- Hörmətli xanım Prezident!

Hörmətli cənab İmants Freyberqs!

Əziz dostlar, xanımlar və cənablar!

Xanım Prezident, ilk növbədə, məni dost ölkənizə dövlət səfərinə dəvət etdiyinizə görə Sizə ürəkdən təşəkkür edir, Latviya torpağında mənə və nümayəndə heyətinə göstərdiyiniz səmimi qonaqpərvərliyə görə dərin minnətdarlığımı bildirmək istəyirəm.

Keçirdiyimiz görüşlərdən çox məmnunam. Biz ikitərəfli əməkdaşlıqla bağlı geniş fikir mübadiləsi, danışıqlar apardıq. Əminəm ki, bütün bunlar, həmçinin imzalanmış birgə bəyannamə və digər sənədlər, iki ölkənin iş adamlarının keçirəcəkləri biznes forumu əməkdaşlığımızın inkişafına və dərinləşməsinə öz töhfəsini verəcəkdir. Ötən il Azərbaycana səfəriniz əlaqələrimizin daha da genişlənməsinə xüsusi təkan vermiş və müxtəlif sahələrdə qarşılıqlı surətdə faydalı əməkdaşlığımız üçün yaxşı perspektivlər açmışdır.

Bu gün Azərbaycanla Latviya arasında iqtisadi əlaqələr sürətlə inkişaf edir, əmtəə dövriyyəsinin həcmi ildən-ilə artır. Ölkələrimiz, eyni zamanda, Avropaya inteqrasiya proseslərində, beynəlxalq və regional təşkilatlar, o cümlədən BMT, ATƏT, Avropa Şurası, həmçinin Avropa İttifaqının Yeni qonşuluq siyasəti proqramı və NATO-nun “Fərdi tərəfdaşlığın fəaliyyət planı” çərçivəsində uğurlu əməkdaşlıq edir. Bu təsisatlarla əməkdaşlıqda Latviyanın Azərbaycana dəstəyinə görə Sizə minnətdarlığımı bildirirəm.

İki ölkə arasında mövcud olan qarşılıqlı anlaşma və dəstək, siyasi dialoq, müxtəlif sahələrdə sıx əlaqələr məmnunluq doğurur. Azərbaycan sürətlə inkişaf edən ölkədir. Həyata keçirilən siyasi və iqtisadi islahatlar ölkənin dinamik inkişafına imkan yaradıbdır. 2005-ci ilədək on il ərzində Azərbaycanda ümumi daxili məhsulun artımı hər il 10 faizdən çox olmuşdur. 2005-ci ildə bu 26 faiz, 2006-cı ilin birinci yarısında isə 36 faizdən çox artmışdır. Təxminən son üç il ərzində ölkədə 435 min yeni iş yeri açılmışdır.

Azərbaycan regionda sabitliyin və təhlükəsizliyin möhkəmlənməsinə, iqtisadi inkişafa və inteqrasiyaya təkan verəcək beynəlxalq layihələr həyata keçirir. Bakı-Tbilisi-Ceyhan neft kəməri, Bakı-Tbilisi-Ərzurum qaz kəməri, Bakı-Tbilisi-Qars dəmir yolu layihələri bütün regionun inkişafında mühüm rol oynayacaqdır. Lakin mövcud münaqişələri aradan qaldırmadan regionda sülhə və təhlükəsizliyə nail olmaq mümkün deyildir. Ermənistanın Azərbaycana qarşı hərbi təcavüzü regionda sabitliyi pozan başlıca amildir. Bu hərbi təcavüz və etnik təmizləmə siyasəti nəticəsində torpaqlarımızın 20 faizi işğal edilmiş, ölkədə bir milyondan çox qaçqın və məcburi köçkün yaranmışdır. Azərbaycan münaqişənin beynəlxalq hüquq, ölkəmizin ərazi bütövlüyü çərçivəsində ədalətli şəkildə nizama salınmasını, münaqişə ilə bağlı BMT Təhlükəsizlik Şurasının qətnamələrinin, ATƏT-in, Avropa Şurasının və digər beynəlxalq təşkilatların qərarlarının yerinə yetirilməsini tələb edir.

Xalqımızın ən ağrılı problemi olan Ermənistan-Azərbaycan, Dağlıq Qarabağ münaqişəsinin həlli istiqamətində Latviyanın mövqeyini yüksək qiymətləndirirəm. Fürsətdən istifadə edərək, GUAM dövlətləri ərazisində davam edən münaqişələr və onların beynəlxalq sülhə, təhlükəsizliyə və inkişafa təsiri ilə bağlı məsələnin BMT Baş Məclisi 61-ci sessiyasının gündəliyinə daxil edilməsində ölkənizin Azərbaycana verdiyi dəstəyə görə Sizə xüsusi təşəkkür edirəm.

Mən Azərbaycanla Latviya arasında münasibətlərin bütün sahələrdə inkişaf etməsinin, genişlənməsinin tərəfdarıyam və inanıram ki, ölkənizə səfərim bu münasibətləri daha yüksək səviyyəyə qaldıracaqdır.

Hörmətli xanım Prezident, icazə verin, bu badəni Sizin şərəfinizə, cənab İmants Freyberqsin şərəfinə, ölkələrimiz arasında səmimi dostluq və faydalı əməkdaşlıq əlaqələrinin inkişafının şərəfinə qaldırım!