REGİONLAR
Abşeronda vətəndaşların müraciətləri dinlənilib
Xırdalan, 3 sentyabr, Ə.Rzayeva, AZƏRTAC
Azərbaycan Respublikasının Prezidenti İlham Əliyevin vətəndaşların müraciətlərinin operativ həlli ilə bağlı göstərişlərinə uyğun olaraq Abşeron rayonunda vətəndaş qəbulları keçirilir.
Abşeron Rayon İcra Hakimiyyətinin inzibati binasında, eləcə də rayonun Pirəkəşkül-Qobustan və Fatmayı kəndlərində sakinlərlə keçirilən qəbullarda rayon icra hakimiyyətinin başçısı Abdin Fərzəliyev, hüquq-mühafizə orqanlarının, xidmət təşkilatlarının rəhbərləri, şəhid ailələri, qazilər və kənd sakinləri iştirak ediblər.
İcra hakimiyyətindən AZƏRTAC-a bildirilib ki, qəbulda çıxış edən Abdin Fərzəliyev Abşeron rayonunda əhalinin sürətli artımının müşahidə olunduğunu və bununla əlaqədar bir sıra ehtiyacların meydana gəldiyini, məktəb və bağçalarda sıxlığın yarandığını vurğulayıb. Rayonun kənd və qəsəbələrində olan problemlərin öyrənildiyini və onların tez bir zamanda həlli istiqamətində proqramların hazırlandığını vurğulayan icra başçısı Abşeronda həyata keçirilən infrastruktur layihələri barəsində məlumat verib.
Sonra çıxış edən sakinlər sənədsiz torpaq sahələrinin sənədləşdirilməsində, kənd ərazisinin içməli su təminatının yaxşılaşdırılmasında, marşrut xətlərinin müasir standartlara uyğunlaşdıırımasında, elektrik enerjisinin təminatı istiqamətində layihələrin icra olunmasında, inşası yarımçıq qalmış bağça binasının tikintisinin başa çatdırılmasında, tibb məntəqəsinin təmir olunmasında, təhlükəsizlik kameralarının quraşdırılmasında və digər məsələlərin həllində kömək göstərilməsini xahiş ediblər.
Qəbullarda sakinlər tərəfindən qaldırılan məsələlər yerindəcə həll olunub, digərlərinin həlli istiqamətində isə müvafiq tapşırıqlar verilib.