Ramana, Pirşağı və Əmircan qəsəbələrinin memarlıq planlaşdırma həlləri üzrə müsabiqənin qalibləri elan edilib

Bakı, 11 yanvar, AZƏRTAC

Dövlət Şəhərsalma və Arxitektura Komitəsi yanında Bakı Şəhər Memarlıq və Şəhərsalma Baş İdarəsinin təşəbbüsü ilə Azərbaycan Memarlar İttifaqı və “Bakı Abadlıq Xidməti” MMC ilə birgə təşkil olunmuş “Abşeron qəsəbələrinin memarlıq siması” adlı müsabiqənin birinci mərhələsinə yekun vurulub.

Komitənin İctimaiyyətlə əlaqələr şöbəsindən AZƏRTAC-a bildirilib ki, xüsusi karantin rejimi ilə əlaqədar münsiflər heyətinin onlayn formatda keçirilən iclasında müsabiqənin qalibləri müəyyənləşib.

Abşeronda son illər aparılan nəhəng quruculuq işlərinə təkan vermək, həmçinin milli incəsənət ruhunu yaşatmaq, özünəməxsus rəng çalarlarını yenidən canlandırmaq, yarımadanın tarixi-memarlıq ənənələrini qoruyaraq gələcək nəsillərə ötürmək məqsədilə təşkil olunan və ümumi mükafat fondu 60 min manat olan müsabiqədə iştirak etmək üçün 53 layihə təqdim edilib. Abşeronun digər qəsəbələrini də əhatə edəcək müsabiqə proqramının ilkin mərhələsində təqdim olunan layihələr Əmircan, Ramana və Pirşağını əhatə edib. Təqdim olunan layihələrdə qəsəbələrin estetik görünüşünün və həyat keyfiyyətinin inkişaf etdirilməsi, orijinallıq və mühit-məkan həllinin müəyyənləşdirilməsi kimi vacib məqamlar öz əksini tapıb.

Əmircan qəsəbəsi üzrə qalib elan edilən layihədə mövcud infrastruktur problemləri araşdırılıb və həllinə dair təkliflər irəli sürülüb. Qəsəbənin tarixinə, yerli ənənəvi memarlığa xas olan faktorların qabardılması və ətraf mühitlə həmahəng inkişaf ideyaları üzərində qurulan layihədə mövcud tikililərin fasad həlləri ilə yanaşı, məkanın xarici turistlər üçün cəlbediciliyinin daha da artırılması, turizm infrastrukturunun və turist marşrutlarının təkmilləşdirilməsi təklif edilib.

Pirşağı qəsəbəsi üzrə 1-ci yeri qazanan layihədə ictimai məkanların qıtlığı probleminin aradan qaldırılması üçün həm dalan içi məhəllələr, həm də mərkəzi küçələr boyu dəyişikliklərlə həllinə dair təkliflər öz əksini tapıb. Həmçinin layihədə avtomobillərin dominantlığının həlli məqsədilə yolların quruluş sxemində piyada və velosiped zolaqlarının əlavə olunması təklif olunub.

Müsabiqə proqramının ilkin mərhələsinin son qəsəbəsi olan Ramana üzrə qalib gələn layihədə ilk növbədə qəsəbənin özünəməxsus tarixini ön plana çıxarmaq məqsədilə qalaətrafı əraziyə fokus olunub. Sakinlərin gündəlik rifahını yaxşılaşdırmaq, ənənəvi məişət həyatını əks etdirmək üçün mövcud qeyri-yaşayış obyektlərinin bərpası üçün məkana uyğun rəng və memarlıq elementləri seçilib.

Təqdim olunan layihələrin hər biri ayrı-ayrılıqda münsiflər heyəti tərəfindən müxtəlif meyarlar üzrə dəyərləndirilib. Layihə hazırlanarkən aparılan araşdırmalar, qəsəbələrin məişət həyatı və iqliminin analizi, tarixi kontekstlə əlaqə, orijinallıq, simvolizm, bütövlük, memarlıq cizgiləri, istinad planı, bədii-qrafik həll, vizual təqdimat və sair meyarlar üzrə aparılan dəyərləndirmədən sonra qaliblər müəyyən edilib.

Münsiflər heyətinin qərarı ilə hər qəsəbə üzrə seçilən 4 layihənin müəlliflərinə pul mükafatlarının verilməsi nəzərdə tutulub. Xatırladaq ki, 1-ci yerin sahibi 10 min manat mükafat və 1-ci dərəcəli diplom, 2-ci yerin sahibi 5 min manat və 2-ci dərəcəli diplom, 3-cü yerin sahibləri (iki yer) isə hər biri 2 min 500 manat və 3-cü dərəcəli diplomla mükafatlandırılacaqlar. Digər iştirakçılara həvəsləndirici hədiyyələr və iştirakçı sertifikatları təqdim ediləcək. Seçilmiş layihələr və onların müəllifləri haqqında daha ətraflı məlumatla “www.absheronsimasi.az” saytında tanış olmaq mümkündür.