REGİONLAR


Abşeronlu şəhid ailələri və qazilər Naftalana müalicə və reabilitasiyaya göndəriliblər

Xırdalan, 9 avqust, Ətrabə Rzayeva, AZƏRTAC

Müzəffər Ali Baş Komandan, Prezident İlham Əliyevin rəhbərliyi ilə xalqımızın Qələbə qazandığı 44 günlük Vətən müharibəsində şəhidlik zirvəsinə yüksələn abşeronlu igidlərimizin ailələrinin və qazilərimizin diqqət mərkəzində saxlanılması, onların qayğılarının öyrənilməsi, qarşılaşdıqları problemlərin aradan qaldırılması, eləcə də onların müalicəsinin və istirahətlərinin təşkil olunması istiqamətində Abşeron Rayon İcra Hakimiyyəti tərəfindən həyata keçirilən layihələr davam etdirilir.

AZƏRTAC xəbər verir ki, Abşeron Rayon İcra Hakimiyyətinin təşkilatçılığı ilə şəhid ailələrindən və qazilərimizdən ibarət növbəti 14 ailə (15 nəfər) ölkəmizin dilbər guşələrindən olan Naftalan şəhərinə yola salınıb. Onlar Naftalandakı istirahət mərkəzlərindən birində müalicə kursu keçəcəklər.

Bu münasibətlə Abşeron Rayon İcra Hakimiyyətində şəhid ailələri və qazilərlə görüş keçirilib. Görüşdə ümummilli lider Heydər Əliyevin və ölkəmizin bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.

Rayon başçısı Abdin Fərzəliyev bildirib ki, icra hakimiyyətinin müvafiq şöbəsinin hazırladığı plana uyğun olaraq abşeronlu şəhid ailələrinin və qazilərin hissə-hissə ölkəmizin səfalı yerlərində istirahəti təşkil olunacaq. Bu göndərişin artıq ənənə xarakter daşıdığını, bundan sonra da layihənin davam etdiriləcəyini vurğulayan icra başçısı qeyd edib ki, bu gün cəmiyyətimiz şəhidlərimizlə, şəhid ailələrimizlə və qazilərimizlə fəxr edir, onlar hamımızın qürur yeri, vətənpərvərlik nümunəmizdir.

Bildirilib ki, Müzəffər Ali Baş Komandan, Prezident İlham Əliyevin “Dəmir yumruğ”u ətrafında birləşən, xalqımızın 30 illik vətən həsrətinə son qoyan şəhidlərimizin xatirəsi daima əziz tutulacaq və onların adlarının yaşadılması, əbədiləşdirilməsi istiqamətində addımlar atılır və bundan sonra da lazımi işlər görüləcək. Hazırda işğaldan azad olunan dədə-baba yurdlarımızda böyük və surətli yenidənqurma, abadlıq-quruculuq işlərinin həyata keçirildiyini, şəhərlərimizin, kəndlərimizin yenidən qurulduğunu qeyd edən icra başçısı şəhid ailələrinin Kəlbəcər və Laçında istirahətlərinin təşkil olunacağı günün çox yaxında olduğunu tədbir iştirakçılarının diqqətinə çatdırıb.

Daha sonra çıxış edən şəhid ailələri və qazilər onlara dövlət səviyyəsində böyük diqqət və qayğının göstərildiyini qeyd edib və buna görə Prezident İlham Əliyevə və Birinci vitse-prezident Mehriban Əliyevaya təşəkkürlərini bildiriblər.

Tədbirdən sonra xatirə şəkili çəkilib və şəhid ailələri və qazilər yola salınıb.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.