Bakı, 21 may, AZƏRTAC

Azərbaycan Milli Elmlər Akademiyasının (AMEA) Nizami Gəncəvi adına Ədəbiyyat İnstitutunda çağdaş Malay ədəbiyyatına həsr olunmuş seminar keçirilib.

İnstitutdan AZƏRTAC-a bildirilib ki, seminarda Azərbaycan-Asiya ədəbi əlaqələri şöbəsinin müdiri, filologiya elmləri doktoru, professor Bədirxan Əhmədli Malay ədəbiyyatının özünəməxsusluğu haqqında məlumat verib.

Sonra şöbənin kiçik elmi işçisi Sübhan Məmmədov Malay ədəbiyyatının görkəmli nümayəndəsi Şahnun Əhmədin həyat və yaradıcılığı barədə məruzə ilə çıxış edib.

Qeyd edilib ki, Şahnun Əhməd 1933-cü ildə Malayziyanın Bang Golder Kedah bölgəsində kəndli ailəsində doğulub, Setarda yerləşən Sultan Əbdülhəmid kollecini, daha sonra isə Avstraliya Beynəlxalq Universitetini bitirib. Tanjung Malimdə yerləşən Sultan İdris Universitetində ədəbiyyat professoru olan Şahnun zəngin ədəbi yaradıcılıq yolu keçib. Ş.Əhməd ədəbi yaradıcılığa 1950-ci illərdə başlayıb. O, 1965-ci ilə qədər kiçik hekayələr yazıb. İlk romanı “Ritong” adlanır. Onun dünya ədəbiyyatına səs salan “Tikandan başqa məhsul yox” romanı 1966-cı ildə işıq üzü görüb. Əsər yaşamaq üçün deyil, sadəcə var olmaq üçün təbiətlə mübarizə aparan bir kəndli ailəsindən bəhs edir. Bundan başqa, müəllifin 1967-ci ildə “Nazir”, 1973-cü ildə “Srengenge” romanları nəşr olunub. Sonuncu əsər yüksək mükafatlara layiq görülüb. Onun əsərlərinə filmlər də çəkilib.

Diqqətə çatdırılıb ki, dünyanın müxtəlif dillərinə tərcümə olunmuş “Tikandan başqa məhsul yox” romanının dilimizə tərcüməsi Malay ədəbiyyatı ilə tanışlıq üçün ən yaxşı vasitə ola bilər.