CƏMİYYƏT


Ədliyyə Nazirliyi tərəfindən Uşaqların Müdafiəsi Günü ilə bağlı "açıq qapı" günü keçirilib

Bakı, 2 iyun, AZƏRTAC

BMT Baş Assambleyasının qərarına əsasən müəyyən edilmiş 1 İyun - Uşaqların Beynəlxalq Müdafiə Günü ölkəmizdə geniş qeyd edilir. Bu münasibətlə Ədliyyə Nazirliyi tərəfindən 4 saylı cəzaçəkmə müəssisəsində qadın məhkumlar üçün uşaqları ilə və Tərbiyə müəssisəndə yeniyetmə məhkumların valideynləri ilə "açıq qapı" günü keçirilib.

Ədliyyə Nazirliyinin mətbuat xidmətindən AZƏRTAC-a bildiriblər ki, tədbirlərdə nazirliyin və Penitensiar xidmətin məsul işçiləri, Vəkillər Kollegiyasının, “Ümidli Gələcək Sosial Təşəbbüslər” İctimai Birliyinin, xeyriyyə təşkilatlarının və ictimaiyyətin digər nümayəndələri iştirak ediblər.

Çıxış edənlər Prezident İlham Əliyevin rəhbərliyi ilə dövlət uşaq siyasətinin uğurla həyata keçirilməsindən, uşaqların hərtərəfli inkişafına göstərilən yüksək qayğıdan, uşaq hüquqlarının etibarlı təmin olmasına xidmət edən mühüm tədbirlərdən bəhs olunub. Uşaqların firavan və sağlam, yüksək mənəvi-əxlaqi mühitdə layiqli şəxsiyyət kimi yetkinləşməsi, bu sahədə çoxşaxəli təşəbbüslərin reallaşdırılmasında respublikamızın Birinci vitse-prezidenti Mehriban xanım Əliyevanın və rəhbəri olduğu Heydər Əliyev Fondunun xidmətləri qeyd edilib.

Cəmiyyətimizin həssas təbəqəsi olan qadın və yeniyetmə məhkumların hüquqlarının təminatı, islah prosesinin və asudə vaxtının səmərəli təşkili, xüsusi karantin rejimi şəraitində yeniyetmə məhkumların valideynləri, həmçinin qadın məhkumların uşaqları ilə ünsiyyət qurmaları üçün videokonfrans formatında görüşlərin, habelə məhkumların sosial adaptasiyası məqsədilə onların bilik və bacarıqlarının artırılması, peşə hazırlığı ilə bağlı vətəndaş cəmiyyəti institutları ilə birgə proqramların, təlim-tədris kurslarının keçirilməsi vurğulanıb.

Sonra Uşaqların Beynəlxalq Müdafiə Gününə həsr olunmuş bayram tədbirləri keçirilib. Tədbir iştirakçıları əlamətdar bayram münasibətilə uşaqlara təbriklərini çatdırıb, onlara hədiyyələr təqdim ediblər. Musiqili-əyləncəli konsert proqramı ilə davam edən tədbirlər uşaqlar tərəfindən böyük maraq və sevinc hissi ilə qarşılanıb. Daim dövlət qayğısı ilə əhatə olunan uşaqlar üçün Ədliyyə Nazirliyi tərəfindən belə tədbirlərin təşkilinə görə minnətdarlıq ifadə edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.