RƏSMİ XRONİKA
AZƏRBAYCAN PREZİDENTİ İLHAM ƏLİYEV BAŞ VERMİŞ QƏZA İLƏ ƏLAQƏDAR LƏNKƏRANDA OLMUŞDUR
Dövlətimizin başçısı hadisə yerində olmuş, qəzanın səbəbləri, xilasetmə işlərinin gedişi ilə maraqlanmışdır.
Prezident İlham Əliyevə məlumat verilmişdir ki, qəza baş vermiş binada 90 ailədən 231 nəfər qeydiyyatda var idi. Lakin sakinlərin bəziləri burada yaşamırdı. Uçan hissədə isə 15 ailə, 47 nəfər yaşayırdı. Qəzada 16 nəfər yaralanmış, 6 nəfər isə həlak olmuşdur. Həlak olanların dördü binanın sakini, ikisi isə əşyaları çıxarmaq üçün qohumlarına kömək etməyə gələnlərdir.
Yanvarın 29-da səhərdən binada çatlar böyüməyə başlamışdır. Burada yanvarın 21-dən təmir işləri aparılırdı.
Bina 1970-ci illərdə inşa olunubdur. Çox keyfiyyətsiz tikildiyindən, zirzəmiyə dolan su özülü zədələməyə başlamış və nəticədə çatlar əmələ gəlmiş və bina birdən çökmüşdür. Sakinlərə buranı tərk etmək barədə sonuncu xəbərdarlıqdan yarım saat sonra bina çökmüşdür. Sakinlərin çoxu artıq burada yaşamırdı, gündüzlər baş çəkib gedirdilər. Xəsarət alanlar və ölənlər arasında ev əşyalarını aparmağa gələnlər də olubdur.
Bildirildi ki, qəza yerində xilasedicilər kifayət qədərdir. Səhərə yaxın bir nəfəri xilas etmişlər. Onun vəziyyəti yaxşıdır. Müdafiə Nazirliyinin Mülki Müdafiə Qüvvələrinin əməkdaşları gecə-gündüz işləyirlər. Yuxarı hissələrdəki plitələr qaldırıcı kranlar vasitəsilə götürülür, ərazi təmizlənir. İndi binanın qalan hissəsinə daxil olmaq təhlükəlidir. Buranı təmizləyəndən sonra oraya baxış keçiriləcəkdir. Əgər orada təhlükə olmasa, sakinlərə əşyalarını götürməyə icazə veriləcəkdir.
Şəhər icra hakimiyyəti tərəfindən həlak olanların ailələrinə hər cür yardım edilibdir.
Səhiyyə naziri ƏLİ İNSANOV Azərbaycan Prezidentinə məlumat verərək dedi ki, Sizin tapşırığınızdan dərhal sonra həkim briqadası Lənkərana gəlib işə başladı. Müraciət edənlərdən ikisi ambulator müayinəsindən sonra gedibdir. İki nəfərin üzərində cərrahiyyə əməliyyatı aparılmışdır. Hazırda reanimasiyada 7, palatalarda isə 9 yaralı var. Bakıdan gələn həkimlər işləyirlər, lazımi dava-dərman gətirilmişdir. Yaralıların Bakıya aparılmasına ehtiyac yoxdur, hamısı sağalacaqdır.
Baş nazirin birinci müavini YAQUB EYYUBOV bildirdi ki, layihə instututunun ekspertləri buradadır. Dağıntılar təmizləndikdən sonra işə başlayacaqlar. Hər şey təhlil olunduqdan sonra hadisənin səbəbləri və günahkarlar haqqında Sizə məruzə olunacaqdır.
X X X
Prezident İlham Əliyev şəhər mərkəzi xəstəxanasında yerləşdirilmiş yaralılara baş çəkdi.
Həkimlər yaralılar üzərində aparılan əməliyyatlar, xəsarətin dərəcələri barədə məlumat verdilər, yaralıların vəziyyətinin normal olduğunu, onlara hər cür tibbi xidmət göstərildiyini bildirdilər.
Yaralılara Allahdan şəfa diləyən Prezident İLHAM ƏLİYEV dedi ki, siz heç nədən narahat olmayın, nə lazımdırsa, ediləcəkdir. Mən göstəriş verəcəyəm, siz bütün lazımi ev əşyaları ilə də təmin olunacaqsınız. Bütün məsələlər araşdırılacaq, günahkarlar cəzalandırılacaqlar. Əsas odur ki, siz tezliklə sağalasınız. Dövlət Komissiyasının üzvləri və digər əlaqədar təşkilatların rəhbərləri hər bir ailənin problemləri aradan qaldırılanadək Lənkəranda qalacaqlar. Bütün ailələr mənzillə təmin ediləcək, dəyən ziyanın ödənilməsi üçün kompensasiya veriləcək və digər yardımlar veriləcəkdir.
Yaralılara göstərdiyi bu diqqətə görə Prezidentə təşəkkür edərək dedilər ki, çox sağ olun, belə bir vaxtda bizi tənha qoymadınız, buraya gəldiniz, bizə mənəvi dayaq oldunuz.
Dövlətimizin başçısı şəhər rəhbərliyinə zərər çəkənlərə bütün zəruri köməyin edilməsi, evsiz qalmış ailələrin yerləşdirilməsi, hadisə ilə əlaqədar yaradılmış Dövlət Komissiyasının üzvlərinə isə qəzanın nəticələrinin tezliklə aradan qaldırılması barədə konkret tapşırıqlar verdi.
X X X
Azərbaycan Prezidenti İlham Əliyev xəstəxanadan Lənkəran Şəhər İcra Hakimiyyətinin binasına gəldi. Əvvəlcə, dövlətimizin başçısına nazirliklərin və komitələrin, icra hakimiyyətinin hadisədən sonra gördüyü işlər, faciənin nəticələrini aradan qaldırmaq üçün həyata keçirilən tədbirlər barədə məruzə edildi.
Dövlətimizin başçısı onlara müvafiq göstərişlər verdi.
X X X
Azərbaycan Prezidenti İlham Əliyev daha sonra Lənkəran Şəhər İcra Hakimiyyətində operativ müşavirə keçirdi. Nazirlik, komitə və şirkət rəhbərlərinin, şəhər ictimaiyyəti nümayəndələrinin iştirak etdikləri müşavirədə Prezident İlham Əliyev çıxış etdi.