏLİYEV: Yəni buna ehtiyac yoxdur. Artıq ən yüksək səviyyədə təcrübə var.
ZİYA MƏMMƏDOV: Bəli, öz mütəxəssislərimizdir. Bu da yeni iş yerlərinin yaranmasına, insanların rifah halının yaxşılaşmasına köməkdir.
CAVİD QURBANOV (“Yolnəqliyyatservis” departamentinin rəisi): Cənab Prezident, Sizin köməyinizlə 1400 ədəd yeni texnika alınmışdır.
İLHAM ƏLİYEV: 1400 texnika, yəni bununla hər şey etmək olar.
ZİYA MƏMMƏDOV: Bəli, təxminən 300-400 ədəd də alsaq, bizə kifayət edər.
İLHAM ƏLİYEV: Mən keçən dəfə demişəm, əgər biz Xınalığa yol çəkə bilmişiksə, bundan böyük iş ola bilməz, çünki ondan yüksəkdə kənd yoxdur. Lerik yolu o yoldan da pis idi, siz keçən il o yolu da çəkdiniz.
ZİYA MƏMMƏDOV: Bəli, təkcə bunlar deyil, Daşkəsən, Xızı yolları da çəkilir.
İLHAM ƏLİYEV: Mən bu gün səhər Lerikə getmişdim, yol yaxşıdır. Baxmayaraq ki, bir il keçib, yolda heç bir dağılma yoxdur.
ƏHƏD ABIYEV (Milli Məclisin deputatı): Cənab Prezident, Masallı rayonunda da yüksək inkişaf var.
İLHAM ƏLİYEV: Mən müşavirədə dedim, gərək rayon mərkəzlərinin görkəmi də dəyişsin.
ƏHƏD ABIYEV: Hörmətli Prezident, bu əziz gündə xoş gəlmisiniz. İndi rayonlarda dəyişiklik, yenilik çoxdur. Camaat Sizi həddindən artıq çox istəyir. Bütün sahələrdə inkişaf var.
İLHAM ƏLİYEV: İşlər gərək daha da sürətlə getsin. Bu yolun tikintisində iştirak etmiş bütün yoldaşlara minnətdarlığımı bildirirəm. Sağ olun, çox böyük işlər görürsünüz. Həm Lerik yolu, həm də Xınalıq yolu istifadəyə verilib, indi Daşkəsən yolu da çəkilir. Magistral yolları çəkmək nisbətən asandır. Düzdür, o da böyük işdir, amma indi müasir texnologiyalar var. Dağ şəraitində yol çəkmək isə çox böyük işdir. Gələn ilin büdcəsində də çoxlu tikinti nəzərdə tutulubdur.
ZİYA MƏMMƏDOV: Cənab Prezident, yaratdığınız Yol Fondu vəsaitlərin toplanmasında, məqsədyönlü istifadəsində xeyli kömək edəcəkdir. Həm operativliyi artıracaq, həm də, vəsait toplamaq baxımından səmərəli olmalıdır.
İLHAM ƏLİYEV: Sizi təbrik edirəm. Sağ olun.
X X X
Dövlətimizin başçısı Masallı-Yardımlı avtomobil yolunun açılışını bildirən rəmzi lenti kəsdi, inşaatçılarla xatirə şəkli çəkdirdi.