Bakı, 27 iyun, Emil Eyyubov, AZƏRTAC

Əbu-Dabinin Mədəniyyət və Turizm Departamenti sakinlərə və turistlərə həm Əbu-Dabidə, həm də Əl-Aynda şopinq etmək, kafe və restoranlara getmək, həmçinin əyləncələr üçün inanılmaz imkanlar təqdim etmək məqsədilə yay aksiyalarının keçirilməsini elan edib. İyunun 27-dən başlayan “Summer#inAbuDhabi” yay feeriyası avqustun 3-dək davam edəcək. Bu proqram çərçivəsində tematik parklar, muzeylər, otellər və restoranlar ziyarətçilərə yayın istisindən yaxalarını qurtarmaq üçün bir sıra variantlar təqdim edəcəklər.

Bundan başqa, çoxdan gözlənilən yay mövsümü Əbu-Dabinin İqtisadi İnkişaf Departamentinin dəstəyi ilə iyunun 18-dən avqustun 3-dək keçirilir. Bu aksiyada Əbu-Dabinin və Əl-Aynın 21 ticarət mərkəzi iştirak edir, ziyarətçilərə unikal təkliflər və əsas mükafatlara sahib olmaq fürsəti verilir.

Əbu-Dabinin Mədəniyyət və Turizm Departamentinin marketinq şöbəsinin direktoru Səid Əl-Səid deyib: “İstər bizim nəhəng ticarət mərkəzlərində şopinqlə məşğul olmaq, istər muzeylərdə ovsunlayıcı mədəniyyətlə əhatə olunmaq, istərsə də çox gözəl otellərdən zövq almaq və ya tematik parklarda çox maraqlı əyləncə axtarmaq - sizin xoşunuza nəyin gəlməsindən asılı olmayaraq, biz əminik ki, yay təkliflərimiz sizin ürəyinizcə olacaq. Əbu-Dabidə endirim mövsümü və “Summer#inAbuDhabi” çərçivəsində maraqlı festivallar keçiriləcək. Ümidvarıq ki, bu tədbirlərdə həm ölkə sakinləri, həm də qonaqlar iştirak edəcəklər. Ümumilikdə, bizim məqsədimiz bütün il ərzində turizm və pərakəndə ticarət sahəsində ən yaxşı təcrübəni təklif etməkdir. Öz növbəsində, bu, Əbu-Dabiyə inamı artıracaq və bütün dünyada aparıcı turizm istiqaməti kimi Əbu-Dabinin irəliləməsi üzrə uzunmüddətli strategiyada əhəmiyyətli rol oynayacaq”.

AZƏRTAC xəbər verir ki, Əbu-Dabidə endirimli mövsümə alıcılarda təəssürat yaradacaq təkliflər daxildir: BƏƏ-də bir milyon dirhəmə və dəniz sahilində mənzilə sahib olmaq şansı. Bu aksiyada iştirak üçün “Aldar” ticarət mərkəzlərində, o cümlədən “Yas” ticarət mərkəzində, Əbu-Dabi Beynəlxalq Satış Mərkəzinin ticarət mərkəzində və “Remal” ticarət mərkəzində alış-veriş etməniz kifayətdir. Həmçinin “Aldar” ticarət mərkəzlərində ziyarətçilərə hər həftə 80 min dirhəm dəyərində mükafatlar udmaq fürsəti təqdim edilir.

“Line Investments and Property” MMC, həmçinin “Ticarət mərkəzi – milyonçu” aksiyasına başlayır. Bu aksiya çərçivəsində alıcıların hər həftə 50 min dirhəm udmaq şansı var. Həmçinin bir milyon dirhəm məbləğində baş mükafat yay endirimlərinin sonunda “Əl-Vahda”, “Muşrif”, “Xalidiyyə”, “Əl-Raha”, “Mazyad”, “Suk Mədinət Zayed”, “Barari Outlet” və “Foah” ticarət mərkəzlərində oynanılacaq.

“Əbu-Dabi” ticarət mərkəzində alıcıların mərkəzin 5 min dirhəm dəyərində sertifikatını udmaq fürsəti yaranacaq. Onlar bundan ötrü azı 200 dirhəm xərcləməlidirlər. Yeddihəftəlik kampaniya ərzində “City Center” ticarət mərkəzində hər həftə 5 min dirhəm mükafat oynanılacaq, həmçinin 169600 dirhəm dəyərində inanılmaz əsas mükafat - “Chevrolet Tahoe”nin uduşu keçiriləcək. İştirak edən digər ticarət mərkəzləri, o cümlədən “Hili”, “Bavabat Əl-Şark”, “Bavadi, “Marina” və “Raha” “al və qazan” aksiyalarını keçirəcəklər. Bu zaman alıcıların sertifikat qazanmaq və uduşda iştirak etmək şansı olacaq.

Bununla yanaşı, “Summer#inAbuDhabi” təşəbbüsü ilə Yas adasındakı Əbu-Dabi əyləncə mərkəzində maraqlı təkliflər təqdim edilir. Uşaqlara çoxlu pulsuz əyləncələr təqdim etməklə, yay mövsümü ərzində ailələrin günəşdən zövq almaq fürsəti yaranacaq. Yas adasında “oyna və qal” əyləncəsini seçməklə, ailələr otellərdəki xüsusi qiymətlər və təkliflərlə özləri üçün yay təəssüratları aləmini kəşf edəcək, adanın ən yaxşı “Ferrari World Abu Dhabi” və “Warner Bros. World Abu Dhabi” tematik parklarında, həmçinin “Yas Waterworld” akvaparkında “Uşaqlar üçün giriş pulsuzdur” xüsusi təklifindən yararlanacaqlar.

“Summer#inAbuDhabi” otellər üçün də xüsusi təkliflər - SPA-prosedurlara, qida və içkilərə, nömrələrin bronlanmasına aksiyalar, həmçinin uşaqlar üçün də təkliflər təqdim edir. Əmirliklər üzrə ailə tipli çoxsaylı möhtəşəm otellər xüsusi təkliflər və çox gözəl endirimlər təqdim edir. Məşhur Sir-Bani-Yas adasında “Anantara Desert Islands” kurort kompleksi uşaqlar üçün pulsuz xidmətlər təklif edir. Burada adanın vəd etdiyi dəniz mənzərəsi və vəhşi təbiət macəralarından bütün ailə zövq ala bilir.

“Summer#inAbuDhabi” dadlı yemək həvəskarlarına da xüsusi təklif təqdim edir. Burada xüsusi təkliflərlə içki və yeməklər təqdim edən otellərin geniş seçimi müxtəlif zövqlü və iştahalı insanları qane edəcək. Əgər siz şopinq həvəskarısınızsa, o zaman Əbu-Dabidəki “InterContinental” oteli sizə könlünüzdəkini təklif edəcək. “InterContinental” möhtəşəm otellər qrupundan birində qalmağı seçməklə qonaqlar hər bronlanan gecə üçün 200 dirhəm dəyərində sertifikat alacaqlar. Bu sertifikatı “Yas” ticarət mərkəzində nağdlaşdırmaq mümkündür.

Bütün bu maraqlı əyləncələrin sonunda avqustun 22-dən sentyabrın 1-dək şəhər meydanındakı “Yas” ticarət mərkəzində “Yas” oyun festivalı keçiriləcək. Ticarət mərkəzinin şəhər meydanı bir sıra interaktiv tədbirlər, o cümlədən şən komanda turnirləri, retro-arkadlar, kiberidman və virtual reallıqla bağlı tədbirlər təqdim edəcək. Festival çərçivəsində valideynlər uşaqlar üçün nəzərdə tutulan oyunlar və maarifləndirici oyunlar barədə məlumatlandırılacaq, həmçinin onlara oyun müddətinə öz uşaqlarına nəzarət barədə məsləhətlər veriləcək.