Füzuli, 28 avqust, Aydın Yavərzadə, AZƏRTAC

Vətən müharibəsində şəhid olan Cəfərov Şəmsi Mahir oğlunun ad günündə qəhrəmanlıq dolu xatirəsi anılıb.

AZƏRTAC-ın bölgə müxbiri xəbər verir ki, şəhid Cəfərov Şəmsi Mahir oğlunun ad günündə şəhidin ailəsi ilə bərabər Füzuli Rayon İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin Füzuli rayon şöbəsinin əməkdaşları, ictimaiyyət nümayəndələri, Vətən müharibəsi qaziləri iştirak edib, şəhid Şəmsinin həyat yolundan söhbət açılıb. Bildirilib ki, hələ yeniyetmə çağlarından Vətənə sonsuz sevgisi olan qəhrəman yaşadığı qısa ömür yolu və şəhadəti ilə gələcək nəsillərə əsl qəhrəmanlıq nümunəsi olub. O, 2001-ci il sentyabrın 27-də dünyaya göz açıb. 2008-ci ildə Bakı şəhəri Sabunçu rayon 213 saylı liseyin 1-ci sinfə daxil olub lakin sonradan təhsilini Füzuli rayon 6 saylı Qayıdış qəsəbəsində tam orta məktəbdə davam etdirib. Orta məktəb vaxtı da öz nümunəvi əxlaqı və vətənpərvərliyi ilə seçilib. 2019-cu ildə həmin məktəbi bitirdikdən sonra həqiqi hərbi xidmətə qürur hissi yollanıb. Xidmətinin 1-ci ilində - 19-cu yaş günündə Vətən müharibəsinin ən öndə gedən döyüşçüləri sırasında yer alan Şəmsi döyüş yoldaşları ilə bir sıra uğurlu tapşırıqlarda iştirak edərək öz şücaəti ilə seçilib. 2020-ci il sentyabrın 29-da Tərtər rayonu Şıxarx (Marquşovan) kəndi uğrunda gedən gərgin döyüşlər zamanı Şəmsi qəhrəmancasına şəhidlik zirvəsinə ucalıb.

Digər çıxış edənlərdə 44 günlük Zəfər yürüşündən söhbət açıblar. Bildirilib ki, Müzəffər Ali Baş Komandan İham Əliyevin rəhbərliyi ilə xalq-ordu birliyi sayəsində 30 illik Vətən həsrətinə son qoyuldu, torpaqlarımızın azadlığa qovuşması uğrunda döyüşçülər ölümün gözünə dik baxaraq öz sinəsini sipər etdi. Şəhidlərimizin qanı-canı bahasına qazanılan Qələbə Azərbaycan tarixinin ən şanlı səhifəsi olaraq yaddaşlara həkk olundu. Şəhidlərimizin qəhrəmanlıq dastanı ilə gələcək nəsillərə örnək olacağı, qəlblərdə yaşayacağı vurğulanıb. Sonda şəhid Şəmsi Cəfərovun məzarı ziyarət olunub, önünə gül dəstələri düzülərək ruhuna dualar oxunub.

Qeyd edək ki, döyüşlərdə göstərdiyi qəhrəmanlığa görə Şəmsi Cəfərov ölümündən sonra Prezident İlham Əliyevin müvafiq sərəncamları ilə “Vətən Uğrunda” və “Suqovuşanın azad olunmasına görə” medalları ilə təltif olunub.