MƏDƏNİYYƏT


“Əbədi ezamiyyət” filmi qardaş ölkədə rəğbətlə qarşılanıb VİDEO

Ankara, 13 sentyabr, AZƏRTAC

Heydər Əliyev Fondunun dəstəyi və Arzu Əliyevanın baş prodüserliyi ilə Bakı Media Mərkəzi tərəfindən çəkilmiş “Əbədi ezamiyyət” sənədli filmi Ankarada nümayiş olunub.

Rəsmi şəxslər, o cümlədən səfir Xəzər İbrahim, Türkiyə Milli Təhlükəsizlik Şurasının Baş katibi Seyfullah Hacımüftüoğlu, Türkiyə-Azərbaycan parlamentlərarası dostluq qrupunun rəhbəri Şamil Ayrım, eləcə də paytaxt ictimaiyyətinin görkəmli nümayəndələri tamaşaçılar arasında olublar.

Azərbaycan tarixinin ən maraqlı və şərəfli səhifələrindən birinə işıq salan uğurlu ekran əsərini izləyənlər tədbirdən dərin təəssüratlarla ayrılıblar.

Türkiyə Milli Təhlükəsizlik Şurasının Baş katibi Seyfullah Hacımüftüoğlu film barədə təəssüratlarını AZƏRTAC-a bölüşərək deyib ki, ekran əsərini duyğusuz izləmək mümkün deyil. Film istiqlalımızın nə qədər qiymətli olduğunu tərənnüm edir.

Həkim Nejat Soyan isə hesab edir ki, “Əbədi ezamiyyət” Azərbaycanın dövlətçilik tarixi barədə Türkiyə ictimaiyyətini məlumatlandırmaq baxımından xüsusi əhəmiyyət kəsb edir.

Azərbaycan Xalq Cümhuriyyətinin 1919-cu ilin yanvarında parlament sədri Əlimərdan bəy Topçubaşovun rəhbərliyi ilə Paris Sülh Konfransına ezam etdiyi nümayəndə heyətinin keşməkeşli taleyindən bəhs edən filmin Ankaradakı təqdimatı ölkəmizin Türkiyədəki səfirliyi və SOCAR-Türkiyənin birgə təşkilatçılığı əsasında diplomatik xidmət orqanlarımızın 100 illiyinə həsr edilib.

Sabir Şahtaxtı

AZƏRTAC-ın xüsusi müxbiri

Ankara

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.