REGİONLAR
Abşeron rayonunda Anım Gününə həsr olunmuş silsilə tədbirlər keçirilib
Xırdalan, 27 sentyabr, Ə.Rzayeva, AZƏRTAC
Vətənimizin ərazi bütövlüyü uğrunda canını fəda edən Vətən müharibəsi şəhidlərinin Anım Gününə ehtiram əlaməti olaraq Ekologiya və Təbii Sərvətlər Nazirliyi tərəfindən Bakı-Şamaxı yolunun Abşeron rayonuna düşən hissəsində geniş ağacəkmə aksiyası keçirilib.
AZƏRTAC xəbər verir ki, Ekologiya və təbii sərvətlər naziri Muxtar Babayev, Abşeron Rayon İcra Hakimiyyətinin başçısı Abdin Fərzəliyev, “N” saylı hərbi hissənin korpus komandiri - Vətən Müharibəsi Qəhrəmanı, general-mayor Kənan Seyidov, ANAMA əməkdaşları, şəhid ailələri və qazilərin iştirakı ilə keçirilən aksiyada 1000-dən artıq Eldar şamı və zeytun ağacı əkilib.
Sonra Xırdalan şəhərində yerləşən Heydər Əliyev Parkında 27 Sentyabr - Anım Gününə həsr edilmiş ümumrayon tədbiri keçirilib. Tədbirdə Abşeron Rayon İcra Hakimiyyətinin başçısı Abdin Fərzəliyev, rayonun hüquq-mühafizə orqanlarının rəhbərləri, YAP Abşeron rayon təşkilatının sədri, şəhid ailələri, qazilər və rayon ictimaiyyəti iştirak edib.
İştirakçılar əvvəlcə ümummilli lider Heydər Əliyevin abidəsi önünə tər çiçəklər düzərək xatirəsini dərin ehtiramla anıblar.
Tədbirdə əvvəlcə Dövlət Himni oxunub, ulu öndər Heydər Əliyevin və vətənimizin bütövlüyü uğrunda canından keçmiş şəhidlərimizin xatirəsi bir dəqiqəlik sükutla yad edilib.
Rayon icra hakimiyyətinin başçısı Abdin Fərzəliyev çıxış edərək bildirib ki, şanlı Azərbaycan Ordusu Müzəffər Ali Baş Komandan İlham Əliyevin qətiyyətli rəhbərliyi ilə cəmi 44 gün ərzində düşməni məğlub edərək torpaqlarımızı işğalçılardan azad edib. Vurğulanıb ki, Prezident İlham Əliyevin möhkəm iradəsi, xalq-iqtidar birliyi, ordumuzun, şəhidlərimizin qəhrəmanlığı və şücaəti sayəsində Vətənimizin bütövlüyü təmin olunub. Hazırda işğaldan azad edilmiş torpaqlarımızda geniş yenidənqurma, abadlıq-quruculuq işlərinin həyata keçirilir.
Sonra rayon Ağsaqqallar Şurasının sədri Nadir Ağayev, şəhid Şamil Nəcəfovun anası Gülşən Qazanxanova, şəhid Rəşad Mehdiyevin atası Rəhman Mehdiyev və digərləri çıxış edərək ordumuzun şücaətindən, ölkəmizdə şəhid və qazi ailələrinə göstərilən böyük diqqət və qayğıdan danışıblar.
Tədbirdən sonra Birinci Qarabağ və Vətən müharibəsi zamanı canından keçmiş şəhidlərimizin məzarları üzərinə əklillər və gül dəstələri düzülüb, rayonun kənd və qəsəbələrində ehsan süfrələri açılıb.
Qeyd edək ki, Abşeron Rayon İcra Hakimiyyətinin başçısı Abdin Fərzəliyev, RİH-in məsul əməkdaşları, rayonun hüquq-mühafizə orqanları, idarə və təşkilatları tərəfindən 26-27 sentyabr tarixlərində Abşeron rayonunda yaşayan şəhid ailələri və qazilər ziyarət olunub, onların qayğıları ilə maraqlanılıb, şəhidlərimizin xalqımızın qəlbində və tariximizdə daim yaşayacaqları vurğulanıb.
Tədbir və görüşlər zamanı şəhid ailələri və qazilər Prezident İlham Əliyevə və Birinci vitse-prezident Mehriban xanım Əliyevaya onlara göstərilən davamlı diqqət və qayğıya görə dərin minnətdarlıqlarını bildiriblər.