RƏSMİ XRONİKA
AZƏRBAYCAN RESPUBLİKASININ PREZİDENTİ HEYDƏR ƏLİYEVİN FRANSA RESPUBLİKASININ YENİ SEÇİLMİŞ PREZİDENTİ JAK ŞİRAK İLƏ GÖRÜŞÜ
Heydər Əliyev cənab Jak Şirak ilə tanış olmasından razı qaldığını bildirdi və Fransa Respublikasının yeni Prezidenti seçilməsi münasibətilə onu təbrik etdi.
Azərbaycan Prezidenti ilə tanış olmasından məmnunluq hissi keçirdiyini söyləyən Jak Şirak eyni zamanda qeyd etdi ki, o, Heydər Əliyevi yaxşı tanıyır. Ölkənin yeni Prezidenti faşizm üzərində Qələbinin 50 illiyi münasibətilə ali qonağı təbrik edərək, Azərbaycan rəhbərinin Parisdə keçirilən yubiley təntənələrində iştirak etməsindən sevinc hissi duyduğunu bildirdi.
Heydər Əliyev qeyd etdi ki, Fransada yenicə keçirilmiş prezident seçkilərində cənab Jak Şirakın qalib gəlməsi respublikamızda razılıqla qarşılanmışdır. O ümidvar olduğunu bildirdi ki, Prezident vəzifəsində cənab Jak Şirak xalqlarımızın bir-birinə daha da yaxınlaşması, Fransa-Azərbaycan əlaqələrinin inkişafı üçün öz səyini əsirgəməyəcəkdir.
Söhbət zamanı qeyd edildi ki, Fransa şirkətlərinin Azərbaycan iqtisadiyyatına sərmayə qoyması ölkələrimiz arasında əlaqələrin genişlənməsində mühüm rol oynayacaqdır. Bununla əlaqədar Heydər Əliyev də, Jak Şirak da eyni vaxtda “Elf Atigen” şirkətinin adını çəkdilər. Azərbaycan rəhbəri həmin şirkətin Xəzərdə neft yataqlarının birgə işlənməsi sahəsində respublikamızın dövlət şirkəti ilə əməkdaşlıq etmək istədiyini söylədi və müsahibinə bildirdi ki, bu görüş qurtardıqdan sonra o, “Elf Atigen”in prezidenti ilə görüşəcəkdir. Cənab Jak Şirak bu məlumatdan çox razı qaldığını söylədi.
Prezident Heydər Əliyev ölkələrimiz arasında imzalanmış dostluq və əməkdaşlıq haqqında müqavilənin həyata keçirilməsinin vacib olduğunu vurğuladı və qeyd etdi ki, gənc Azərbaycan dövləti öz müstəqilliyini, suverenliyini möhkəmləndirmək yolunda Fransa kimi böyük dövlətin dəstəyinə ehtiyac duyur. Dövlət başçısı dedi ki. Fransa dünyanın ən böyük dövlətlərindən biri olmaqla yanaşı, Avropada demokratiyanın dayağıdır.
Azərbaycan Prezidenti Heydər Əliyev cənab Jak Şiraka Ermənistan-Azərbaycan müharibəsi, Ermənistanın açıq hərbi təcavüzü nəticəsində ölkəmizin ərazisinin 20 faizinin işğal olunması, zəbt edilmiş rayonlardan bir milyondan çox azərbaycanlının qaçqın düşməsi və hazırda ağır şəraitdə yaşaması barədə də məlumat verdi. Eyni zamanda o qeyd etdi ki, Azərbaycan bu münaqişəyə sülh yolu ilə son qoyulmasını istəyir. Bununla əlaqədar Azərbaycan rəhbəri xatırlatdı ki, 1994-cü ilin dekabrında ATƏT-in Budapeşt Zirvə toplantısında iştirak edən dövlət başçıları həmin münaqişəyə bu beynəlxalq təşkilat çərçivəsində son qoyulmasına tərəfdar olduqlarını bildirmiş və bu məqsədlə ATƏT-in sülhü mühafizə qüvvələrini yaratmağı qərara almışlar. Azərbaycan Prezidenti həmin qətnamənin qəbul olunmasını dəstəklədiyinə görə Fransa hökumətinə minnətdarlığını bildirdi.
Görüşün sonunda Heydər Əliyev cənab Jak Şirakı Azərbaycana rəsmi səfərə dəvət etdi.