Şəmkir, 2 iyun, E.Məmmədov, AZƏRTAC

Bu gün biz əlamətdar hadisənin şahidi olduq. Prezident İlham Əliyevin 2014-cü ildə imzaladığı Sərəncamın icrası bu gün praktiki olaraq yekunlaşdı. Həmin Sərəncamla tapşırıq verilmişdi ki, ölkədə "Elektron məhkəmə" informasiya sistemi qurulsun və bütün məhkəmələr bu sistemə qoşulsun.

Bunu Şəmkirdə AZƏRTAC-ın bölgə müxbirinə müsahibəsində Ədliyyə Nazirliyinin İnformasiya texnologiyaları və innovasiyalar idarəsinin rəisi Ağakərim Səmədzadə deyib.

"Şəmkir rayon məhkəməsinin "Elektron məhkəmə" sisteminə qoşulması ilə ölkənin bütün məhkəmələrinin elektronlaşması prosesi yekunlaşdı. Artıq bütün məhkəmələrdə ədalət mühakiməsi ilkin ərizə daxil olması prosesindən yekun qərarın icrasına qədər avtomatlaşdırılmış rejimdə icra olunur,"- deyə idarə rəisi bildirib.