RƏSMİ XRONİKA
AZƏRBAYCAN PREZİDENTİ İLHAM ƏLİYEVİN SƏDRLİYİ İLƏ QARŞIDAKI QIŞ MÖVSÜMÜNDƏ ƏHALİNİN TƏBİİ QAZ, İSTİLİK, ELEKTRİK ENERJİSİ İLƏ TƏCHİZATI MƏSƏLƏLƏRİ VƏ ENERGETİKA SEKTORUNDAKI VƏZİYYƏTLƏ BAĞLI MÜŞAVİRƏ KEÇİRİLMİŞDİR
Azərbaycan Respublikasının Prezidenti İlham Əliyevin sədrliyi ilə iyunun 24-də Prezident sarayında qarşıdakı qış mövsümündə əhalinin təbii qaz, istilik, elektrik enerjisi ilə təchizatı məsələləri və energetika sektorundakı vəziyyətlə bağlı müşavirə keçirilmişdir.
Dövlətimizin başçısı İLHAM ƏLİYEV müşavirəni açaraq dedi:
- Mən bugünkü müşavirəni energetika sektorundakı vəziyyəti müzakirə etmək üçün keçirirəm. Çünki hesab edirəm ki, biz bu gün bu məsələlərə baxmalıyıq. Qışa hazırlıq məsələlərini müzakirə etməliyik və bütövlükdə, energetika sektorundakı vəziyyəti gərək təhlil edək və görülən tədbirlər haqqında fikir mübadiləsi aparaq.
Amma bu müşavirəni nizam-intizam məsələləri ilə başlamaq istəyirəm. Mən bu gün səhər işə gəldim, Baş nazirə zəng etdim, vəziyyətlə maraqlandım. Mənə iqtisadi göstəricilər haqqında, görülən işlər haqqında məlumat verdi. Dedim ki, belə bir müşavirə çağıraq, bu məsələləri müzakirə edək. Bu gün şənbə günüdür. Təxminən saat 11-in yarısında danışdıq. Dedim ki, müvafiq icra orqanlarının rəhbərlərini də dəvət edin, bunu müzakirə edək. İndi saat birə iyirmi dəqiqə işləyibdir. Təxminən iki saat lazım oldu ki, sizi yığsın. Düzdür, bu, hamıya aid deyil, bəziləri iş yerində idi, amma bəziləri bura iki saata gəldilər. Çünki işdə deyildilər. Bu, dözülməz bir haldır. Buna son qoymaq lazımdır. Mən sizə ciddi xəbərdarlıq edirəm. Mən sadəcə olaraq, kameralar qarşısında ad çəkmək istəmirəm, kameralar çıxandan sonra ad çəkəcəyəm. Mən sizi xalq qarşısında biabır etmək istəmirəm. Nədir, ölkənin bütün məsələləri həll olunub, bütün problemlər öz həllini tapıb ki, siz səhər istirahət edirsiniz?! Özü də nə səhər, artıq günortadır. Saat birə iyirmi dəqiqə işləyir. Təxminən iki saat bundan əvvəl mən Baş nazirə dedim ki, bunları çağırın. Baş nazir, sizdən qat-qat yaşlı olan adam yerində, Prezidentin İcra Aparatının rəhbəri yerində, siz isə yoxsunuz. Nə ilə məşğulsunuz?
Mən sizə ciddi xəbərdarlıq edirəm. Vəzifəli şəxs, məsuliyyət daşıyan şəxs işlə məşğul olmalıdır. Prezident altıncı gün məsələləri həll etmək üçün səhər işə gəlibdir. Sizi isə tapmaq mümkün deyildir. Ona görə ciddi nəticə çıxarın və bu halları yığışdırın.
O ki qaldı energetika məsələlərinə, indi Azərbaycanın qarşısında böyük vəzifələr durur. Biz bunları həll etməliyik. Bizim energetika sistemimiz təkmilləşir, müasirləşir. Çox böyük işlər görürük. Həm elektrik enerjisi istehsalının keyfiyyəti artır, həm də regionların sosial-iqtisadi inkişafı Proqramı çərçivəsində, Bakı qəsəbələrinin inkişafı Proqramı çərçivəsində yeni elektrik stansiyaları tikilir, qaz xətləri çəkilir. Digər energetika infrastrukturu da yaradılır. Ancaq gərək biz bütün məsələlərə bir daha baxaq. Elə etməliyik ki, qış aylarında nə elektrik enerjisi, nə də qaz qıtlığı olmasın. Bunu etmək üçün indidən tədbirlər görməliyik. Qaz anbarlarına kifayət qədər qaz vurulmasını təmin etməliyik. Elektrik stansiyalarının səmərəli işləməsini təmin etməliyik. İstilik sisteminin bərpasına daha da ciddi yanaşmalıyıq. Bilirsiniz ki, bu sahədə böyük tədbirlər görülür və “Azəristiliktəchizat”ın yaranmasından sonra Bakı şəhərinin çoxmərtəbəli binalarının istilik təchizatı təmin olunur. Düzdür, tam həcmdə deyil, amma çalışırıq ki, tam həcmdə olsun. Bir tərəfdən əhaliyə istilik veriləcək, digər tərəfdən, elektrik enerjisinə qənaət olunacaqdır.
Azərbaycan qazın bir miqdarını hələ ki, xaricdən idxal edir. Bu, bizim enerji balansında öz əksini tapır. Biz gələcəkdə də bunu etmək fikrindəyik. Eyni zamanda, “Şahdəniz” qaz yatağının istismara verilməsindən sonra Azərbaycanda daha böyük qaz hasilatı gözlənilir.
Yəni, bütün bu məsələlər bir-biri ilə bağlıdır və bunun təməlində Azərbaycanın enerji təhlükəsizliyi məsələləri dayanır. Biz bu baxımdan kifayət qədər imkanlara malikik. Biz enerji təhlükəsizliyi məsələlərini özümüz həll edirik və imkanlarımızı daha da artırırıq. Məhz bu məqsədlə həm rayonlarda, həm də Sumqayıt şəhərində yeni elektrik stansiyaları tikilir və digər stansiyaların tikintisi də nəzərdə tutulur. Onların bəziləri artıq istismara verilibdir.
Astara Elektrik Stansiyasının istismara verilməsindən sonra bu bölgədə elektrik enerjisi istehlakı təxminən 50 faiz artıbdır və keyfiyyət də artıbdır. Yəni bu, nəyi göstərir?! Onu göstərir ki, əvvəllər kifayət qədər elektrik enerjisi verilmirdi. Əgər 50 faiz artıbdırsa, deməli, həmin 50 faiz yox idi, insanlar çətinlik çəkirdilər. Həmişə mən soruşanda ki, bölgələrdə elektrik enerjisi ilə bağlı vəziyyət necədir, deyirdilər yaxşıdır. Amma mən bilirəm ki, belə deyil. Mən rayonlarda oluram, insanlarla görüşürəm, məlumatım var. Əgər biz cənub bölgəsinin elektrik enerjisi təminatını 50 faiz artıra bilmişiksə, deməli, başqa bölgələrdə də qıtlıq var. İndi başqa bölgələrdə elektrik stansiyalarının tikintisindən sonra orada da təminat yaxşılaşmalıdır.
Uzun fasilədən sonra biz Naxçıvanı qazla təmin etməyə başladıq. Bu da həm iqtisadi, həm də sosial baxımdan böyük məsələdir. 13 ildən sonra Naxçıvana təbii qazın verilməsi böyük nailiyyətdir. İndi orada 90 meqavat gücündə yeni elektrik stansiyası tikilir. Çoxdan fəaliyyətsiz qalmış elektrik stansiyası da bərpa olunur və o da 50 meqavat enerji verəcəkdir. Yəni biz Naxçıvanın da enerji təhlükəsizliyi məsələlərini həll edirik. Çox işlər görülür.
Mən “Azəriqaz”a göstəriş vermişəm ki, əvvəllər qazlaşdırılmamış bölgələrə qaz xətləri çəkilsin. Vəsait də ayırdıq, indi də işlər gedir, Lerikə və Yardımlıya qaz xətləri çəkilir. O rayonlarda heç vaxt qaz olmamışdır. Heç sovet vaxtında da oraya xətlər çəkilməmişdir. Çünki relyef çox çətindir və çox böyük texniki çətinliklər var. Təbii ki, maliyyə məsələləri də həll olunmalıdır. Amma biz bunu edirik. Çünki gərək insanlar təbii qazla təmin olunsunlar, daha da yaxşı yaşasınlar. Yenə də deyirəm, bütün bu məsələlər, əlbəttə, bizim öz imkanlarımızla bağlıdır.
Azərbaycan indi böyük həcmdə neft hasil edən ölkəyə çevrilir. Azərbaycanda qaz hasilatı artır və artmalıdır. Həm “Şahdəniz” qaz yatağından hasilata başlanacaq, eyni zamanda, Dövlət Neft Şirkəti qarşısında vəzifə qoymuşam ki, qaz hasilatını artırsın. İndi böyük işlər görülür. Mənə verilən məlumata görə, gələn il, bəlkə də, 500 milyon - 1 milyard kubmetr arasında əlavə qazın hasil edilməsi planlaşdırılır.
Bu gün bu məsələləri müzakirə edəcəyik və əminəm ki, qəbul ediləcək qərarlar energetika sektorundakı vəziyyəti daha da yaxşılaşdıracaqdır.
X X X
Sonra müşavirədə gündəlikdəki məsələlər barədə geniş müzakirə aparıldı.