RƏSMİ XRONİKA
AZƏRBAYCAN RESPUBLİKASININ PREZİDENTİ HEYDƏR ƏLİYEVİN ANS TELEKANALINA MÜSAHİBƏSİ
Azərbaycan Respublikasının Prezidenti Heydər Əliyev fevralın 19-da axşam Klivlenddən ANS telekanalının baş redaktoru Mirşahin Ağayevə telefonla müsahibə vermişdir. Həmin müsahibənin mətnini oxuculara təqdim edirik.
MİRŞAHİN AĞAYEV: Hər vaxtınız xeyir, cənab Prezident!
HEYDƏR ƏLİYEV: Salaməleyküm, axşamın xeyir, Mirşahin.
MİRŞAHİN AĞAYEV: Cənab Prezident, necəsiniz, özünüzü necə hiss edirsiniz?
HEYDƏR ƏLİYEV: Sağ ol, özümü yaxşı hiss edirəm.
MİRŞAHİN AĞAYEV: Maşallah, elə gümrah görünürsünüz, o dərəcədə gümrah addımlayırdınız ki, tamaşaçılarımızda belə təəssürat var ki, guya bu, on-on beş gün əvvəlki çəkiliş idi.
HEYDƏR ƏLİYEV: Mən elə əvvəl də gümrah olmuşam, indi də gümraham, buna heç kəsin şübhəsi olmasın. Ancaq təbiidir, cərrahiyyə əməliyyatından sonra müəyyən qədər reabilitasiya, müalicə lazımdır. Mən də indi bu dövrü keçirəm.
SUAL: Cənab Prezident, əməliyyatdan sonra keçən bu bir neçə gün ərzində özünüzü necə hiss edirsiniz? Ümumiyyətlə, qan təzyiqiniz, qida rejiminiz, yuxunuz normaldırmı?
CAVAB: Hər şey normaldır, hər şey yaxşıdır, istənilən səviyyədədir, hər şey yaxşı gedir. Mən çox məmnunam ki, bu əməliyyatı da həyata keçirmişik. Həkimlərin dediyinə görə, bu, lazım idi. Mən bundan çox məmnunam və güman edirəm, çox az qalıb ki, reabilitasiya dövrü də qurtarsın və mən Vətənə gəlim və sizinlə birlikdə olum.
SUAL: İnşallah. Birdən-birə niyə belə qərar verdiniz ki, bu əməliyyatın aparılması zəruridir?
CAVAB: Bilirsiniz, birdən-birə deyildir. Məni müayinə etdilər, tibbi müayinə zamanı məlum oldu ki, belə bir şey var. Cərrahiyyə əməliyyatını etmək də olardı, bir az gözləmək də olardı. Amma mən hesab etdim ki, yaxşı olar, edək, bu da aradan çıxsın. Həkimlər də belə fikirdə idilər. Ona görə mən həkimlərin məsləhəti ilə razılaşdım və bunu da etdik.
SUAL: Həkimlər işləməyə icazə verirmi? Yəqin ki, kimlərisə qəbul edirsiniz, orada müxtəlif görüşləriniz olur.
CAVAB: Mən burada heç kəsi qəbul etmirəm. Çünki bu klinikada çox ciddi rejim var. Hər yerdən yanıma gəlmək istəyənlər çoxdur, amma mən qəbul etmirəm. İşləməyinə işləyirəm. Bütün günü işləyirəm. Buradakı vaxtla Bakıdakı vaxtın fərqi var. İndi Bakıda gün qurtarır, burada isə gün təzə başlayıbdır. Mən telefon əlaqəsi saxlayıram, respublikada ayrı-ayrı vəzifəli şəxslərdən məlumatlar alıram, lazımi göstərişlər verirəm. Respublikada gedən bütün prosesləri izləyirəm, hər şeydən xəbərdaram, hər şeyi bilirəm və hesab edirəm ki, indi respublikamızda işlər yaxşı gedir. Çox məmnunam ki, mənim respublikadan müəyyən qədər ayrı düşdüyüm zamanda ölkədə əmin-amanlıq var, rahatlıq var, asayiş normal səviyyədədir. Mən bundan çox məmnunam. Yəni respublika ilə daim əlaqəm var.
SUAL: Cənab Prezident, sonuncu sualımı verirəm, Sizi yormaq istəmirəm. Bizim bildiyimizə görə, bu yaxınlarda Amerika Birləşmiş Ştatlarında Xocalı faciəsinin qara ildönümü münasibətilə tədbir keçiriləcəkdir. Bunu Amerikadakı Azərbaycan cəmiyyəti təşkil edir. Sizi dəvət ediblərmi? Dəvət olunmuşsunuzsa, iştirak edəcəksinizmi?
CAVAB: Bəli, bunu bilirəm, ancaq mənim orada iştirak etməyimə ehtiyac yoxdur. Sadəcə, mən burada müalicəmi qurtarandan sonra Bakıya gələcəyəm. Mənim orada iştirak etməyimə ehtiyac yoxdur.
MİRŞAHİN AĞAYEV: Cənab Prezident, tez sağalın. Kollektivimiz adından, Azərbaycanın bütün televiziya tamaşaçıları adından Sizə minnətdarlığımı bildirirəm.
HEYDƏR ƏLİYEV: Sağ ol. Mən də sizin ANS telekanalı vasitəsilə Azərbaycan vətəndaşlarına, həmvətənlərimə öz salamımı, sayğımı, hörmətimi, məhəbbətimi yetirirəm. Hamıya cansağlığı arzulayıram. İnsan üçün cansağlığı hər şeydən üstündür. Cansağlığı, işlərinizdə uğurlar arzu edirəm. Çox məmnunam ki, sizin telekanal vasitəsilə bizim tamaşaçılarla, vətəndaşlarla bir daha ünsiyyətdə oldum.
MİRŞAHİN AĞAYEV: Təşəkkür edirəm, Sizə minnətdaram.
HEYDƏR ƏLİYEV: Sağ ol, təşəkkür edirəm.