Bakı, 5 iyun, AZƏRTAC

Elm və Təhsil Nazirliyi Dendrologiya İnstitutunun elmi işçisi Afət Bağırlı müəssisənin təcrübə sahəsində feyxoa (Feijoa sellowiana Berg.) bitkisinin tədqiqatını aparıb.

Bu barədə AZƏRTAC-a institutdan bildirilib. Müəyyən olunub ki, Feijoa sellowiana Berg. istisevər, quraqlığa və şaxtaya davamlı bitkidir. Vegetasiya dövrü üçün havanın optimal temperaturu 18-20°C, çiçəkləmə üçün 20°-25°C-dir. İsti yay günlərində zoğun boy atması dayanır, meyvələr zəif inkişaf edir. İlk payız yağışları başlayanda (payız fəslinin əvvəllərində) bitki yenidən boy atır. Çiçəkləmə və meyvə verməsi mərhələləri, məhsuldarlıq müvafiq metodikalara əsasən öyrənilib. Feijoa sellowiana Berg. torpağın qrunt sularının dərin yerləşdiyi gilli-qumlu torpaqlarda yaxşı inkişaf edir. Azərbaycanda, Lənkəranın təbii şəraitində feyxoanın vegetasiyası martın axırı aprelin əvvəlində qurtarır. Lənkəran regionuna nisbətən Abşeron şəraitində vegetasiya 10-15 gün erkən baş verir. Feijoa sellowiana Berg. zoğlarının iki inkişaf dövrü müşahidə olunur. Birincisi daha intensiv gedən yaz-yay böyüməsi, ikincisi isə nisbətən zəif gedən payız böyüməsidir.

Aparılan müşahidələrdən belə nəticəyə gəlmək olar ki, Abşeron şəraitində introduksiya olunan Feijoa sellowiana Berg. növünün çiçəkləmə və meyvə verməsi ekoloji amillərdən asılıdır. Ümumilikdə sitrus bitkiləri öz vətənində keyfiyyətli toxum və meyvə verməsinə baxmayaraq, Abşeronda da yaxşı inkişaf edir. Onu çay, limon, naringi üçün yararlı olmayan torpaq sahələrində belə əkmək mümkündür. Feyxoanı o biri sitrus bitkiləri kimi şaxtadan qorumaq da lazım gəlmir. Adətən, oktyabr-noyabr ayları feyxoa üçün ən məhsuldar dövrdür.